ۆەلوشاباندوزدار اراسىنداعى ەڭ ءىرى جارىس – «تۋر دە فرانس» كوپكۇندىگى بەل ورتاسىنا تاياپ قالدى. دانيانىڭ استاناسى – كوپەنگاگەننەن باستاۋ العان بيىلعى ۆەلوبايگە بۇل كۇندەرى شۆەيتساريا تاس جولدارىندا ءوتىپ جاتىر. بۇل ارالىقتا ۆەلوسپورتشىلار فرانتسيانىڭ سولتۇستىگىنەن شىعىسقا قاراي ءجۇرىپ, جولاي بەلگيا شەكاراسىن كەسىپ ءوتتى.
بيىلعى «تۋر دە فرانستىڭ» توعىز كەزەڭىنىڭ قورىتىندىسى بويىنشا, قازاقستاندىق «استانا» ۆەلوكومانداسىنىڭ وكىلدەرى ۇزدىكتەر قاتارىنان كورىنە الار ەمەس. 2020 جىلعى گراند-تۋردىڭ التىنشى كەزەڭىندە-اق الدىنا جان سالماي, مارە سىزىعىن ءبىرىنشى بولىپ كەسكەن كاپيتان الەكسەي لۋتسەنكو ازىرگە مارەگە پەلوتونمەن بىرگە جەتىپ ءجۇر. بۇل – قازاقستاندىق كوماندانىڭ قازىرگى دەڭگەيى ءۇشىن وتە جاقسى كورسەتكىش. سەبەبى بيىلعى جارىسقا قاتىسىپ جاتقان ۆەلوشاباندوزداردىڭ كوبى مۇنداي جوعارى دەڭگەيدەگى گراند-تۋرلاردا العاش رەت ونەر كورسەتۋدە. سوندىقتان دا ولار تاجىريبەنىڭ جوقتىعىنان لۋتسەنوكوعا دەر كەزىندە كومەكتەسە الماي, وڭتايلى ساتتە الەكسەيدى قالىڭ توپتىڭ ىشىنەن سۋىرىپ الىپ, مارەگە جەتەكتەپ جەتكىزەتىندەي كۇش-قايرات تابا الماي جاتىر. دەگەنمەن بۇكىل كوماندا ءالى دە الەكسەي لۋتسەنكونىڭ جەكە شەبەرلىگىنە سەنىم ارتادى. Astana Qazaqstan Team ۆەلوكومانداسىنىڭ باس مەنەدجەرى الەكساندر ۆينوكۋروۆ كوماندانىڭ ءباسپاسوز قىزمەتىنە سۇحبات بەرىپ, بيىلعى جارىستا جوق دەگەندە ءبىر-ەكى كەزەڭدە جەڭىسكە جەتۋدى كوزدەيتىنىن ايتقان ەدى.
– ءبىزدىڭ باستى ماقساتىمىز – «تۋر دە فرانستىڭ» ءبىر كەزەڭىندە جەڭىسكە جەتۋ. مۇمكىن بولىپ جاتسا تاعى دا ءبىر-ەكى كەزەڭدەردە توپ جارساق دەيمىز. بۇل ءبىزدىڭ وسى جارىستاعى ەڭ ءبىرىنشى جانە ماڭىزدى ماقساتىمىز. قالعانىن ۋاقىت ەنشىسىنە قالدىرا تۇرامىز. وزدەرىڭىز بىلەتىندەي, بيىلعى گراند-تۋرعا كوماندانى كاپيتان رەتىندە الەكسەي لۋتسەنكو باستاپ باردى. ازىرگە ونىڭ ناتيجەسىنە كوڭىلىمىز تولادى. دەسە دە ول ءالى «تۋر دە فرانستىڭ» جوعارى ورىندارىنان كورىنۋگە تالپىنادى. ونىڭ بۇل ناتيجەگە جەتۋىنە تولىق مۇمكىندىك بار دەپ ويلايمىن. جارىس الدىندا ءبىز وعان توپ-10 ۆەلوسپورتشىنىڭ قاتارىنان كورىنۋ تاپسىرماسىن بەرگەن ەدىك. بۇكىل كوماندا الەكسەيگە كومەك كورسەتەدى. الايدا جەكە كەزەڭدەردە جەڭىسكە جەتۋ ءۇشىن بارلىق ۆەلوسپورتشى كۇرەسە الادى. ويتكەنى ءبىز بۇل جارىسقا التى اي بويى دايىندالدىق, – دەيدى لوندون وليمپياداسىنىڭ چەمپيونى ا.ۆينوكۋروۆ.
وكىنىشكە قاراي, بيىلعى دوداعا وسى جارىستىڭ 2014 جىلعى جەڭىمپازى, جەكەلەي كەزەڭدەردىڭ بىرنەشە دۇركىن چەمپيونى اتانعان يتاليالىق ۆينچەنتسو نيبالي مەن تاۋلى كەزەڭدەردىڭ كورولى كولۋمبيالىق ميگەل انحەل لوپەس جاراقاتتارىنا بايلانىستى قاتىسا المادى. لۋتسەنكو, نيبالي جانە لوپەس ۇشتىگى «تۋر دە فرانسقا» قاتىسقاندا, بالكىم «استانانىڭ» قازىرگى ناتيجەسى دە, العا قويعان ماقساتى دا بۇدان ءتاۋىر بولار ما ەدى, كىم ءبىلسىن؟!
ءبىرىنشى شىلدەدە باستالعان «تۋر دە فرانس» قازىر بەل ورتاسىنا تايادى. شۆەيتسارياداعى العاشقى تاۋلى كەزەڭنەن كەيىن جارىس كەستەسىنە كوز جۇگىرتەر بولساق, وسى دودانىڭ كەيىنگى ەكى جىلداعى جەڭىمپازى 23 جاستاعى سلوۆەنيالىق ۆەلوشاباندوز تادەي پوگاچار (UAE Team Emirates) كوش باستاپ تۇر. ءتورت كەزەڭ بويى سارى جەيدەگە يەلىك ەتكەن بەلگيالىق ۆاۋت ۆان ارت (Jumbo – Visma) التىنشى كەزەڭدە تومەن ناتيجە كورسەتىپ, جالپى ەسەپتە ءبىرىنشى ورىننان 51-ساتىعا ءبىر-اق سىرعىدى. دەگەنمەن ءار كەزەڭدە تۇراقتى ناتيجە كورسەتىپ كەلە جاتقان ونىڭ دانيالىق كوماندالاسى يوناس ۆينگەگور ەكىنشى ورىنعا كوتەرىلىپ الدى. ول پوگاچاردان 39 سەكۋندقا قالىپ كەلەدى. ءۇشىنشى ورىنعا «تۋر دە فرانستىڭ» 2018 جىلعى جەڭىمپازى بريتاندىق گەراينت توماس جايعاسقان.
«استانا» ۆەلوسپورتشىلارىنىڭ ناتيجەسىنە توقتالار بولساق, ازىرگە الەكسەي لۋتسەنكو جالپى ەسەپتە توپ-20 سپورتشىنىڭ قاتارىندا تۇر. توعىز كەزەڭنىڭ قورىتىندىسى بويىنشا جەرلەسىمىز كوشباسشىدان شامامەن بەس مينۋتقا قالىپ كەلەدى. ءالى الدا 12 كەزەڭ بار ەكەنىن ەسكەرسەك, لۋتسەنكونىڭ توپ-10 سپورتشىنىڭ قاتارىنا قوسىلاتىنداي تولىق مۇمكىندىگى بار. الەكسەيدەن كەيىنگى ۇزدىك ناتيجە سيمونە ۆەلاسكوعا تيەسىلى. يتاليالىق ۆەلوشاباندوز ازىرگە 71-ورىندى قاناعات تۇتۋدا. كەيىنگى ورىندارعا قازاقستاندىق اندرەي زەيتس (103), امەريكالىق دجوزەف دومبروۆسكي (114), يتاليالىق فابيو فەللينە (121), قازاقستاندىق دميتري گرۋزدەۆ (144) جانە بەلورۋسسيالىق الەكساندر ريابۋشەنكو (146) جايعاسقان. وكىنىشكە قاراي, سەگىزىنشى كەزەڭدە يتاليالىق دجانني موسكون مارەگە جەتە الماي, جارىس جولىنان شىعىپ قالدى. سوندىقتان «استانا» جارىستىڭ قالعان بولىگىن جەتى ۆەلوشاباندوزبەن وتكىزەدى.