ەۋروپا فۋتبول قاۋىمداستىقتارىنىڭ وداعى (ۋەفا) ۇلتتار ليگاسى اياسىندا ەلوردادا وتكەن قازاقستان – سلوۆاكيا ويىنىندا جانكۇيەرلەردىڭ تارتىپسىزدىگى ءۇشىن قازاقستان فۋتبول فەدەراتسياسىنا ايىپپۇل سالدى. بۇل تۋرالى قفف ءباسپاسوز قىزمەتى حابارلادى.
«قازاقستاندىق جانكۇيەرلەر قفف تاراپىنان قوعامدىق ءتارتىپ پەن جارىس ەرەجەلەرىن قاتاڭ ساقتاۋعا قاتىستى ايتقان ۇندەۋلەرىنە قاراماستان سلوۆاكيامەن وتكەن ماتچتا تريبۋنادان جاسىل الاڭعا ءارتۇرلى زات لاقتىردى. بۇل ارەكەتتەر ماتچ دەلەگاتىنىڭ ەسەبىنە تىركەلىپ, ۋەفا تارتىپتىك-باقىلاۋ جانە ادەپ ينستانتسياسىنىڭ جيىنىندا قارالدى. ونىڭ قورىتىندىسى بويىنشا قازاقستان فۋتبول فەدەراتسياسىنا 11 625 ەۋرو ايىپپۇل سالىندى», دەلىنگەن قفف حابارلاماسىندا.
ايتا كەتەيىك, ۋەفا قازاقستان قۇراماسىن جانكۇيەرلەردىڭ تارتىپسىزدىگى ءۇشىن ءبىرىنشى مارتە جازالاپ تۇرعان جوق. بۇعان دەيىن ناۋرىز ايىندا مولدوۆامەن وتكەن ويىننان كەيىن دە 19 250 ەۋرو كولەمىندە ايىپپۇل سالعان بولاتىن. ەگەر مۇنداي جاعداي الداعى ويىنداردا دا قايتالاناتىن بولسا, وندا ۋەفا قازاقستان قۇراماسىنىڭ كەيىنگى ماتچتارىنا جانكۇيەرلەردى كىرگىزبەۋ تۋرالى شەشىم شىعارۋى دا عاجاپ ەمەس.