«تۋر دە فرانس» كوپكۇندىگىنىڭ ءۇشىنشى كەزەڭى دانيانىڭ ۆايلە قالاسىنان باستاۋ الىپ, سولتۇستىكتەگى سيوننەربورگ قالاسىندا مارەسىنە جەتتى. تەگىس جولدا وتكەن جارىستا نيدەرلاندتىق ديلان گرونەۆەگەن توپ جاردى.
Team BikeExchange – Jayco كومانداسىنىڭ ۆەلوشاباندوزى 182 شاقىرىم قاشىقتىقتى 4 ساعات 11 مينۋت 33 سەكۋندتا باعىندىردى. ەكىنشى جانە ءۇشىنشى ورىنداردى بەلگيالىق ۆاۋت ۆان ارت (Jumbo – Visma) پەن يەسپەر فيليپسەن (Alpecin-Deceuninck) يەلەندى. بۇل كەزەڭدە «استانالىق» ۆەلوشاباندوزداردان سيمونە ۆەلاسكو مەن الەكسەي لۋتسەنكو مارە سىزىعىن 29 جانە 30-شى بولىپ كەستى.
جالپى ەسەپتە بەلگيالىق ۆاۋت ۆان ارت الدا كەلەدى. ونىڭ كورسەتكىشى – 9 ساعات 01 مينۋت 17 سەكۋند. ەكىنشى ورىنعا تاعى ءبىر بەلگيالىق سپورتشى يۆ لامپاەرت (Quick Step Alpha Vinyl Team) جايعاسسا, ۇزدىك ۇشتىكتى سلوۆەنيالىق تادەي پوگاچار (UAE Team Emirates) تۇيىندەپ تۇر. ولار كوشباسشىدان 7 جانە 14 سەكۋندقا قالىپ تۇر. ال قازاقستاندىق كوماندانىڭ ەڭ ۇزدىك ۆەلوشاباندوزى الەكسەي لۋتسەنكو 23-ورىنعا جايعاسقان.