ەرتەڭ ەلورداداعى «قازانات» اتشابارىندا نۇر-سۇلتان قالاسى اكىمدىگىنىڭ قولداۋىمەن قالا كۇنىنە وراي بايگە تۇرلەرىنەن «ەلوردا بايگەسى» رەسپۋبليكالىق ءتۋرنيرى وتەدى.
بايگە سايىسىندا نۇر-سۇلتان, الماتى جانە شىمكەنت قالالارى مەن ەلىمىزدىڭ بارلىق وبلىسىنان 150-دەن استام تاڭداۋلى جۇيرىك باق سىنايدى. شاباندوزدار توعىز شاقىرىمدىق قۇنان بايگە, 16 شاقىرىمدىق كىشى الامان جانە 21 شاقىرىمدىق الامان بايگە بويىنشا سىنعا تۇسەدى. جارىستىڭ جالپى جۇلدە قورى – 20 ملن تەڭگە.
سونداي-اق بايگە باعدارلاماسىندا «قوستاناي جىلقىسىنىڭ بايگەسى» اتتى رەسپۋبليكالىق تۋرنير دە ۇيىمداستىرىلماق. بيىل ءۇشىنشى رەت وتكەلى جاتقان جارىستا قوستاناي تۇقىمدى جىلقىلار ۇشقىر (1,4 كم, 2,4 كم), قۇنان (7 كم) جانە الامان بايگە (20 كم) تۇرلەرى بويىنشا باقتارىن سىنايدى. بايگەنىڭ جالپى جۇلدە قورى – 9 ملن تەڭگە.