ءتورتىنشى اينالىمعا شىقتى

ەكىنشى اينالىمدا 2019 جىلعى US Open چەمپيونى كانادالىق بيانكا اندرەەسكۋدى 6:4, 7:6 (7:5) ەسەبىمەن تىزە بۇكتىرگەن جەرلەسىمىز ءتۋرنيردىڭ ءۇشىنشى اينالىمىندا دا ازۋلى قارسىلاسىنان ايلاسىن اسىردى. بۇل كەزەڭدە وتانداسىمىز الەمنىڭ 52-راكەتكاسى قىتايلىق سينۆەن جەنمەن شەبەرلىك بايقاستى. ءبىرىنشى پارتيانىڭ بەسىنشى سەتىنەن كەيىن ە.رىباكينا 4:1 ەسەبىمەن العا شىعىپ العانىمەن, قىتاي­لىق تەننيسشى جىلدام تارازى باسىن تەڭەس­تىرىپ كەتتى – 6:6. دەگەنمەن تاي-برەيكتە جەر­لەسىمىزدىڭ باعى جاندى – 7:6 (7:4).

ەكىنشى سەتتە دە تارازى باسى ۇزاق ۋاقىت تەڭسەلىپ تۇردى – 5:5. قارسىلاس دوپتى ويىنعا قوسقان سەتتە ەلەنا برەيك جاساپ, 6:5 ەسەبىمەن العا شىعىپ الدى. سودان كەيىن ءوز مۇمكىندىگىن ءمۇلت جىبەرگەن جوق – 7:5. ە.رىباكينا شيرەك فينالعا شىعۋ ءۇشىن حورۆاتيالىق پەترا مارتيچپەن وينايدى.

وكىنىشكە قاراي, ا.بۋبليك پەن ا.نەدوۆەسوۆ ءتۋرنيردىڭ ءتورتىنشى كەزەڭىنە شىعا المادى. بۋبليك ءۇشىنشى اينالىمدا اقش وكىلى فرەنسيس تيافودان, نەدوۆەسوۆ پاكىستاندىق ايسام كۋرەشيمەن بىرگە جۇپتىق سىندا رافاەل ماتوس (برازيليا) مەن داۆيد ۆەگا-ەرناندەستەن (يسپانيا) جەڭىلىپ قالدى.