ەلوردادا ۇلتتىق نەيروحيرۋرگيا ورتالىعىنىڭ دارىگەرلەرى قىزىلوردا وبلىسىنان كەلگەن 16 جاستاعى قىز بالانىڭ ميىنا كۇردەلى وتا جاساپ, تالما سىرقاتىنان قۇتقاردى. بۇل وتا پاتسيەنتكە ءمامس جۇيەسىندە تەگىن جاسالدى, دەپ حابارلايدى Egemen.kz.
اناسىنىڭ ايتۋىنشا, 16 جاستاعى قاراقات جەتى جىل بويى تالماسى ۇستاپ, اۋىرىپ قالا بەرەتىن. العاش رەت 9 جاسىندا بولعان. ۇستامالارى تونيكالىق-كلونيكالىق سيپاتتا, سول قولىنان باستالىپ, كوزىن جۇمىپ, باسىن وڭعا قاراي 2 مينۋتقا دەيىن بۇرىپ قالاتىن, وسىلاي اپتاسىنا 1-2 رەت قايتالاناتىن.
ء«بىز قىزىلوردا قالاسىنداعى دارىگەرلەردىڭ باقىلاۋىندا بولدىق, قۇرىسۋعا قارسى پرەپاراتتار قابىلدادىق, بىراق ۋاقىت وتە كەلە بۇل پرەپاراتتار اسەر ەتپەي قالدى, تالماسى ءجيى ۇستاپ قالاتىن بولدى. بالامىزدىڭ بۇل اۋرۋدان ايىعۋىنا قالاي كومەكتەسەرىمىزدى بىلمەدىك. الماتى قالاسىنداعى ەپيلەپتولوگتاردىڭ دا قابىلداۋىندا بولدىق. بىراق وندا بىزگە وپەراتسيا كومەكتەسپەيتىنىن ايتتى», دەدى قاراقاتتىڭ اناسى.
نەۆرولوگ-ەپيلەپتولوگ گاۋحار سۇلتانحانقىزى يباتوۆاعا كونسۋلتاتسيا الۋعا كەلگەندە, مي جۇمىسىن تەكسەرەتىن جوعارىورىستى 3-تەسلا مرت جانە ەەگ-مونيتورينگى نەگىزىندە قىز بالادا ميدىڭ وڭ جاق توبە بولىگىندە ەپيلەپتيكالىق ۇستامالار وشاعىنا اينالعان ءتۇزىندى ىسىك بار ەكەنى انىقتالدى.
ء«بىز پاتسيەنتكە نەيروناۆيگاتسيا مەن ميدىڭ «قابىعى» تىكەلەي جازىلعان ەلەكتروكورتيكوگرافيانى قولدانا وتىرىپ, ميكروحيرۋرگيالىق وتا جاساپ, ميىنىڭ وڭ جاق توبە بولىگىندەگى ءتۇزىندى ىسىكتى الىپ تاستادىق. ناۋقاس ءۇشىن نەۆرولوگيالىق جاعىنان جەتكىلىكسىزدىك بولمايتىنداي ەپيلەپتوگەندىك وشاققا رەزەكتسيا جۇرگىزىلدى. وسى وتا پاتسيەنت جاعدايىن جاقسارتىپ, ونىڭ ءومىر ءسۇرۋ قالپىن وزگەرتۋگە مۇمكىندىك بەرەدى دەپ ۇمىتتەنەمىز», دەدى ۇلتتىق نەيروحيرۋرگيا ورتالىعىنىڭ دارىگەرى.
وتا پاتسيەنتكە ءمامس جۇيەسىندە تەگىن جاسالدى, ءارى ءساتتى ءوتتى.
«قىزىما وتە كۇردەلى وتا جاسالدى. وتادان كەيىن بىردە ءبىر رەت تالماسى ۇستامادى, بالاڭنىڭ ساۋىققانىن كورگەن قانداي باقىت ەكەنىن سوزبەن جەتكىزۋ مۇمكىن ەمەس. قاراقاتىمنىڭ سەنىمى مەن ءۇمىتى اقتالعانىنا وتە قۋانىشتىمىن. مۇنداعى دارىگەرلەردىڭ ءبارى مىقتى. نەيروحيرۋرگيا ورتالىعىنىڭ قىزمەتكەرلەرىنە ۇلكەن العىسىمدى بىلدىرەمىن. ءمامس جۇيەسىنىڭ ارقاسىندا ءبىز ءوز كەزەگىمىزدى ۇزاق كۇتكەن جوقپىز جانە دە وسىنداي قىمبات وتانى بىزگە اقىسىز جاسادى. زاماناۋي جابدىقتار مەن بىلىكتى مامانداردىڭ ارقاسىندا كۇردەلى وتا ءساتتى ءوتتى جانە تالما سىرقاتىنان قۇتقاردى», دەپ العىسىن ءبىلدىردى قىز بالانىڭ اناسى.
ايانا توعانبەك