كەيىنگى جىلدارى كاسىپقوي بوكستا ونەر كورسەتىپ جۇرگەن قازاقستاندىق جاس بوكسشىلاردىڭ ءبىر شوعىرى قالىپتاسىپ ۇلگەردى. كورسەتىپ جۇرگەن ناتيجەلەرى دە, جەتكەن جەتىستىكتەرى دە كوڭىل قۋانتادى. ۆاسيلي جيروۆ, گەننادي گولوۆكين سەكىلدى الەمدىك دەڭگەيدەگى جۇلدىز بوكسشىلاردىڭ جولىمەن كەلە جاتقان وتاندىق بوكستىڭ وعلاندارى از ۋاقىتتا مامانداردىڭ كوزىنە ءتۇسىپ ۇلگەردى. ولاردىڭ الدى مۇحيتتىڭ ارعى بەتىندەگى الپاۋىت كومپانيالاردان شاقىرتۋ الىپ, اقش تورىندە جۇدىرىقتاسىپ ءجۇر. وزگەلەرى قازاقستاندىق مامانداردىڭ قاسىندا ءجۇرىپ-اق چەمپيوندىق بەلبەۋگە «اقىرىن ءجۇرىپ, انىق باسىپ» جەتۋدى ماقسات تۇتقان.
ماسەلەن, قازاقستاندىق Suleimen Promotions كومپانياسى اۋەسقوي بوكستا ءبىرتالاي بيىك بەلەستى باعىندىرعان, الەم جانە ازيا بىرىنشىلىكتەرىندە اتوي سالعان تالانتتى جىگىتتەردى ءوز قامقورلىقتارىنا الىپ, ورەلى ورەندەردى كەزەڭ-كەزەڭىمەن الەمدىك دەڭگەيدەگى شوۋلارعا قاتىستىرا باستادى. پروموۋتەرلىكتىڭ قۇرامىندا ەكىنشى ورتا سالماقتاعى WBA International, WBO Global جانە WBC Asian بەلدىگىنىڭ يەگەرى ايدوس ەربوسىن ۇلى (16-0, 11 KO), اۋەسقوي بوكستان 2018 جىلعى ازيا چەمپيونى بەك نۇرماعانبەت (7-0, 5 كو), 2017 جىلعى الەم بىرىنشىلىگىنىڭ كۇمىس جۇلدەگەرى, توكيو وليمپياداسىنا قاتىسقان ءابىلحان امانقۇل (1-0, 1 كو), جاستار اراسىنداعى الەم (2014 جىل) جانە وليمپيا ويىندارىنىڭ چەمپيونى (2014), ەرەسەكتەر اراسىنداعى الەم بىرىنشىلىگىنىڭ ءۇش دۇركىن قولا جۇلدەگەرى ابىلايحان ءجۇسىپوۆ (2-0, 1 كو), ەۆگەني پاۆلوۆ (7-0, 5 كو) سەكىلدى بوكسشىلار بار.
جۋىردا ەسىمدەرى كەيىن اتالعان ءتورت بوكسشى كاسىبي بوكستىڭ «مەككەسى» سانالاتىن اقش-تا كەزەكتى جەكپە-جەكتەرىن وتكىزىپ, بارلىعى دا قارسىلاستارىن مەرزىمىنەن بۇرىن سۇلاتىپ سالدى. ميننەاپوليس (ميننەسوتا شتاتى) قالاسىندا Tom Brown (TGB Promotions) كومپانياسىنىڭ ۇيىمداستىرۋىمەن وتكەن بوكس كەشىنىڭ اندەركاردىندا شارشى الاڭعا شىققان وتانداستارىمىز ءۇشىن بۇل اقش-تاعى العاشقى ايقاستارى ەدى. كەشتىڭ باستى جەكپە-جەگىندە امەريكالىق بوكسشىلار – ستيۆەن فۋلتون مەن دانيەل رومان ەكىنشى جەڭىل سالماقتا WBC جانە WBO بەلبەۋىن ساراپقا سالىپ, العاشقىسى 12 راۋندتىڭ قورىتىندىسى بويىنشا تورەشىلەردىڭ ءبىراۋىز شەشىمىمەن جەڭىسكە جەتتى.
نەگىزگى جەكپە-جەككە دەيىن قازاقستاندىق بوكسشىلاردان ءبىرىنشى بولىپ شارشى الاڭعا ءابىلحان امانقۇل شىقتى. ورتا سالماقتا (72,5 كگ) دەبيۋتتى جەكپە-جەگىن وتكىزگەن قانداسىمىز كاسىپقوي بوكسقا جۋىردا عانا اۋىسىپ, العاشقى ايقاسىندا قارسىلاسىن نوكاۋتپەن جەڭگەن 25 جاستاعى امەريكالىق دەۆونت ماكدونالدپەن شەبەرلىك بايقاستى. ءتورت راۋندقا جوسپارلانعان كەزدەسۋدىڭ ءۇشىنشى راۋندىندا قازاقستاندىق بوكسشى قارسىلاسىنىڭ بۇيىرىنەن اۋىر سوققى جاساپ, نوكاۋتقا جىبەردى. امەريكالىق جەكپە-جەكتى قايتا جالعاستىرۋعا تىرىسقانىمەن تورەشى وعان مۇمكىندىك بەرمەدى.
شارشى الاڭعا ەكىنشى بولىپ اۋەسقوي بوكستا ۇلتتىق قۇرامانىڭ كاپيتانى بولعان ابىلايحان ءجۇسىپوۆ كوتەرىلدى. ءبىرىنشى ورتا سالماقتاعى (69,9 كگ) وتانداسىمىز بۇگىنگە دەيىن 40 جەكپە-جەك وتكىزىپ, ونىڭ 18-ىندە قارسىلاسىن جەڭىپ, 21 مارتە جەڭىلگەن جانە ءبىر كەزدەسۋىندە تەڭ تۇسكەن مەكسيكالىق ەدگار راميرەستىڭ اتاق-داڭقىنا قاراماي, ءبىرىنشى راۋندتا-اق سۇلاتىپ سالدى. بۇل – ا.ءجۇسىپوۆتىڭ كاسىپقوي بوكستاعى ەكىنشى جەكپە-جەگى جانە مەرزىمىنەن بۇرىن قول جەتكىزگەن ەكىنشى ءىرى جەڭىسى.
ال سۋپەر ورتا سالماقتا ونەر كورسەتەتىن (76,2 كگ) قازاقستاندىق بەك نۇرماعانبەت تە ارىپتەستەرىنىڭ دە, ءوزىنىڭ دە جەڭىستى جولىن ءساتتى جالعادى. توعىز جەكپە-جەكتىڭ جەتەۋىندە (التى قارسىلاسىن مەرزىمىنەن بۇرىن ۇتقان) جەڭىسكە جەتىپ, ەكى ايقاسىندا جەڭىلىپ قالعان امەريكالىق بوكسشى حاينەلل ۋيلەر وتانداسىمىزعا نەبارى ەكى راۋند قانا قارسىلىق كورسەتۋگە شاماسى جەتتى. ەكىنشى ءۇش مينۋتتىقتىڭ ورتا تۇسىنا كەلگەندە بەك قارسىلاسىن وڭ قولىنىڭ اۋىر سوققىسىمەن قۇلاق شەكەدەن ۇرىپ قۇلاتتى. سونىمەن قاتار ەكىنشى جەڭىل سالماقتا (55,3 كگ) جۇدىرىقتاسقان تاعى ءبىر قازاقستاندىق بوكسشى ەۆگەني پاۆلوۆ مەكسيكالىق الەكسيس ساليدونى ەكىنشى راۋندتا نوكاۋتقا ءتۇسىردى.
جىگىتتەردىڭ اقش-تاعى جارقىن جەڭىستەرى ءوز سالماعىنداعى الەمدىك رەيتينگتەگى ورىندارىنا دا ايتارلىقتاي اسەر ەتتى. اتاپ ايتار بولساق, جەتىنشى جەڭىسىنە قول جەتكىزگەن ەۆگەني پاۆلوۆ ءوز سالماعىنداعى 1 300 بوكسشىنىڭ ىشىندە 62-ورىنعا كوتەرىلسە, ءدال سونداي جەڭىسى بار بەك نۇرماعامبەت 72-ورىنعا (1 400 بوكسشى) جايعاستى. ابىلايحان ءجۇسىپوۆ ەكىنشى جەڭىسىنىڭ ارقاسىندا ەكى مىڭ بوكسشىنىڭ ىشىندە 418-ورىنعا ءبىر-اق كوتەرىلدى. ال دەبيۋتتىك كەزدەسۋىن نوكاۋتپەن اياقتاعان ءابىلحان امانقۇل ءا دەگەننەن 1 500 بوكسشىنىڭ ىشىنەن 600 ساتى جوعارىلاپ, 900-ورىنعا تۇراقتادى.