قازاقستان حالىق پارتياسىنىڭ توراعاسى ەرمۇحامەت ەرتىسباەۆ قازاقستان رەسپۋبليكاسى كونستيتۋتسياسىنا ەنگىزىلگەن تۇزەتۋلەر بويىنشا رەسپۋبليكالىق رەفەرەندۋمنىڭ قورىتىندىسىنا قاتىستى رەسمي مالىمدەمە جاسادى.
«حالىق پارتياسى بىردەن قوعامداعى يدەيالىق كۇرەسكە قوسىلىپ, رەفەرەندۋمدى قولداۋ ءۇشىن اۋقىمدى ۇگىت-ناسيحات جۇمىسىن جۇرگىزدى. ءبىز ناتيجەگە ريزامىز جانە بۇل – بارلىق قازاقستاندىقتىڭ جەڭىسى دەپ سانايمىز. قازاقستاندىقتار ءىس جۇزىندە پرەزيدەنت ق.توقاەۆقا زور سەنىم ءبىلدىردى. جاڭا, ادىلەتتى قازاقستاننىڭ بەرىك كونستيتۋتسيالىق ىرگەتاسى قالاندى دەپ ايتۋعا بولادى», دەدى پارتيا توراعاسى ءسوز باسىندا.
«قازاقستان حالىق پارتياسى جەر مەن تابيعي رەسۋرستاردىڭ مەنشىك يەسى مەملەكەت ەمەس, حالىق بولۋى كەرەك دەگەن باستاماسىن رەسمي تۇردە جاريالاپ, كونستيتۋتسياعا ەنگىزىلەتىن تۇزەتۋلەردى ازىرلەۋ جونىندەگى جۇمىس توبىنا جولدادى. حالىق پارتياسىنىڭ تۇزەتۋى قابىلداندى. بۇل تۇزەتۋدىڭ الەۋمەتتىك ادىلەتتىلىكتى قالپىنا كەلتىرۋ ءۇشىن ماڭىزى زور. رەفەرەندۋمنان كەيىن قازاقستاندىقتاردىڭ الدىندا تۇرعان باستى مىندەت – كونستيتۋتسيانىڭ قابىلدانعان نورماسىن زاڭنامالىق جانە تاجىريبەلىك تۇرعىدا ىسكە اسىرۋ», دەپ اتاپ وتكەن ول حالىقتىق پارتيا بارلىق مەملەكەتتىك كومپانيانى, ءبىرىنشى كەزەكتە «سامۇرىق-قازىنا» قورىن شەنەۋنىكتەردىڭ قولىنان تىكەلەي جانە دەرەۋ حالىقتىڭ مەنشىگىنە بەرۋ قاجەت دەپ سانايتىنىن اتاپ ءوتتى. ويتكەنى «ۇكىمەت مەملەكەتتىك اكتيۆتەردى ءتيىمدى باسقارا المايدى. «سامۇرىق-قازىنا» قورىنىڭ ديۆيدەند تولەگەننەن بيۋدجەتتەن اقشا العانى الدەقايدا كوپ. ءبىز, قازاقستان حالىق پارتياسى «جەر جانە جەر قويناۋى حالىققا تيەسىلى», دەگەن كونستيتۋتسيالىق نورمانى ىسكە اسىرۋ جونىندەگى حالىق زاڭىن جاريا تۇردە ازىرلەۋدىڭ باستالعانىن مالىمدەيمىز. ءبىز بۇل باستاماعا بەيجاي قارامايتىن ازاماتتاردى, اسىرەسە زاڭگەرلەردى, ەكونوميستەردى, قارجىگەرلەردى زاڭنىڭ جازىلۋىنا اتسالىسۋعا ۇندەيمىز. ءبىز Amanat, «اق جول» پارتيالارىن, سونداي-اق پارلامەنتتىك ەمەس, ونىڭ ىشىندە ءالى تىركەلمەگەن پارتيالاردى دا حالىقتىق زاڭدى ازىرلەۋ جونىندەگى بىرلەسكەن جۇمىسقا قاتىسۋعا شاقىرامىز. ناتيجەلى جۇمىستىڭ قورىتىندىسىندا ءاربىر قازاقستاندىق حالىق مەنشىگىنەن تىكەلەي كىرىس, اتاپ ايتقاندا, مەملەكەتتىك كومپانيالاردان ديۆيدەند الادى دەپ سانايمىز. زاڭ ادىلەتسىز جەكەشەلەندىرۋدىڭ ناتيجەلەرىن قايتا قاراۋ مەحانيزمىن جانە مۇنداي اكتيۆتەردى وليگارحتاردىڭ قولىنان حالىقتىڭ مەنشىگىنە قايتارۋدى قاراستىرۋعا ءتيىس», دەگەن ە.ەرتىسباەۆ وزگە پارتيالاردى جۇمىلا جۇمىس اتقارۋعا شاقىردى.
سونىمەن قاتار ول: «كونستيتۋتسياعا ەنگىزىلگەن وزگەرىستەرگە بايلانىستى جانە جاڭا زاڭ ازىرلەنگەنگە دەيىن ءبىز ۇكىمەتتەن مەملەكەتتىك كومپانيالاردى جەكەشەلەندىرۋدى توقتاتۋدى تالاپ ەتەمىز. بيىل جانە الداعى جىلدارى «قازمۇنايگاز», Air Astana, QazaqGaz جانە ت.ب. قوسا العاندا «سامۇرىق-قازىنا» قورى شامامەن 40 كاسىپورىندى جەكەشەلەندىرۋگە شىعارۋدى جوسپارلاپ وتىر. قازىرگى جاعدايدا ولار ارزان باعامەن ساتىلادى. بۇل حالىقتى شىعىنعا ۇشىراتادى. حالىقتىڭ اكتيۆى قايتادان وليگارحتارعا ورالماۋى كەرەك. بۇعان قوسا جىل سوڭىنا دەيىن شەتەلگە زاڭسىز اكەتىلگەن, حالىقتىڭ مەنشىگى بولۋعا ءتيىس قاراجاتتى ەلگە قايتارۋ قاجەت. بۇل شامامەن 140 ملرد اقش دوللارى», دەپ مالىمدەدى. ءسوز سوڭىندا ء«اربىر قازاقستاندىق ەلىمىزدىڭ بايلىعىنان پايدا تابۋى ءۇشىن ادىلەتتى قازاقستاندى بىرگە قۇرىپ, حالىق مەنشىگىن بىرلەسىپ باسقارايىق», دەدى پارتيا توراعاسى.