سىرت الاڭداعى سەنساتسيا

ۇلتتار ليگاسىنىڭ جەرەبەسى تار­تىلعان ساتتەن باستاپ كەشەگى كۇنگە دەيىن ازەربايجان مەن بەلارۋس قۇرا­ما­لارىنىڭ باس باپكەرلەرى دە, بارشا فۋتبول ماماندارى دا سلوۆاكيانى «س» ليگاسىنىڭ نەگىزگى ءفاۆوريتى ەكەنىن ايت­قان بولاتىن. كەشەگى ماتچ الدىنداعى ءباسپاسوز ءماسليحاتىندا ماگومەد اديەۆ تە سلوۆاكيا قۇراماسىنىڭ ويى­نىن جوعارى باعالاپ, كەزدەسۋ قازاق­ستاندىقتار ءۇشىن وتە قيىنعا سوعاتىنىن مالىمدەگەن ەدى. دەگەنمەن م.اديەۆ ەۋروپانىڭ توپ-5 چەمپيوناتتارىندا ونەر كورسەتەتىن تاجىريبەلى فۋتبولشىلاردان جاساقتالعان شتەفان تاركوۆيچ شاكىرتتەرىن جەڭىپ, ءوزىنىڭ مىقتى موتيۆاتور, ستراتەگ ەكەنىن كورسەتتى.

ءبىر ەلدەن ەكىنشى ەلگە ۇشۋ, 90 مينۋت بويى الاڭدا جۇگىرۋ فۋتبولشىلار ءۇشىن وڭايعا سوقپايتىنى بەلگىلى. سوندىقتان م.اديەۆ كەشەگى ويىندا نەگىزگى قۇرامعا ازداعان وزگەرىس جاسادى. العاشقى تۋردا جاراقات العان اسحات تاعى­بەرگەننىڭ ورنىنا يسلامبەك قۋات شىقسا, قورعاۋشىلار تيمۋر دوس­ماعامبەتوۆ, ميحايل گابىشەۆ, سەرگەي مالىي ءبىرىنشى مينۋتتان باستاپ نەگىزگى قۇرامنان ورىن الدى. سونداي-اق ازەربايجانمەن وتكەن ويىندا ماماندار كوزىنە تۇسكەن رامازان ورازوۆ تا كەشەگى كەزدەسۋدە سول قاپتالدىڭ شابۋىلىنا جاۋاپتى بولدى. ولار ەلدوس احمەتوۆ, باۋىرجان بايتانا, يان ۆوروگوۆسكي جانە باعدات قايى­روۆتى الماستىردى. نەگىزگى قۇرام­نىڭ وزگە ويىنشىلارى وزگەرىسسىز قالدى.

ال سلوۆاكيا ساپىندا يتاليا چەمپيوناتىندا دوپ تەبەتىن الىپ دەنەلى قورعاۋشى ءارى قۇراما كاپيتانى ميلان شكرينيار («ينتەر») مەن جارتىلاي قورعاۋشى ستاني­سلاۆ لوبوتكا («ناپولي»), اپل كلۋب­تارىندا ونەر كورسەتەتىن قاق­پاشى مارەك روداك («فۋلحەم») پەن «ۋوت­فوردتىق» جارتىلاي قورعاۋشىسى يۋراي كۋتسكا سەكىلدى تىسقاققان فۋتبولشىلار ويىن بارىسىندا يگور شاتسكي قور­عاعان قاقپادان ساڭىلاۋ تابۋعا تىرىستى.

ترناۆاداعى «سيتي ارەنا» ستاديونىندا وتكەن ماتچىڭ العاشقى مينۋتتارىندا قازاقستان قۇراماسى الاڭ يەلەرىن ابدەن ساس­تىردى. كەزدەسۋدىڭ نەبارى ەكىنشى مينۋتىندا قورعاۋشى سەرگەي مالىي ايىپ الاڭىنىڭ ىشىنەن قاقپاعا باسپەن سوققى باعىتتاپ, قاقپاشى مارەك روداكتىڭ قىراعىلىعىن ءبىر تەكسەرىپ كوردى. ارادا بىرەر مينۋت وتكەندە العاشقى تۋردىڭ قاھارمانىنا اينالعان ابات ايىمبەتوۆ كەزەكتى مۇمكىندىكتى ءمۇلت جىبەرىپ, گول سوعا المادى. ونىڭ سوققىسى قاقپادان بيىك كەتتى. سلوۆاكيالىقتار دا العاشقى تايمدا يگور شاتسكي قورعاعان قاقپاعا ءالسىن-ءالسىن شابۋىل ۇيىم­داستىرۋعا تىرىسقانىمەن, 45 مينۋت بويى بىردە-ءبىر ءدال سوق­قى جاساي المادى. ەسەسىنە, كەزدە­سۋدىڭ 26-مينۋتىندا ۇلتتىق قۇ­را­مانىڭ جاس فۋتبولشىلارى رامازان ورازوۆ پەن ەلحان اس­تانوۆتىڭ شىعارعان پاسىنان كەيىن اسلان داراباەۆ گول سوعىپ, ويىن­نىڭ ەسەبىن اشتى – 0:1. الاڭ يەلەرى ءبىرىنشى تايمنىڭ سوڭىنا دەيىن تارازى باسىن تەڭەستىرۋگە تىرىس­قانىمەن, الماشي مەن رۋسناك شابۋىلدارىن ناتيجەلى اياقتاي المادى.

ۇزىلىستەن كەيىن شتەفان تار­كوۆيچ قۇرا­ماسىنىڭ شابۋىلىن كۇشەيتىپ, الاڭعا ەكى جارتىلاي قورعاۋشىنىڭ ورنىنا ءبىر شابۋىلشى مەن ءبىر جارتىلاي قورعاۋشى شىعاردى. ءسويتىپ, الاڭ يەلەرىنىڭ ويىنى ءبىراز جاندانعانداي بولدى. ءتىپتى ەكىنشى تايمنىڭ بەل ورتاسىنان اۋا سلوۆاكيالىقتاردىڭ شابۋىلى ۇدەي ءتۇستى. 77-مينۋت­تا لاديسلاۆ الماشي گول سوعىپ, ەسەپتى تەڭەستىرگەن ەدى. بىراق كەز­دەسۋدىڭ باس تورەشىسى كريستو توحۆەر گول سوعىلاردان بۇرىن الاڭ يەلەرىنىڭ ءبىرى سامات جارىمبەتوۆكە قارسى ويىن ەرەجەسىن بۇزدى دەپ ەسەپتەپ, ۆار جۇيەسىنە جۇگىندى. بەينەقايتالاۋدان كەيىن تورەشى فول تىركەپ, سلوۆاكيانىڭ گولىن ەسەپكە العان جوق. قالعان 10-15 مينۋتتا سلوۆاكيالىق فۋتبولشىلار قاۋىپتى ەشتەڭە ىستەي المادى. وسىلايشا, قازاقستان قۇراماسى سىرت الاڭدا سلوۆاكيا قۇراماسىن سان سوقتىرىپ, سەنساتسيا جاسادى. ءبىر ايتا كەتەرلىگى, بۇل ەكى قۇراما اراسىنداعى العاشقى رەسمي كەزدەسۋ بولاتىن.

ال ءبىزدىڭ توپتاعى ەكىنشى ماتچتا بەلارۋس پەن ازەربايجان قۇرا­مالارى تەڭ ويناپ (0:0), ەكەۋى دە العاشقى ۇپايلارىنا قول جەتكىزدى. ءسويتىپ, ەكى تۋردا 100 پايىزدىق ناتيجەمەن قازاقستان قۇراماسى ءوز توبىندا جەكە-دارا كوش باستادى. ەكى ماتچتا ءۇش ۇپاي العان سلو­ۆاكيا ەكىنشى ورنىن ساقتاپ قالسا, بەلارۋس پەن ازەربايجان ءبىر-ءبىر ۇپايمەن سوڭعى ەكى ورىنداردى ءوزارا ءبولىسىپ تۇر.

موگامەد اديەۆ شاكىرتتەرى كەلەسى كەزدەسۋىن 10 ماۋسىم كۇنى سەربيانىڭ نوۆي-ساد قالا­سىندا بەلارۋس قۇراماسىمەن وتكىزەدى. بۇل ماتچتان كەيىن ۇلتتىق قۇرا­ما ەلگە ورالىپ, 13 ماۋ­سىمدا ءوز الا­ڭىن­دا سلوۆاكيانى قابىل­داي­دى.