«قايرات» – 19 دۇركىن چەمپيون!

بيىلعى ەل بىرىنشىلىگىنىڭ فينالىندا رۋدنىيدىڭ «اياتى» مەن الماتىنىڭ «قايراتى» ءتورتىنشى مارتە كەزدەستى. بۇعان دەيىن ەكى كلۋب فۋتزالشىلارى ەل چەمپيوناتىنىڭ 2016, 2017 جانە 2019 جىلعى ماۋسىمىنىڭ فينالىندا كەزدەسىپ, بارىندە «قايراتتىڭ» مەرەيى ۇستەم بولعان ەدى. «ايات» ءوز تاريحىندا العاش رەت 1999 جىلى قازاقستان چەمپيو­نى اتانعان بولاتىن. فينالدا بۇرىنعى وڭتۇستىك قازاقستان وبلىسىنىڭ (قازىرگى تۇركىستان وبلىسى – رەد.) «تەمىرلان» كومانداسىنان باسىم تۇسكەن بولاتىن.

بيىلعى فينالدا ەكى ۇجىم اراعا ەكى جىل سالىپ قايتا جو­لىقتى. فينالدىق باسەكەنىڭ ال­عاشقى ەكى ويىنى الماتىدا ءوتىپ, ەكەۋىندە دە الاڭ قوجايىندارى جەڭىسكە جەتتى. «قايرات» پەن «ايات»  اراسىنداعى ءبىرىنشى ماتچ اسا تارتىستى وتكەنىمەن, كەزدەسۋ سوڭىندا الماتىلىقتار ءبارىبىر 4:2 ەسەبىمەن جەڭىستى ج ۇلىپ الدى. كەزدەسۋدىڭ ءبىرىنشى بولىگىندە «ايات» فۋتزالشىلارى «قايراتقا» لايىقتى قارسىلىق كورسەتتى – 1:1. «قايرات» ساپىنان ەدسون دوس سانتوس مەرگەندىگىمەن كوزگە تۇسسە, دانيل كارپيۋك تارازى باسىن تەڭەستىرگەن-ءدى. دەگەنمەن ەكىنشى 20 مينۋتتىقتا قوناقتار سول قارقىنىن ۇستاپ تۇرا المادى. ەكىنشى تايمدا الماتىلىقتاردان كارلوس سانز ءبىر گول سوقسا, داۋرەن تۇر­ساعۇلوۆ ءدۋبلدىڭ اۆتورى اتان­دى. الاڭ يەلەرىنىڭ ءۇش گولىنا قوناق­تاردان ءابدىراسۋل ءابدى­ما­ناپ­ ۇلى تەك ءبىر عانا گولمەن جاۋاپ قايتاردى.

ەرتەسى كۇنى وتكەن ەكىنشى ماتچ­تا دا «ايات» فۋتزالشىلارى «قاي­­راتتىڭ» قارقىنىنا توتەپ بەرە المادى – 7:2. جىل باسىندا قازاق­ستاننىڭ ازاماتتىعىن الىپ, ەۋروپا چەمپيوناتىندا ەل نامىسىن قورعاعان الماتىلىقتاردىڭ  برازيليالىق ويىنشىسى ەدسون ءبىرىنشى تايمنىڭ وزىندە-اق حەت-تريك جاساپ, كەزدەسۋدىڭ تاع­دىرىن ءبىر ءوزى شەشىپ تاستادى. ەكىنشى تايمدا قارقىنىن ودان ءارى كۇشەيتكەن «قايرات» «ايات» قاق­پاسىنا تاعى ءتورت گول سوقتى. 21-مينۋتتا «قايراتتىڭ» برازي­ليالىق لەگيونەرى ديەگو داۋرەن تۇرساعۇلوۆتىڭ پاسىنان كەيىن ەسەپتى 4:1-گە جەتكىزسە, ارادا ءبىر مينۋت وتكەندە ءدۋبلدىڭ اۆتورى اتاندى. الاڭ ورتاسىنان قار­سىلاسىنان دوپتى وڭاي تارتىپ العان الەشاندرە ديەگو قاقپاشىمەن بىرگە-ءبىر شىعىپ, ايلاسىن اسىرىپ كەتتى – 5:1. ماتچتىڭ اياعىنا دەيىن «قايرات» ويىنشىلارى تاعى ەكى مارتە مەرگەندىك تانىتتى. 28-مينۋتتا داۋرەن تۇرساعۇلوۆ سول اياعىمەن قاقپانىڭ سول جاق بۇرىشىن ءدال كوزدەسە, 39-مينۋتتا البەرت اقبالىقوۆ بوس قالعان قاقپاعا گول سوقتى. بۇل كەزدە «اياتتىڭ» باس باپكەرى قاقپاشىنىڭ ورنىنا الاڭعا بەسىنشى ويىنشىنى شىعارعان ەدى. بۇل كەزدەسۋدە قوناقتار ساپىندا انتون رىندين مەن دانيل كارپيۋك گول جاسادى. 

جەكسەنبى كۇنى وتكەن ەكى ۇجىم اراسىنداعى ءۇشىنشى كەزدەسۋدە «قايرات» فينالداعى ويىندار سەرياسىن ءارى قاراي سوزبالاقتاماي, بار ماسەلەنى وسى ماتچتا شەشىپ تاستاۋعا تىرىستى. فينال ەرەجەسى بويىنشا العاش بولىپ ءۇش مارتە جەڭىسكە جەتكەن كوماندا ەل چەمپيونى اتاندى. ەگەر بۇل ويىندا «ايات» جەڭىسكە جەتكەندە, كوماندالار تاعى دا ءبىر ماتچ وتكىزۋى ءتيىس ەدى. دەگەنمەن الماتىلىقتار ء«ا» دەگەننەن ويىن تىزگىنىن ءوز قولدارىنا الىپ, ەكى تايمدا الاڭ يەلەرىنىڭ قاقپاسىنا ءتورت گول سوعىپ, 4:2 ەسەبىمەن جەڭىسكە جەتتى. ءسويتىپ ەل تاريحىنداعى 19-شى چەمپيوندىعىنا قول جەتكىزدى.

كەزدەسۋدىڭ 5-مينۋتىندا بىل­­تىرعى چەمپيوناتتىڭ ۇزدىك ويىن­شىسى داۋرەن تۇرسا­عۇلوۆ سول قاپتالدان ءبىر قورعاۋ­شىنى ال­داپ ءوتىپ, دوپتى قاق­پانىڭ تو­عىزدىعىنا ءدال كوزدەدى – 1:0. ارا­دا ەكى مينۋت وتكەندە «قاي­رات­­تىڭ» شابۋىلشىسى البەرت اق­­با­لىقوۆ بۇرىشتا­مادان اسىر­­­عان دوپقا ءبىرىنشى جەتىپ, تاب­­لو­داعى كورسەتكىشتى 2:0-گە جەت­كىز­دى. سودان كەيىن الماتى­لىق­­­­تاردىڭ قارقىنى باسەڭدەپ, ويىن تىزگىنىن قارسىلاستارىنا بەرىپ قويدى. ناتيجەسىندە, ماتچ­تىڭ 10-مينۋتىندا داۋرەن تۇر­ساعۇ­لوۆتىڭ قاتەلىگىنەن كەيىن «ايات­تىڭ» شابۋىلشىسى روشا باتيس­تا لەاندرينو ەسەپ ايىر­ما­سىن قىسقارتىپ, سپورت كەشە­نىنە جينالعان جەرگىلىكتى جانكۇيەر­لەردى ءبىر سەرپىلتىپ تاستادى. ءبى­رىنشى تايم سوڭىنا دەيىن الاڭ يەلەرىنىڭ ەسەپتە العا شىعىپ الاتىن تاماشا مۇمكىندىگى بولعان ەدى. الايدا «ايات» فۋتبولشىلارى العاش پەنالتيدەن ءمۇلت كەتسە, كەيىننەن 10 مەترلىك ايىپ دوبىنان گول سوعا المادى. يگيتانىڭ ەرلىگى ارقاسىندا «قايرات» ءبىرىنشى تايمدا ەسەپتەگى باسىمدىقتى وزدەرىندە ساقتاپ قالدى. 

ەكىنشى تايمنىڭ العاشقى بە­سىن­شى مينۋتىندا بيىلعى ەۋرو­پا چەمپيوناتىنىڭ ۇزدىك سۇرمەر­گەنى ءبىرجان ورازوۆ «قايرات­تىڭ» ءۇشىنشى گولىن سوقسا, التىن­شى مي­نۋتتا كارلوس سانز الماتى­لىق­تارعا جەڭىس سىيلادى. ال ەكىن­شى تايم­نىڭ ورتا تۇسىنان اۋعان­دا دا­نيل كارپيۋك ەسەپتى 4:2-گە جەت­كىزدى.

ءسويتىپ فينالدا «اياتتان» باسىم تۇسكەن «قايرات» ەل چەمپيونى اتانسا, باتىستىڭ ەكى كومانداسى – «كاسپي» مەن «اقتوبە» ەل بىرىنشىلىگىنىڭ قولا جۇلدەسى ءۇشىن تالاس جۇرگىزۋدە. كوماندالار كەشە سەرياداعى ءتورتىنشى كەزدەسۋىن وتكىزدى. اقتاۋدا وتكەن ءبىرىنشى ويىندا قوناقتار 3:1 ەسەبىمەن جەڭىس­كە جەتكەن بولسا, ەكىنشى ماتچ­تا «كاسپي» ەسە قايتاردى – 3:2. ال اقتوبەدەگى ءۇشىنشى ماتچ­تا «اتىراۋ» 3:2 ەسەبىمەن جەڭىس­كە جەتىپ, جالپى سەريادا 2:1 ناتيجەسىمەن العا شىعىپ الدى. بۇل جەردە دە ەڭ ءبىرىنشى ءۇش رەت جەڭىسكە جەتكەن كوماندا قولا جۇلدەگەر اتانادى.