جەڭىسپەن باستادى

وسىدان بىرەر اي بۇرىن م.اديەۆ ۇلتتىق قۇراماعا باس باپ­كەر بولىپ تاعايىندالعاننان كەيىن جانكۇيەرلەر شەتەلدىك ماماننان اسا ۇلكەن وزگەرىس, جاڭاشىل فۋتبول كۇتكەن بولاتىن. الايدا اديەۆتىڭ نەگىزگى كومانداداعى العاشقى ويىنى كوپتىڭ كوڭىلىنەن شىعا قويماسا دا, باپكەر باستىسى ناتيجە كورسەتتى. وتكەن ويىندا دا, الداعى ماتچتاردا دا ۇلتتىق قۇراماعا تاجىريبەلى ويىنشىلاردىڭ كو­مەكتەسە المايتىنى بەلگىلى. سول فۋتبولشىلاردىڭ جوق بولۋىنا بايلانىستى اديەۆ بۇل جولى جاستارعا جانە ۇلتتىق قۇراما قاتارىنا ءبىرازدان بەرى شاقىرتۋ الا الماي جۇرگەن فۋتبولشىلارعا مۇمكىندىك بەردى. اتاپ ايتار بول­ساق, ەلدوس احمەتوۆ, باۋىر­جان بايتانا, رامازان ورا­زوۆ, ماكسيم سامورودوۆ, ار­مان كەڭەسوۆ, بەكحان شايزادا سە­كىلدى فۋتبولشىلار نەگىزگى كومانداعا قايتا ورالسا, ەلحان استانوۆ, ابىلايحان جۇمابەك جانە ميحايل گابىشەۆتار العاش رەت ۇلتتىق قۇراماعا شاقىرتۋ الدى. دەبيۋتانتتار اراسىنان ازەربايجانمەن وتكەن ويىندا تەك ەلحان استانوۆ قانا ءبىرىنشى مينۋتتان باستاپ جاسىل الاڭعا شىعىپ, جاقسى ويىنىمەن جانكۇيەرلەردىڭ دە, فۋتبول ماماندارىنىڭ دا كوزىنە ءتۇستى. سونداي-اق ەكىنشى تايمدا الاڭعا تىڭنان قوسىلعان رامازان ورازوۆ تا ۇلتتىق قۇرامانىڭ ويىنىنا قان جۇگىرتىپ, ءوز شەبەرلىگىنىڭ ارقاسىندا قۇرامانىڭ جەڭىسكە جەتۋىنە سۇبەلى ۇلەسىن قوستى.

ال ازەربايجان قۇراماسىنىڭ باس باپكەرى دجانني دە بيازي بولسا الاڭعا كىل مىقتى ءارى تا­جى­ريبەلى ويىنشىلارىن شى­عاردى. سونىڭ ارقاسىندا دا قوناق كوماندا ءبىرىنشى كەزەڭدە ۇستەمدىككە كوپ يە بولدى. قار­سىلاستار ءبىرىنشى تايمدا يگور شاتسكي قورعاعان قاقپاعا 11 سوققى جاسادى. ونىڭ التاۋى­ن قاقپاعا ءدال باعىتتادى. اسىرەسە ءبىرىنشى كەزەڭنىڭ سوڭىنا قاراي قوناقتار وتە بەلسەندى بول­­دى. الدىمەن 30-مينۋتتا رەنات داداشەۆ قاپتالدان تەپكەن ەدى. ونى ءبىزدىڭ قاقپاشى قايتارىپ الدى. كەيىن 36-مينۋتتا ازار سالالحي سوققى جاساعان بولاتىن. ابىروي بولعاندا دوپ ازەربايجان ويىنشىسىنا ءتيىپ, قاقپادان قيىس كەتتى. جا­سىراتىنى جوق, ويىننىڭ ال­عاشقى 45 مينۋتىن قازاقستان ۇلتتىق قۇراماسى وتە ناشار وت­كىزدى. ءتىپتى قارسىلاستار قاق­پا­سىنا بىردە-ءبىر سوققى جاساي المادى. مۇنى ماتچتان كەيىن باس باپكەردىڭ ءوزى دە مويىندادى: «ويىننىڭ باسى ءبىز ءۇشىن جامان بولعان جوق. ءبىز دوپقا كوپ يەلىك ەتىپ, ويىندى ءوز باقىلاۋىمىزدا ۇستادىق. بىراق 25-مينۋتتان كەيىن كوپ قاتەلەسىپ, كونتسەنتراتسيانى جوعالتىپ الدىق. ناتي­جەسىندە, قارسىلاسىمىز قاۋىپتى شابۋىل جاساپ, ويىن تىزگىنىن ءوز قول­دا­رىنا الدى».

ەكىنشى تايمدا م.اديەۆ باۋىر­جان بايتانانىڭ ور­نى­نا جاس فۋتبولشى رامازان ورا­زوۆتى الاڭعا شىعارىپ, تاك­تي­كالىق وزگەرىس جاسادى. نا­تيجە دە كوپ كۇتتىرگەن جوق. الاڭ ورتاسىندا وتە بەلسەندى وي­­­ناعان ءبىزدىڭ جىگىتتەر 50-مينۋتتا ەسەپتى اشتى. ابات ايىم­بە­توۆتىڭ قارسىلاستىڭ ايىپ الاڭىنا جاقىن جەردەن قاقپاعا قاقىراتا تەپكەن دوبى الدىمەن قورعاۋشىعا, كەيىن باعىتىن وزگەرتىپ ماڭدايشاعا ءتيىپ, قاقپا تورىنان تابىلدى. ارادا بىرەر مينۋت وتكەندە رامازان ورازوۆ تا ءوز مۇمكىندىگىن ءتيىمدى پايدا­لانىپ, قۇرامانىڭ ەكىنشى گولىن سوققان ەدى. الايدا ۆار كو­مەگىنە جۇگىنگەن تورەشى بەينە­قايتالاۋدان كەيىن ورازوۆ ويىننان تىس قالدى دەپ, ونىڭ گولىن ەسەپتەمەي قويدى.

دەگەنمەن شابۋىلىن ودان سايىن ۇدەتكەن جەرلەستەرىمىز ازەربايجان قاقپاسىنا ءبارىبىر ەكىنشى گولىن سوقتى. 58-مينۋتتا ابات ايىمبەتوۆ ايىپ الاڭىنا اسىرىلعان دوپقا ءبىرىنشى جەتتى دە, ەسەپتى ەسەلەدى. بۇل ساتتە دە تورەشى بەينەقايتالاۋعا جۇگىندى. ۇزاق ۋاقىت تالقىلاۋدان سوڭ تورەشى شابۋىلشىمىزدىڭ گولىن ەسەپكە الدى – 2:0. ماتچ سوڭىنا دەيىن قارسىلاستار ءبىزدىڭ فۋتبولشىلاردى قىسپاققا الىپ, ەسەپ ايىرماسىن قىسقارتۋعا تى­رىسقانىمەن, ونىسىنان تۇك شىقپادى. تورەشىنىڭ سوڭعى ىسقىرىعىنا دەيىن تابلوداعى كورسەتكىش وزگەرىسسىز قالدى. وسى­لايشا, قازاقستان قۇراماسى ۇلتتار ليگاسىنداعى العاشقى ويىنىن جەڭىسپەن باستادى.

ال ءبىزدىڭ توپتاعى ەكىنشى ويىندا سلوۆاكيا سىرت الاڭدا بەلارۋس قۇراماسىنان باسىم ءتۇستى – 1:0. سەربياداعى بەيتاراپ الاڭدا وتكەن كەزدەسۋدەگى جال­عىز گولدى 50-مينۋتتا 19 جاس­تاعى توماش سۋسلوۆ سوقتى. ازەر­بايجان قاقپاسىنا ەكى گول سالعان جەرلەستەرىمىز دوپ ايىر­ماسى بويىنشا «س» ليگاسىنىڭ ءتورتىنشى توبىندا كوش باستادى. جەرلەستەرىمىز بۇگىن ۇلتتار ليگاسىنىڭ ەكىنشى تۋر اياسىن­دا سىرت الاڭدا سلوۆاكيا قۇرا­ماسىمەن كەزدەسەدى. ماتچ ترناۆا قالاسىنداعى «سيتي ارەنا» ستاديونىندا ەلوردا ۋاقىتىمەن 00:45-تە باستالادى. وكىنىشكە قا­راي, بۇل ويىنعا جاراقاتىنا باي­لا­نىستى كوماندا كاپيتانى اس­حات تاعىبەرگەن قاتىسا المايتىن بولدى.