جىل باسىنان بەرى جول قۇرىلىسى سالاسىنداعى 2 تەحنيكالىق قاداعالاۋ كومپانياسىنا 2,1 ملن تەڭگە كولەمىندە ايىپپۇل سالىندى, دەپ جازادى Egemen.kz قر يدم ءباسپاسوز قىزمەتىنە سىلتەمە جاساپ.
ۇكىمەت وتىرىسىندا يندۋستريا جانە ينفراقۇرىلىمدىق دامۋ ءمينيسترى پرەمەر-مينيستر ءاليحان سمايلوۆقا اۆتوكولىك سالاسىن دامىتۋ باعىتىندا اتقارىلىپ جاتقان جۇمىستارمەن تانىستىردى.
ەلىمىزدىڭ ترانزيتتىك الەۋەتىن ارتتىرۋ مەن وڭىرلەردىڭ ورتالىقپەن ىشكى كولىكتىك بايلانىسىن قامتاماسىز ەتۋ مىندەتىن ىسكە اسىرۋ ورايىندا جالپى پايدالانىمداعى 11,5 مىڭ شاقىرىم اۆتوكولىك جولدارى مەن سەگىز كولىك دالىزىنە مودەرنيزاتسيا, رەكونسترۋكتسيا جانە جوندەۋ جۇمىستارى ءۇشىن اعىمداعى جىلى رەسپۋبليكالىق بيۋدجەتتەن 601 ملرد تەڭگە ءبولىندى. كولىك ءدالىزى اقتاۋ جانە قۇرىق تەڭىز پورتى ارقىلى قىتاي, رەسەي جانە ورتا ازيا ەلدەرىنەن كاۆكازعا جانە ودان ءارى ەۋروپاعا ءترانزيتتى قامتاماسىز ەتەدى.
قايىربەك وسكەنباەۆتىڭ ايتۋىنشا, بۇگىندە رەسپۋبليكالىق جەلىنىڭ 7,3 مىڭ شاقىرىمىندا جۇمىستار جۇرگىزىلۋدە. ونىڭ 4,3 مىڭ شاقىرىمىندا قۇرىلىس جانە رەكونسترۋكتسيالاۋ جۇمىستارى جۇرگىزىلمەك. بيىلعى جىلدىڭ اياعىنا دەيىن 1,6 مىڭ شاقىرىم جولدى پايدالانۋعا بەرۋ جوسپارلانعان. ۆەدومستۆو باسشىسىنىڭ اقپاراتىنا سۇيەنەر بولساق, 3 مىڭ شاقىرىم جولعا كۇردەلى جانە ورتاشا جوندەۋ جۇمىستارى جۇرگىزىلىپ, ونىڭ 800 شاقىرىمىنان استامى پايدالانۋعا بەرىلگەن.
ال جەرگىلىكتى جەلىدە 4,2 مىڭ شاقىرىم جول جوندەۋ بارلىق تۇرىمەن قامتىلدى.
بيتۋمدى ۋاقتىلى جەتكىزۋ ماقساتىندا يدم ەنەرگەتيكا مينيسترلىگىمەن جانە باسەكەلەستىكتى قورعاۋ جانە دامىتۋ اگەنتتىگىمەن بىرلەسىپ, اي سايىنعى تىكەلەي جەتكىزۋ بويىنشا جۇمىس مەحانيزمىن قۇردى. اعىمداعى جىلى بيتۋمنىڭ جالپى قاجەتتىلىگى 1,1 ملن توننانى قۇرايدى (ونىڭ ىشىندە: رەسپۋبليكالىق جول جەلىسىنە – 600 مىڭ توننا, جەرگىلىكتى جول جەلىسىنە – 500 مىڭ توننا).
قر يدم باسشىسى ءوز سوزىندە ورىندالاتىن جۇمىستار مەن پايدالانىلاتىن جول-قۇرىلىس ماتەريالدارىنىڭ ساپاسىنا ءجىتى نازار اۋدارىلاتىنىن اتاپ ءوتتى.
«اعىمداعى جىلدىڭ باسىنان بەرى جۇمىستار مەن ماتەريالداردىڭ ساپاسىن ساراپتاۋمەن رەسپۋبليكالىق جەلى بويىنشا بارلىق اۆتوجول جوبالارى جانە جەرگىلىكتى جەلى بويىنشا 52 پايىزعا قامتىلدى. سونىمەن قاتار جول-قۇرىلىس ماتەريالدارىنىڭ 3 299 سىناماسى الىنىپ, سىنالدى. جالپى العاندا, جىل باسىنان بەرى مەردىگەرلەردىڭ ءوز قاراجاتى ەسەبىنەن 51,2 ملن تەڭگە سوماسىنداعى جۇمىستار قايتا جۇرگىزىلدى. ەكى تەحنيكالىق قاداعالاۋ كومپانياسىنا 2,1 ملن تەڭگە كولەمىنە ايىپپۇل سالىندى. سونداي-اق 1 تەحنيكالىق قاداعالاۋ كومپانياسىنىڭ اتتەستاتى التى ايعا توقتاتىلدى», دەدى ق. وسكەنباەۆ.
سونداي-اق مينيستر «كولىك تۋرالى» زاڭ جوباسى شەڭبەرىندە ورىندالاتىن جۇمىستاردىڭ ساپاسىن باقىلاۋدى ارتتىرۋ ماقساتىندا بىرقاتار تۇزەتۋلەر ەنگىزىلەتىنىن اتاپ ءوتتى. ولاردىڭ قاتارىندا كەپىلدىك كەزەڭىندە اۆتورلىق جانە تەحنيكالىق قاداعالاۋدىڭ مەردىگەرلىك ۇيىمدارمەن تەڭ دارەجەدە ورتاق جاۋاپكەرشىلىگى, ساپا ورتالىعىنا كوشە-جول جەلىسىندەگى جۇمىستار مەن ماتەريالداردىڭ ساپاسىنا ساراپتاما جۇرگىزۋ بويىنشا وكىلەتتىكتەر بەرۋ سياقتى تۇزەتۋلەر بار.
سونىمەن قاتار ۆەدومستۆو باسشىسى جولداردىڭ ساپاسىن قامتاماسىز ەتۋ ءۇشىن مىڭنان استام نورماتيۆتىك-قۇقىقتىق اكتى قايتا وڭدەلەتىن ايتتى. بۇدان وزگە, جولداردىڭ ساپاسى بويىنشا اكىمدەردىڭ رەيتينگىن انىقتاۋ جونىندەگى ادىستەمە ازىرلەنگەنىن دە اتاپ ءوتتى.