توتەنشە جاعدايلار مينيسترلىگى قازاقستاندىقتارعا جاز مەزگىلىندە شومىلۋعا بولاتىن سۋ ايدىندارىن ايقىندادى, دەپ حابارلايدى Egemen.kz.
«وزدەرىڭىز بىلەتىندەي, تاياۋدا ەلىمىزدە شومىلۋ ماۋسىمى باستالادى. وسى ورايدا شومىلۋ ماۋسىمىندا قاۋىپسىزدىكتى قامتاماسىز ەتۋ ماقساتىندا ءبىزدىڭ مينيسترلىك ورتالىق مەملەكەتتىك ورگاندارمەن جانە اكىمدىكتەرمەن بىرلەسىپ كەشەندى الدىن الۋ شارالارىن ۇيىمداستىرىپ جاتىر. وسىعان دەيىن سۋداعى قاۋىپسىزدىك ماسەلەلەرى رەسپۋبليكالىق دەڭگەيدەگى, وڭىرلەردە توتەنشە جاعدايلار جونىندەگى وبلىستىق كوميسسيالاردىڭ وتىرىستارىندا قارالدى. وندا ناقتى مىندەتتەر مەن ءىس-شارالار ايقىندالدى. قازىرگى تاڭدا ەلىمىزدە شومىلۋعا رۇقسات ەتىلگەن 490 ورىن انىقتالدى», دەدى قر تجم ازاماتتىق قورعانىس جانە اسكەري بولىمدەر كوميتەتىنىڭ توراعاسى باۋىرجان سىزدىقوۆ ورتالىق كوممۋنيكاتسيالار قىزمەتى الاڭىندا وتكەن ءباسپاسوز ءماسليحاتىندا.
كوميتەت باسشىسىنىڭ ايتۋىنشا, ەلىمىزدە شومىلۋ جانە دەمالۋعا ارنالعان 50 مىڭنان استام سۋ ايدىندارى بار.
«رۇقسات ەتىلگەن شومىلۋ ورىندارىنىڭ 187-ءى — كوممۋنالدىق, ال 287-ءى جەكە جاعاجاي. شومىلۋ ورىندارىنىڭ سانىن ارتتىرۋ ماقساتىندا قوسىمشا 16 ورىن بويىنشا ناقتى يەلەرىن بەكىتۋ جاعى قارالىپ جاتىر. اتاپ ايتقاندا, الماتى 2 ورىن, شقو 10 جانە بقو 4 شومىلۋ ورنى», دەدى ول.