جوو-دان كەيىنگى ءبىلىم بەرۋ سالاسىنا وزگەرىستەر ەنگىزىلۋى مۇمكىن

«جينالىستا كەلەسى ۇسىنىستار ايتىلدى: ءبىرىنشى, دوكتورانتتارعا قازاقستان تاريحى, قازاق فيلوسوفياسى, قازاق ءتىلى مەن ادەبيەتى سياقتى گۋمانيتارلىق بەيىندەگى بىرقاتار باعىتتىڭ ەرەكشەلىگىن ەسكەرە وتىرىپ, قولدانىستاعى تالاپتارعا (WوS جانە Scopus تىزبەسىنە كىرەتىن باسىلىمداردا ماقالالار جاريالاۋ) بىرنەشە بالاما نۇسقالاردى قوسۋ ۇسىنىلدى. اتاپ ايتقاندا: ا) كوكسون تىزىمىنە ەنگىزىلگەن جۋرنالداردا 5 ماقالا جانە عىلىمي كونفەرەنتسيالاردان 2 ماتەريال; ب) سەنىمدى باسپالاردا مونوگرافيا شىعارۋ (Elsevier, Brill, CRC Press, DeGruyter, Edward Elgar Publishing, Springer Nature جانە باسقالارى), سونداي-اق US News Best Global Universities Rankings, Academic Ranking of World Universities نەمەسە Times Higher Education World University رەيتينگىنىڭ توپ-100 قۇرامىنا كىرەتىن ۋنيۆەرسيتەتتەردە», دەلىنگەن ءمينيستردىڭ پاراقشاسىندا.

ول بىلتىر كوكسون تىزىمىنە ەنگىزىلگەن عىلىمي جۋرنالدارعا قويىلاتىن تالاپتار ەداۋىر كۇشەيتىلگەنىن جانە تىزىمنەن ءالسىز جۋرنالدار الىنىپ, ەسكى ءتىزىم تولىق جاڭارعانىن ەسكە سالادى. سول سەبەپتى بۇل شەشىم وسى جۇمىستىڭ قيسىندى جالعاسى سانالادى. ارينە, تولىققاندى دايەكسوز جۇيەسى بويىنشا جۇمىس سوزىلىپ كەتتى, بىراق سوعان قاراماستان ونىڭ قورىتىندىسى شىعارىلادى.

«سونداي-اق WoS جانە Scopus تىزىمىنە ەنگىزىلگەن جانە سانكتسياعا بايلانىستى دەرەكتەر قورىنان جويىلعان عىلىمي جۋرنالداردا گرانتتىق قارجىلاندىرۋ اياسىندا جاريالانعان قازاقستاندىق عالىمداردىڭ ماقالالارىن, ەگەر بۇل ماقالالار بۇعان دەيىن جاريالانۋعا قابىلدانعان بولسا, ولاردى تانۋ مۇمكىندىگى تالقىلاندى. بۇدان بولەك, ەنگىزۋ مەرزىمى كەيىنگە شەگەرىلە وتىرىپ, (2023 جىلدان باستاپ) مىناداي شارالار ۇسىنىلدى:

1. دوكتورانتتاردى قابىلداۋ بويىنشا. دوكتورانتۋراعا ءتۇسۋ كەزىندە ۇمىتكەرلەرگە وزدەرىنىڭ بولاشاق ديسسەرتاتسياسىنىڭ عىلىمي نەگىزدەمەسىن (research proposal) ۇسىنۋ ۇسىنىلدى.

2. دوكتورانتتاردىڭ زەرتتەۋ قۇزىرەتتىلىگى بويىنشا. بۇعان دەيىن ءبىز دوكتورانتتاردىڭ «اكادەميالىق حات», «عىلىمي زەرتتەۋ ادىستەرى» پاندەرىن مىندەتتى تۇردە وقۋىن ەنگىزدىك. بۇل قۇزىرەتتەر كەز كەلگەن دوكتورانتقا عىلىمي زەرتتەۋلەردى ءوز بەتىنشە ورىنداۋ ءۇشىن قاجەت. وسى پاندەردى مەڭگەرۋ ءۇشىن بىلىكتىلىك ەمتيحانىن وتكىزۋ ۇسىنىلادى.

3. عىلىمي باسشىلىق بويىنشا. ءبىر عىلىمي جەتەكشىگە 15 دوكتورانت, كەيىن ءبىرىنشىسى قورعاۋدان وتە الماعان جاعدايدا تاعى بەسەۋىن بەكىتۋ تاجىريبەسى دۇرىس ەمەس. بۇگىنگى تاڭدا عىلىمي جەتەكشىلەر كوپ جاعدايدا دوكتورانتتارمەن جۇمىس ىستەۋگە جەتكىلىكتى كوڭىل مەن ۋاقىت بولمەيدى. بۇل ماسەلەنى شەشۋ ءۇشىن جۇيەلى شارالار قاجەت», دەپ جازدى اسحات ايماعامبەتوۆ.

بۇل ۇسىنىستارعا قاتىستى قوسىمشا ساراپتاما مەن تالقىلاۋ وتكىزىلگەننەن كەيىن ناقتى شەشىم قابىلدانادى.