بريۋسسەلدە قازاقستان مەن ەۋرووداق ەلدەرى اراسىنداعى اۋە رەيستەرىن ۇلعايتۋ جانە اشۋ ماسەلەلەرى تالقىلاندى, دەپ حابارلايدى Egemen.kz.
ازاماتتىق اۆياتسيا سالاسىنداعى ەۋروكوميسسيامەن ىنتىماقتاستىق جونىندەگى جۇمىس شەڭبەرىندە قر يدم ازاماتتىق اۆياتسيا كوميتەتىنىڭ توراعاسى تالعات لاستاەۆ, يندۋستريا جانە ينفراقۇرىلىمدىق دامۋ ءمينيسترىنىڭ كەڭەسشىسى ازات بەكتۇروۆ, «قازاقستاننىڭ اۆياتسيا اكىمشىلىگى» اق باس ديرەكتورى كاتالين رادۋ, بەلگياداعى قازاقستان ەلشىلىگىنىڭ قىزمەتكەرلەرى باستاعان قازاقستاندىق دەلەگاتسيا وكىلدەرى كولىك ماسەلەلەرى جونىندەگى ەۋروپالىق كوميسسيا كوميسسارى كابينەتىنىڭ باسشىسى ۆ. گەتتسپەن كەزدەستى.
كەزدەسۋ بارىسىندا تاراپتار ۇشۋ قاۋىپسىزدىگى, قازاقستان مەن ەۋرووداق ەلدەرى اراسىنداعى اۋە رەيستەرىن ۇلعايتۋ جانە اشۋ سىندى ماسەلەلەردى تالقىلادى.
سونىمەن قاتار باسقوسۋدا قازاقستان مەن ەۋرووداق اراسىنداعى اۋە قاتىناسى تۋرالى «دەڭگەيلەس كەلىسىم» نورمالارىن ەنگىزۋ دە نازارعا الىندى.
ەكىجاقتى ءتيىمدى ارىپتەستىككە نەگىزدەلگەن كەزدەسۋ سوڭىندا تاراپتار ىنتىماقتاستىقتى ودان ءارى دامىتۋ جۇمىسىن جالعاستىرۋعا ۋاعدالاستى.