2022 جىلدىڭ ءبىرىنشى توقسانىنىڭ قورىتىندىسى بويىنشا مەملەكەتتىك الەۋمەتتىك ساقتاندىرۋ قورىنان (بۇدان ءارى – ماسق) 59,2 مىڭ ايەل جۇكتىلىككە جانە بوسانۋعا, جاڭا تۋعان بالانى (بالالاردى) اسىراپ الۋعا بايلانىستى تابىسىنان ايىرىلعان جاعدايدا جالپى سوماسى 33,9 ملرد تەڭگەگە الەۋمەتتىك تولەم الدى, دەپ حابارلايدى Egemen.kz ەڭبەك جانە حالىقتى الەۋمەتتىك قورعاۋ مينيسترلىگىنىڭ باسپاسوز قىزمەتىنە سىلتەمە جاساپ.
1 جاسقا دەيىنگى بالا كۇتىمىنە بايلانىستى تابىسىنان ايىرىلعان جاعدايدا 42,6 ملرد تەڭگە سوماسىندا 423,5 مىڭ ادام الەۋمەتتىك تولەم الدى.
جۇكتىلىككە جانە بوسانۋعا بايلانىستى تابىسىنان ايىرىلعان جاعدايداعى الەۋمەتتىك تولەمنىڭ مولشەرى سوڭعى جىلداعى جۇمىس ىستەيتىن ايەل ءۇشىن ماسق-قا كەلىپ تۇسكەن الەۋمەتتىك اۋدارىمدار مەن ەڭبەككە قابىلەتسىزدىك كۇندەرىنىڭ سانىنا بايلانىستى بولادى.
ەكىنشى تولەمدى الۋدىڭ نەگىزگى شارتتارى – كىرىستى جوعالتۋ جانە بالا 1 جاسقا تولعانعا دەيىن ناقتى كۇتىم جاساۋ. تولەم مولشەرى بالانىڭ تۋعان كۇنىنە دەيىنگى سوڭعى 2 جىل ىشىندە ماسق-عا الەۋمەتتىك اۋدارىمدار تۇسكەن ورتاشا ايلىق تابىستىڭ 40% - ىن قۇرايدى. بۇل رەتتە وسى تولەمنىڭ ەڭ تومەنگى مولشەرى جۇمىس ىستەمەيتىن ايەلدەرگە تاعايىندالاتىن 1 جاسقا دەيىنگى بالا كۇتىمى جونىندەگى وسىعان ۇقساس اي سايىنعى مەملەكەتتىك جاردەماقىنىڭ مولشەرىنەن كەم بولماۋعا ءتيىس.
ەڭ جوعارى مولشەر ەڭ تومەنگى جالاقىنىڭ جەتى ەسەلەنگەن مولشەرىنىڭ 40% - ىنان اسپاۋى ءتيىس. الەۋمەتتىك تولەمدەردەن 10 % مىندەتتى زەينەتاقى جارنالارى ۇستالىنىپ, الەۋمەتتىك تولەم الۋشىنىڭ بىرىڭعاي جيناقتاۋشى زەينەتاقى قورىنداعى شوتىنا اۋدارىلادى.