پەتروپاۆلدا پوليتسەيلەر ساياجايلارداعى ءورتتى سوندىرۋگە كومەكتەستى, دەپ حابارلايدى Egemen.kz Polisia.kz-كە سىلتەمە جاساپ.
الەۋمەتتىك جەلى قولدانۋشىلارى زارەچنىي كەنتىندەگى ساياجايلاردا بولعان ءورتتى سوندىرۋگە كومەكتەسكەن پوليتسەيلەرگە العىستارىن بىلدىرگەن.
«رانەت» ساياجايشىلار قوعامداستىعىندا ورىن العان الاپات ءورت كەزىندە ءبىزدىڭ كوشەمىزدە ورنالاسقان 8 ساياجاي ۋچاسكەسىن وتتان امان الىپ قالۋعا كومەكتەسكەن ويقالا ۋچاسكەلىك پوليتسيا پۋنكتىندەگى پوليتسەيلەرگە العىس بىلدىرەمىز. ولار ءورت سوندىرۋشىلەر كەلگەنگە دەيىن قول استىنداعى زاتتارمەن ءورتتى اۋىزدىقتاۋعا كومەكتەستى, ءورت سوندىرۋشىلەر كەلگەننەن كەيىن باسقالارعا كومەك كورسەتۋگە كەتتى», دەيدى ساياجاي تۇرعىندارى.
ءورت 12 ءساۋىر كۇنى كەشكە 10 گەكتارعا جۋىق اۋماقتا ورىن العان. ساياجايداعى كوپتەگەن ءۇي-جايلار ورتكە وراندى.
شامامەن ساعات 16:30-دا №2 ۋچاسكەلىك پوليتسيا پۋنكتىنىڭ قىزمەتكەرلەرى بىلعارى زاۋىتى اۋدانىنداعى شاقىرتۋدان كەلە جاتىپ, ساياجايلار اۋماعىندا ءتۇتىندى بايقايدى. بۇل تۋرالى بىردەن كەزەكشى بولىمگە حابارلاپ, ءورت سوندىرۋشىلەر مەن ساياجايشىلارعا كومەك كورسەتكەن. كوپ ۇزاماي №2 ۋپپ ارىپتەستەرى جانە جاقىن ماڭدا ورنالاسقان بىرنەشە ۋچاسكەلىك پوليتسيا پۋنكتەرىنىڭ قىزمەتكەرلەرى كەلگەن.
پەتروپاۆل قالالىق پوليتسيا باسقارماسى پاترۋلدىك پوليتسيا باتالونىنىڭ قىزمەتكەرلەرى ادام شىعىنىن بولدىرماۋ ءۇشىن ساياجايشىلاردى قاۋىپسىز ارا قاشىقتىققا شىعارىپ, كۇزەتكە تۇرعان.
«تۇرعىنداردىڭ ءبىرى گاز بالونىن سىرتقا شىعارۋدى سۇرادى. ءبىز ۇيگە كىرىپ, قاۋىپتى زاتتى شىعاردىق. تاعى ءبىر ساياجايدا ءدال وسىنداي كومەك كورسەتتىك. ءورتتى سۋمەن, كۇرەكپەن سوندىردىك. كۇن جەلدى بولعانىمەن, بىرنەشە ءۇيدى ورتتەن امان الىپ قالدىق», دەدى №2 ۋچاسكەلىك پوليتسيا پۋنكتىنىڭ اعا ۋچاسكەلىك ينسپەكتورى تالاپ بايماقامبەتوۆ.