ىشكى ىستەر ورگاندارىنىڭ وندىرىسىندە قارجى پيراميدالارى بويىنشا 65 قىلمىستىق ءىس بار. بۇل تۋرالى بريفينگتە ءىىم تەرگەۋ دەپارتامەنتىنىڭ باستىعى سانجار ءادىلوۆ ءمالىم ەتتى, دەپ حابارلايدى Egemen.kz.
«2021 جىلى ەل بويىنشا قارجى پيراميدالارىنىڭ قۇرباندارى 31 مىڭنان استام ازامات بولدى, ولارعا 54 ملرد تەڭگەدەن استام سوماعا زالال كەلتىرىلدى. بۇگىنگى تاڭدا ىشكى ىستەر ورگاندارىنىڭ وندىرىسىندە وسى ساناتتاعى 65 قىلمىستىق ءىس تىركەلگەن, وندا 3 مىڭنان استام جابىرلەنۋشى بار», دەدى ءىىم تەرگەۋ دەپارتامەنتىنىڭ باستىعى سانجار ءادىلوۆ.
ول بۇگىنگى تاڭدا قارجى پيراميدالارى ءوزىن جوعارى تابىستى ينۆەستيتسيالار سالاسىنداعى تابىستى ۇيىمدار رەتىندە كورسەتىپ وتىراتىنىن ەسكە سالدى.
وزدەرىنىڭ جارنامالىق كامپانيالارىندا ولار «يننوۆاتسيالىق جوبا», «جوعارى تابىستى بيزنەس», «بىرەگەي», «اسا ءتيىمدى», «تابىسقا كەپىلدىك بەرەمىز» دەگەن سوزدەردى پايدالانادى.
ونىڭ ايتۋىنشا, الاياقتار زاڭدى ميكروقارجىلىق ۇيىمدارمەن, بۋكمەكەرلىك كەڭسەلەرمەن, تۇتىنۋ كووپەراتيۆتەرىنىڭ تۇسىندا جاسىرىنادى. قارجى پيراميدالارىن ۇيىمداستىرۋشىلار الەۋمەتتىك جەلىلەردە بەلسەندى جۇمىس جۇرگىزىپ, ونلاين-تابىس نەمەسە جوعارى تابىستى ونلاين-جوبانى ۇسىنادى, تانىمال مەسسەندجەرلەردە چاتتار قۇرىپ, قاتىسۋشىلاردى ءتۇرلى ۇتىس ويىندارىمەن, ساۋالنامالارمەن جانە باسقا دا ماركەتينگتىك امالدارمەن تارتادى.
تەرگەۋ دەپارتامەنتىنىڭ باسشىسى قارجى پيراميدالارىنا قارسى ءىس-قيمىل بويىنشا پوليتسيانىڭ قىزمەتى قارجى مونيتورينگى اگەنتتىگىمەن تىعىز ىنتىماقتاستىقتا جۇزەگە اسىرىلاتىنىن ەسكە سالدى.
«قابىلدانعان شارالار ناتيجەسىندە, ونىڭ ىشىندە سايتتاردى بۇعاتتاۋ, ۇيىمداستىرۋشىلاردى, فيليالداردى, قۇرىلىمدىق بولىمشەلەردى ورناتۋ بويىنشا 180-نەن استام قارجىلىق ينۆەستيتسيالىق كومپانيالار مەن فيرمالاردىڭ قىزمەتى توقتاتىلدى. 2021 جانە 2022 جىلدارى 138 ادام قىلمىستىق جاۋاپكەرشىلىككە تارتىلدى, ولاردىڭ 50-ءى سوتتالدى, قالعاندارىنا قاتىستى سوت تالقىلاۋى ءجۇرىپ جاتىر. سوتقا دەيىنگى تەرگەۋ بارىسىندا جالپى سوماسى 3 ملرد تەڭگەدەن اساتىن اقشا قاراجاتىنا, جىلجىمالى جانە جىلجىمايتىن م ۇلىككە تىيىم سالىندى», دەپ تۇيىندەدى سانجار ءادىلوۆ.