«قازتسينك» كاسىپورنى شىعىس قازاقستان وبلىسىنداعى ريددەر قالاسىندا بولعان وقيعانىڭ سالدارىنا بايلانىستى تۇرعىندار شىعىنىن وتەۋگە ۋادە بەردى. بۇل تۋرالى Egemen.kz ءتىلشىسى حابارلادى.
ريددەر قالاسىندا «قازتسينك» كومپانياسىمەن ەنشىلەس «Altyn Tau-Vostok» جشس-ىنە قاراستى جەر استى كەنىشتەرى ءبىرىنىڭ بەتى وپىرىلىپ ءتۇسىپ كەتتى. ريددەر شاھارىنىڭ ورتالىعىنان ءۇش شاقىرىم جەردە ورىن العان وقيعا ورنىندا تەرەڭدىگى – 30, ديامەترى 70 مەتردى قۇرايتىن ۇلكەن قازانشۇڭقىر پايدا بولدى. بۋراباي كوشەسىندەگى №5 جەكە ءۇي اتالعان قازانشۇڭقىرعا ءتۇسىپ كەتكەن. تۇرعىندار ۇيدەن دەر ۋاقىتىندا شىعىپ ۇلگەردى.
اناستاسيا تاتارنيكوۆا ومىراۋداعى سابيىمەن ۇيدە وتىرىپ, تابانىنىڭ استى دىرىلدەگەنىن سەزگەن سوڭ دالاعا شىققان ەكەن. قورىققان جاس انا سىرتقا شىققاندا, ءۇيىنىڭ ءبىر شەتى قازانشۇڭقىرعا ءىلىنىپ تۇرعانىن بايقاعان. سالدەن سوڭ ءۇي وپىرىلىپ تۇسكەن جەر قىرتىسىمەن بىرگە اپانعا اۋناپ تۇسكەن. بۇل ارالىقتا اناستاسيا ۇيدەگى قىزى مەن قاجەتتى قۇجاتتارىن الىپ ۇلگەرىپتى.
ريددەر-سوكولنىي كەنىشىندە ورىن العان توتەنشە جاعدايعا بايلانىستى جۇمىس توقتاتىلىپ, 480 كەنشى جەر بەتىنە شىعارىلدى. ابىروي بولعاندا, وقيعا ورنىندا قايتىس بولعاندار مەن زارداپ شەككەندەر جوق. دەگەنمەن, 500 مەتر راديۋستا ورنالاسقان ۇيلەردىڭ بارلىعى قورشاۋعا الىنىپ, 173 تۇرعىن كوشىرىلدى. ونىڭ ىشىندە 60 ادام «قازتسينك» جشس ەمحاناسىنا جاتقىزىلىپ, قالعانى «سينەگورە» دەمالىس بازاسىنا ورنالاستىرىلدى. ولارعا ىستىق تاماق, پسيحولوگيالىق كومەك بەرۋ جانە مەديتسينالىق كەزەكشىلىك ۇيىمداستىرۋ جۇمىستارىمەن اتالعان كاسىپورىن شۇعىلدانىپ جاتىر.
وبلىستىق توتەنشە جاعدايلار جونىندەگى دەپارتامەنت وكىلدەرىنىڭ مالىمەتى بويىنشا, قازانشۇڭقىر ەرنەۋىنىڭ ديامەترى تاعى 5 مەترگە دەيىن كەڭەيگەن. وقيعا ورنىندا تاۋدا قۇتقارۋشىلار اسكەري جاساعى, قالالىق ىشكى ىستەر باسقارماسى, قالالىق سۋ ارناسى, جىلۋ-ەلەكتر ورتالىعى جانە تاعى باسقا قىزمەت وكىلدەرى جۇمىس ىستەۋدە. اتالعان شاحتانىڭ يەسى سانالاتىن «قازتسينك» كاسىپورنىنىڭ باسشىلىعى تۇرعىنداردىڭ بارلىق شىعىندارىن كوتەرىپ الۋعا, ولارعا وتەماقى تولەۋگە ۋادە بەرىپ وتىر.
ال وبلىستىق توتەنشە جاعدايلار دەپارتامەنتىنىڭ ءباسپاسوز قىزمەتى ءۇيدىڭ قيراۋى مەن الىپ قازانشۇڭقىردىڭ پايدا بولۋىنا كەن كامەرالارىنىڭ بىرىندەگى شاتىردىڭ قۇلاۋى سەبەپ بولعانىن جەتكىزدى.
وقيعا ورنىندا وبلىستىق پروكۋراتۋرا قىزمەتكەرلەرى تەكسەرۋ جۇمىستارىن جۇرگىزۋدە. ريددەر قالاسىنىڭ پروكۋراتۋراسى تۇرعىن ءۇيدى جۇتىپ قويعان اپانداي قازانشۇڭقىردىڭ پايدا بولۋىنا بايلانىستى قازاقستان رەسپۋبليكاسى قىلمىستىق كودەكسى 245-بابىنىڭ 2 تارماعى بويىنشا قىلمىستىق ءىس قوزعادى. سونداي-اق تەحنوگەندىك اپاتقا بايلانىستى قالادا توتەنشە جاعداي جاريالاندى. ونەركاسىپتىك قالاعا جاتاتىن ريددەردەگى جاعدايدى وبلىس باسشىلارى باقىلاۋعا الىپ, جەرگىلىكتى حالىققا قاجەتتى كومەكپەن قامتاماسىز ەتۋ جۇمىستارىن جالعاستىرۋدا. وقيعا ورنىندا وبلىستىڭ جەدەل شتابى قۇرىلىپ, وبلىس اكىمىنىڭ ورىنباسارى نۇرىمبەت ساقتاعانوۆ تابيعي اپاتتىڭ سالدارىن جويۋ جانە ءارى قارايعى ءىس-ارەكەت جوسپارىن انىقتاۋ ماقساتىندا جەدەل جيىن وتكىزدى.
قازىرگى كەزدە جەر بەتىنىڭ تاعى دا وپىرىلىپ تۇسۋىنەن ساقتانۋ شارالارى جۇرگىزىلىپ جاتىر.سونداي-اق قالىپتاسقان جاعدايعا بايلانىىستى ريددەردەگى كوپقاباتتى ۇيلەردىڭ تۇرعىندارىن دا مازاسىزدىق بيلەگەن. الايدا «قازتسينك» جشس وكىلدەرىنىڭ ايتۋىنشا, كوپقاباتتى سەكتوردا جەراستى ۇڭگۋ جۇمىستارى جۇرگىزىلمەگەن. كاسىپورىننىڭ باس كەنشىسى ۆالەري زاۆيالوۆ جەر استىنداعى ۇڭگۋ جۇمىستارى نەگىزىنەن قالانىڭ ەسكى اۋدانىنا جاتاتىن جەكە تۇرعىن ءۇي سەكتورى, بوتانيكا, «قازتسينك» پروفيلاكتورياسى, ەسكى بازار اۋماعىندا جۇرگىزىلگەنىن ايتادى.
دۋمان اناش.
ريددەر.
دەرەككوز: Egemen.kz.
فوتو: اۆتور