ءىىم جىل باسىنان بەرى رەسپۋبليكا اۋماعىندا نۇر-سۇلتان, الماتى قالالارىندا, الماتى, اقتوبە جانە شىعىس قازاقستان وبلىستارىندا 8 ەسىرتكى زەرتحاناسىن جويدى, دەپ حابارلايدى Egemen.kz.
ءىىم ەسىرتكى قىلمىسىنا قارسى ءىس-قيمىل دەپارتامەنتى باستىعىنىڭ مىندەتىن اتقارۋشى اسقار مۇحامەتقاليەۆتىڭ ايتۋىنشا, ەسىرتكىگە قارسى زاڭناماعا وزگەرىستەر ەنگىزىلگەلى سينتەتيكالىق ەسىرتكىلەردىڭ جاڭا بۋىنىن انىقتاۋ جاندانعان. وسىلايشا ەسىرتكىنىڭ جاڭا تۇرلەرى اينالىمىنا باقىلاۋ ورناتۋ جەڭىلدەدى.
Polisia.kz-ءتىڭ حاباراۋىنشا, وسى تۇزەتۋلەر قابىلدانعان ساتتەن باستاپ باقىلاۋداعى تىزىمدەرگە وسىنداي 115 زات ەنگىزىلدى. زاڭناماعا تۇزەتۋلەر قابىلدانعان ساتتەن باستاپ (2019 ج.) ىشكى ىستەر ورگاندارى 182 كەلى سينتەتيكا تاركىلەپ, 35 ەسىرتكى زەرتحاناسىن جويدى.
2022 جىلى رەسپۋبليكا بويىنشا نۇر-سۇلتان, الماتى قالالارىندا, الماتى, اقتوبە جانە شىعىس قازاقستان وبلىستارىندا 8 ەسىرتكى زەرتحاناسى جويىلدى.
قولدانۋعا دايىن 33 كەلىدەن استام ەسىرتكى, ونىڭ ىشىندە 14 كەلىدەن استام سينتەتيكالىق ەسىرتكى, 19 كەلى قاراسورا جانە 165 ليتر پرەكۋرسور – ەسىرتكى وندىرۋگە قاجەتتى زاتتار تاركىلەندى.
زەرتحانالار ۇيىمداستىرعانى ءۇشىن 16 ادام ۇستالدى. وسىلايشا تەك نۇر-سۇلتاندا جىل باسىنان بەرى ءۇش جاسىرىن ەسىرتكى ءوندىرىسى جويىلدى.