قازاقستان رەسپۋبليكاسى مەن پولشا رەسپۋبليكاسى اراسىنداعى ديپلوماتيالىق قارىم-قاتىناستىڭ ورناعانىنا 30 جىل تولدى.
ايتۋلى وقيعاعا وراي ەكى مەملەكەتتىڭ باسشىلارى قاسىم-جومارت توقاەۆ پەن اندجەي دۋدا, سونداي-اق قازاقستاننىڭ سىرتقى ىستەر ءمينيسترى مۇحتار تىلەۋبەردى مەن پولشانىڭ سىرتقى ىستەر ءمينيسترى زبيگنەۆ راۋ ءوزارا قۇتتىقتاۋ حاتتارمەن الماستى.
نۇر-سۇلتان مەن ۆارشاۆادا مەرەيتويلىق كۇنگە وراي قازاقستان مەن پولشانىڭ سىرتقى ىستەر مينيسترلىكتەرىندە رەسمي كەزدەسۋلەر ءوتتى. قازاقستان سىرتقى ىستەر ءمينيسترىنىڭ ورىنباسارى رومان ۆاسيلەنكو پولشا ەلشىسى سەليم حازبيەۆيچتى, ال پولشا سىرتقى ىستەر ءمينيسترىنىڭ ورىنباسارى مارچين پشيداچ قازاقستان ەلشىسى ءالىم قيراباەۆتى قابىلدادى.
«تاريحي تۇرعىدان وسىنداي قىسقا مەرزىم ىشىندە ەكى ەل اراسىنداعى ارىپتەستىك جىلدان-جىلعا نىعايىپ جانە جان-جاقتى كەڭەيىپ, بۇگىندە بيىك دەڭگەيگە جەتتى. بۇعان ەكىجاقتى جانە كوپجاقتى فورماتتاعى ءوزارا قولداۋمەن قاتار, جاھاندىق سىن-تەگەۋرىندەر اياسىنداعى كۇردەلى ساتتەردە كورىنىس تاپقان ءوزارا كومەك پەن ىنتىماقتاستىق دالەل بولىپ تابىلادى», دەپ اتاپ ءوتتى ر.ۆاسيلەنكو.
قازاقستاندىق ديپلومات ۋكراينادا اسكەري ءىس-قيمىلدار باستالعاننان بەرى پولشا ۇكىمەتىنىڭ قازاقستان ازاماتتارىن ەلگە قايتارۋ ءۇشىن كورسەتكەن زور كومەگىنە العىس ءبىلدىردى. اتاپ ايتقاندا, پولشانىڭ كاتوۆيتسە قالاسىنداعى اۋەجايىنان جەتى ەۆاكۋاتسيالىق رەيس ۇيىمداستىرىلىپ, جالپى العاندا 700-دەن استام ادام قازاقستانعا ورالدى.
ديپلوماتتار الداعى جىلدارى جان-جاقتى ىنتىماقتاستىق ساياسي, ساۋدا-ەكونوميكالىق جانە مادەني-گۋمانيتارلىق سالالاردا ودان ءارى كەڭەيە بەرەتىنىنە سەنىم ءبىلدىردى. ەكى ەل اراسىندا جوعارى جانە ۇكىمەتتىك دەڭگەيدە تۇراقتى بايلانىستار ورناتىلعانىن, سونداي-اق پارلامەنتارالىق ديالوگتىڭ قارقىندى دامۋ سەرپىنىن اتاپ ءوتتى.
تاراپتار ساۋدا-ەكونوميكالىق جانە ينۆەستيتسيالىق بايلانىسقا ەرەكشە توقتالدى. پولشا – قازاقستاننىڭ ەۋروپالىق وداق ەلدەرى اراسىنداعى سەگىزىنشى ەڭ ءىرى ساۋدا ارىپتەسى. 2021 جىلى ەكى ەل اراسىنداعى تاۋار اينالىمى 760,4 ملن دوللار بولعان, ال 2005-2021 جىلدار ارالىعىندا پولشادان قازاقستان ەكونوميكاسىنا تارتىلعان تىكەلەي ينۆەستيتسيالاردىڭ كولەمى 272,6 ملن دوللارعا جەتكەن.
قازاقستان مەن پولشا اراسىندا ەنەرگەتيكا, جاسىل تەحنولوگيا, كولىك جانە لوگيستيكا, ەلەكتروندى ساۋدا, قارجى تەحنولوگيالارى, تۋريزم, اگروونەركاسىپتىك كەشەن سياقتى سالالاردا بىرلەسكەن پەرسپەكتيۆالىق جوبالاردى دامىتۋدا الەۋەت بارى ايتىلدى.