اقش-تىڭ بۇرىنعى پرەزيدەنتى, كىشى دجوردج بۋش كوپشىلىككە ءبىرىنشى رەت ءوزىنىڭ الەم ەلدەرى ليدەرلەرىن سالعان سۋرەتتەرىن كورسەتتى. بۇل تۋرالى يتار-تاسس حابارلادى.
دجوردج بۋش بۇل كاسىپپەن كوپتەن بەرى اينالىسىپ كەلە جاتقانعا ۇقسايدى. ول ءوزىنىڭ گالەرەياسىنا سوڭعى كەزدەرى رەسەي پرەزيدەنتى ۆلاديمير پۋتين مەن ۇلىبريتانيانىڭ ەكس-پرەمەرى توني بلەردى قوسىپتى. وسى پورترەتتەرىنىڭ ءبىرازىن NBC تەلەارناسىنان كورسەتە وتىرىپ, ول تىلشىگە سۇحبات بەرگەن.
كىشى بۋش ءوزىنىڭ سوزىندە ۆلاديمير پۋتين جونىندە دە باعا بەرە كەتىپتى. «مەن پرەزيدەنت بولىپ تۇرعان كەزىمدە پۋتينمەن تالاي رەت كەزدەستىم, مەن ونى وتە جاقسى بىلەمىن», - دەدى ول.
«ءبىزدىڭ ءوزارا قارىم-قاتىناسىمىز قاشاننان جاقسى بولدى. اراسىندا كيكىلجىڭگە كەلىپ قالعان كەزدەرىمىز دە كەزدەستى», - دەپ اتاپ ءوتتى بۋش.
پورترەتتە رەسەي پرەزيدەنتى انفاستان الىنعان, جۇقا پاستەلمەن سالىنعان, بوياۋلارى قالىڭ.
ءوزىنىڭ ءحوببيى تۋرالى ايتقاندا, بۋش: «مەن ءوزىمنىڭ كەيىنگى ءومىرىمنىڭ ءماندى بولعانىن قالادىم. سۋرەت سالۋ ماعان سانا-سەزىمىمدى كەڭەيتۋگە كومەكتەسەدى», - دەدى. «مەن ۇلى سۋرەتشىلەردىڭ ساناتىنا جاتپايمىن, - دەدى ول تاعى. – جۇرتتىڭ دا ءوزىمدى ولاي قابىلداماعانىن قالايمىن».
اق ءۇيدىڭ بۇرىنعى قوجايىنىنىڭ وسى جانە باسقا دا پولوتنولار تەحاس شتاتىنىڭ داللاس قالاسىنداعى كىشى بۋش اتىنداعى پرەزيدەنت ورتالىعىنا قويىلعان. بۇل كورمە بۇگىن, سەنبى كۇنى اشىلادى. ونىڭ ەكسپوزيتسياسىنا گفر كانتسلەرى انگەلا مەركەل, اۋعانستان پرەزيدەنتى حاميد كارزاي, يتاليانىڭ ەكس-پرەمەرى سيلۆيو بەرلۋسكوني جانە باسقالار بار.
كىشى دجوردج بۋش كەسكىندەمە ونەرىمەن 2009 جىلى پرەزيدەنتتىكتەن كەتكەننەن كەيىن شۇعىلدانا باستاپتى.
مۇرات ايتقوجا.
دەرەككوز: يتار-تاسس.
فوتو: يتار-تاسس.