«جانىڭدا ءجۇر جاقسى ادام» دەمەكشى, ءبىزدىڭ قوعامدا تىنىمسىز ەڭبەگىمەن, ۇلگىلى تاربيەسىمەن ءوز ورتاسىنا سىيلى بولىپ, ەلىمىزگە ادال قىزمەت جاساپ جۇرگەن زامانداستارىمىز از ەمەس. سونداي جاننىڭ ءبىرى – جاس ۇرپاقتىڭ ساناسىنا ءبىلىم ءنارىن بەرگەن, جانىنا شۋاق سىيلاپ جۇرگەن ۇستاز گۇلجاۋھار بولاتوۆا.
ول كوكشەتاۋ وڭىرىندە دۇنيەگە كەلگەن. جاسىنان اسىل اجەسىنىڭ تاربيەسىن الىپ, قازاق ءتىلىنىڭ قاينار بۇلاعىنان سۋسىنداپ وسكەن. قازاق مەملەكەتتىك ۋنيۆەرسيتەتىنىڭ فيلولوگيا فاكۋلتەتىن ۇزدىك ديپلوممەن تامامداعان.
ۇستازدىق جولدى قالاي تاڭداعانى تۋرالى گۇلجاۋھاردىڭ ءوزى: «ول كەزدە ۇستازعا دەگەن كوزقاراس وتە جاقسى بولدى, ۇستاز – مارتەبەلى ماماندىق. وتباسىمىزدىڭ دا ۇستازعا دەگەن قۇرمەتى ەرەكشە ەدى. بالا كەزىمىزدە اتا-انامىز وزىمىزگە ساباق بەرەتىن ۇستازدارىمىزدى ىلعي ۇلگى ەتىپ وتىراتىن. ويىن ويناعاندا دا ۇستاز بولىپ ويناۋعا ءۇيىر ەدىك. ونىڭ بەر جاعىندا كەڭەستىك كەزەڭدە ۇستازدىق ەتۋدە بىلىكتىلىگىن تانىتىپ, بيىك بەلەستەرگە كوتەرىلگەن ءبىرتالاي ازاماتتاردى كورىپ وسكەندىكتەن, ۇستاز بولىپ, بالا وقىتۋ مەنىڭ ارمانىما اينالدى», دەيدى.
ەڭبەك جولىن 1983 جىلى مەكتەپتە مۇعالىم بولۋدان باستاعان. 1989 جىلى اسپيرانتۋراعا قابىلدانعانعا دەيىن ش.ءۋاليحانوۆ اتىنداعى كوكشەتاۋ پەدينستيتۋتىنىڭ وقىتۋشىسى بولىپ قىزمەت ىستەدى. 1992 جىلى جەلتوقسان ايىندا اسپيرانتۋرانى بىتىرگەننەن كەيىن قازاق مەملەكەتتىك ساۋلەت-قۇرىلىس اكادەمياسىندا قازاق ءتىلى كافەدراسىنىڭ اعا وقىتۋشى, سوڭىنان دوتسەنت بولعان. 1997 جىلدان بەرى استانا قالاسىنداعى ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىندە بولاشاق جۋرناليستەرگە ءدارىس بەرەدى. 2011 جىلدىڭ 20 ماۋسىمىنان جۋرناليستيكا جانە ساياساتتانۋ فاكۋلتەتى دەكانىنىڭ ستۋدەنتتەرمەن جۇمىس جونىندەگى ورىنباسارى قىزمەتىن اتقارىپ كەلەدى.
فيلولوگيا عىلىمدارىنىڭ كانديداتى, دوتسەنت گ.ج.بولاتوۆا – ءبىرنەشە عىلىمي, وقۋ-ادىستەمەلىك ەڭبەكتەردىڭ اۆتورى. سونىڭ ىشىندە «سالت-جىرلارىنداعى تاربيەلىك ءۇردىستەر» (سيپاتتاما جانە ادەبي ۇلگىلەر), «بارلىق ماماندىقتاعى ستۋدەنتتەرگە ارنالعان قازاق تىلىنەن باقىلاۋ جۇمىسى», «وتاندىق جۋرناليستيكا تاريحى» كۋرسى بويىنشا وقۋ باعدارلاماسى, «ءدىن جانە ونىڭ باسپاسوزدەگى كورىنىسى» ارناۋلى كۋرسى بويىنشا وقۋ باعدارلاماسى, «سوعىس جىلدارىنداعى مەرزىمدى باسپاسوزدەگى «وتاندى قورعاۋدا» گازەتىنىڭ ورنى», «ايقاپ» جۋرنالىندا ادەبي ماتەريالداردىڭ بەرىلۋى», «قازاق جاۋىنگەرلەرىن وتانسۇيگىشتىك رۋحىندا تاربيەلەۋدە مايداندىق باسىلىمداردىڭ ءرولى» سياقتى نەگىزگى عىلىمي ەڭبەكتەرىن اتاپ وتكەنىمىز ءجون.
ۇستازعا «قازىر تالاپ جوعارى, باسەكەلەستىك كۇشتى. وسى ورايدا, ءححى عاسىردىڭ جۋرناليستەرىن قالىپتاستىرۋدىڭ جولدارى قانداي؟» دەگەن ساۋال قويعانىمىزدا, ول جۋرناليستيكا ماماندىعىنا كەزدەيسوق ادامدار وقۋعا تۇسە المايتىنىن, بويىندا تابيعي دارىنى بولماسا, نەشە جەردەن وقىتسا دا, ول ادامنان جۋرناليست شىقپايتىنىن جەتكىزدى.
ۇستازدىڭ ايتۋىنشا, بىلىكتى باسشى ەرلان سىدىقوۆ باسقارىپ وتىرعان ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ جۋرناليستيكا جانە ساياساتتانۋ فاكۋلتەتىندە بولاشاق ماماندار دايارلاۋ ءۇشىن بارلىق جاعداي جاسالعان. ولاردى جوعارى بىلىكتى ماماندار ءبىلىم نارىمەن سۋسىنداتۋدا. بۇگىندە ستۋدەنتتەرگە ماماندىقتىڭ قىر-سىرىن ۇيرەتۋ ءۇشىن باق-تىڭ باسشىلارى, كاسىبي ماماندارى تارتىلعان.
«بۇل ورايدا, الەم جۋرناليستيكاسى تەك جاھاندىق جاڭالىقتاردى حالىققا جەتكىزۋدەن عانا تۇرمايتىنى انىق. ەكونوميكالىق دامۋ جاعىنان الدەقايدا وزىپ كەتكەن الەم ەلدەرىنىڭ قاتارىنا قوسىلۋ – ەلباسىمىز ن.نازارباەۆتىڭ العا قويعان ماقساتى وتكەن جىلعى جانە بيىلعى ءداستۇرلى جولداۋلارىندا بارىنشا ايقىن كورىنىس تاپتى. ارينە, جۋرناليستيكانىڭ دا كوتەرەتىن جۇگى اۋقىمدى ەكەنى تۇسىنىكتى. فاكۋلتەت دەكانى قايرات ساقتىڭ باستاماسىمەن حالىقارالىق دەڭگەيدە بەلگىلى عالىمدار شاقىرىپ, سەمينار, ترەنينگتەر وتكىزىپ جاتىرمىز», دەيدى گۇلجاۋھار جامبىلقىزى.
ۇستاز ءوزى تاربيەلەگەن شاكىرتتەرىنىڭ بويىندا ەڭ اسىل قاسيەتتەردىڭ بولعانىن قالايدى. ولار جوعارى وقۋ ورنىن بىتىرگەندە دايىن مامان بولىپ شىعۋلارى كەرەك. وسى جولدا شاكىرتتەر ۋاقىتتارىن بوسقا جوعالتپاي, بەرىلگەن مۇمكىندىكتى ءتيىمدى پايدالانىپ, ءوزىن جان-جاقتى دامىعان تۇلەك رەتىندە تانىتۋعا كۇش سالۋلارى كەرەك. «وعان ءبىزدىڭ ءبىلىم وردامىزدا بارلىق جاعداي جاسالعان. قاي قوعام بولماسىن, ءوز ءىسىنىڭ شەبەرى عانا ەمەس, سونداي-اق سالت-ءداستۇرىن, ءتىلىن قۇرمەتتەيتىن, دوسقا ادال, ىزەتتى, يبالى, ادامگەرشىلىگى مول, ۇلكەندەردى سىيلايتىن, مادەنيەتتى, رۋحاني جاعىنان تولىسقان ادامداردى قاجەت ەتەتىنى ءسوزسىز. مەن دە بارلىق شاكىرتتەرىمنىڭ بويىنا وسى قاسيەتتەر دارىسا دەپ تىلەيمىن», دەيدى گ. بولاتوۆا.
ايباتىر سەيتاق,
جۋرناليست.
استانا.