ءماجىلىس توراعاسى قابيبوللا جاقىپوۆتىڭ باسقارۋىمەن پالاتا بيۋروسى ءوتتى. وندا الداعى وتەتىن دەپۋتاتتاردىڭ جالپى وتىرىسىندا قارالاتىن ماسەلەلەر ناقتىلاندى, دەپ حابارلادى ءماجىلىستىڭ ءباسپاسوز قىزمەتى.
دەپۋتاتتاردىڭ تالقىلاۋىنا قىلمىستىق كودەكس جوباسى ىلەسپە تۇزەتۋلەرىمەن ەكىنشى وقىلىمعا شىعارىلاتىن بولدى. پالاتانىڭ سالالىق كوميتەتىنىڭ ءمالىمدەۋىنشە, كودەكستىڭ جاڭا رەداكتسياسى قازاقستان پرەزيدەنتىنىڭ تاپسىرماسىمەن 2012 جىلعى 6 قاڭتاردا 2010-2020 جىلدارعا ارنالعان قۇقىقتىق ساياسات تۇجىرىمداماسىنىڭ ەرەجەلەرىن, جانە دە مەملەكەتتەردىڭ حالىقارالىق مىندەتتەمەلەرىن ىسكە اسىرۋ قاجەتتىلىگىن ەسكەرە وتىرىپ جاسالعان.
بۇل اكتىنىڭ ىسكە اسىرىلاتىن تۇجىرىمدامالىق باعىتتارى, ءبىر جاعىنان, ءبىرىنشى رەت جاسالعان نەمەسە الەۋمەتتىك ءالسىز تۇلعالار جاساعان قىلمىستارعا قاتىستى تاعاتتىلىق تاسىلدەرىن كەڭەيتەدى, ەكىنشى جاعىنان, اۋىر قىلمىستارعا, قىلمىستىڭ قايتالانۋىنا, ۇيىمداسقان قىلمىسكەرلىككە جانە سوت تورەلىگىنە كەدەرگى جاساۋعا دەن قويۋدى قاتاڭداتادى.
بيۋرو مۇشەلەرى, سولارمەن بىرگە, الەۋمەتتىك-مادەني دامۋ كوميتەتىنىڭ سولتۇستىك قازاقستان وبلىسىندا كوشپەلى وتىرىسىن وتكىزۋ تۋرالى (2014 جىلعى 14-15 ءساۋىر) ۇسىنىستارىن دا قولدادى.
سونداي-اق, وتىرىستا الداعى مامىر ايىندا بولاتىن «ەكونوميكا سالالارى ءۇشىن تەحنيكالىق جانە كاسىپتىك, جوعارى ءبىلىم بەرۋ جۇيەسىندە كادرلار دايارلاۋدىڭ ساپاسى مەن پەرسپەكتيۆالارى تۋرالى» پارلامەنتتىك تىڭداۋدىڭ ۇيىمداستىرىلۋ ماسەلەلەرى دە قاراستىرىلدى.
ءماجىلىس توراعاسى ق.جاقىپوۆ سالالىق كوميتەتتەرگە جالپى وتىرىسقا شىعارىلاتىن زاڭ جوباسىنا ازىرلىكتى جان-جاقتى ءجۇرگىزۋدى تاپسىردى.