كەشە قازاقستان رەسپۋبليكاسى سىرتقى ىستەر ءمينيسترىنىڭ مىندەتىن اتقارۋشى ەرلان ىدىرىسوۆتىڭ رەسەي فەدەراتسياسىنا رەسمي ساپارى باستالدى. ساپار ەكى ەل پرەزيدەنتتەرىنىڭ اراسىندا قول جەتكىزىلگەن ستراتەگيالىق كەلىسىمدەردى ىسكە اسىرۋعا باعىتتالعان قازاقستان مەن رەسەي سىرتقى ساياسات ۆەدومستۆولارى باسشىلارىنىڭ جىل سايىنعى ءوزارا ساپار الماسۋ ءداستۇرى اياسىندا وتۋدە, دەپ حابارلادى قر ءسىم-ءىنىڭ ءباسپاسوز قىزمەتى.
ساپار بارىسىندا قازاقستاندىق دەلەگاتسيا مەن رەسەي سىرتقى ىستەر ءمينيسترى سەرگەي لاۆروۆ باستاعان رەسەيلىك دەلەگاتسيا اراسىندا شاعىن جانە كەڭەيتىلگەن قۇرامداردا تولىقپىشىندى كەلىسسوزدەر ءجۇردى. تاراپتار ساياسي, ساۋدا-ەكونوميكالىق ءجانە مادەني-گۋمانيتارلىق سالالارداعى قازاقستان-رەسەي ىنتىماقتاستىعىنىڭ قازىرگى جاعدايى مەن بولاشاعىن تالقىعا سالدى, سونداي-اق, حالىقارالىق كۇن تارتىبىندەگى كەڭ اۋقىمدى ماسەلەلەر بويىنشا پىكىر الماستى.
ايماقارالىق جانە شەكارالىق ىنتىماقتاستىقتى نىعايتۋ بويىنشا ناقتى قادامدارعا, عارىش, ەنەرگەتيكا جانە كولىك-كوممۋنيكاتسيا سالالارىندا ءوزارا ىقپالداستىقتى كەڭەيتۋگە, سونىمەن قاتار, 2012 جىلعى 19 جەلتوقسان كۇنى ەكى ەلدىڭ پرەزيدەنتتەرى بەكىتكەن 2013-2015 جىلدارعا ارنالعان بىرلەسكەن ءىس-قيمىل جوسپارىن ءتيىمدى ىسكە اسىرۋ ماسەلەلەرىنە ەرەكشە نازار اۋدارىلدى.
سونىمەن قاتار, سىرتقى ساياسات ۆەدومستۆولارىنىڭ باسشىلارى حالىقارالىق بىرلەستىكتەر اياسىنداعى, سونىڭ ىشىندە تمد, ۇقشۇ, ەقىۇ, شىۇ, اوسشك جانە بۇۇ شەڭبەرىندەگى ءوزارا ىقپالداستىق ماسەلەلەرىن, ورتالىق ازيا وڭىرىندە تۇراقتىلىق پەن قاۋىپسىزدىكتى قامتاماسىز ەتۋ ماسەلەلەرىن قاراستىرىپ, كاسپي ماسەلەسى بويىنشا پىكىر الماستى.
ە.ىدىرىسوۆ پەن س.لاۆروۆ ۋكرايناداعى جاعداي مەن بۇل ەلدەگى داعدارىستى رەتتەۋ جولدارىن كەڭىنەن تالقىعا سالدى.
كەلىسسوزدەر قورىتىندىسى بويىنشا قازاقستان مەن رەسەي سىرتقى ساياسات ۆەدومستۆولارى اراسىنداعى 2014 جىلعا ارنالعان ءوزارا ىنتىماقتاسۋ جونىندەگى ءىس-شارالار جوسپارىنا قول قويىلدى. ونىڭ جۇزەگە اسۋى قازاقستان مەن رەسەي اراسىنداعى ارىپتەستىك جانە وداقتاستىق قارىم-قاتىناستىڭ تەرەڭدەۋىنە مۇمكىندىك بەرەدى.
ە.ىدىرىسوۆ ءوزىنىڭ ماسكەۋگە ساپارى اياسىندا تمد-عا جانە ۇقشۇ-عا قاتىسۋشى ەلدەر سىرتقى ىستەر مينيسترلەرىنىڭ كەڭەسىنە قاتىساتىن بولادى.