ءبىزدىڭ «ستراتەگيا-2050-دەگى» باستى ماقساتتارعا جەتۋدى كوزدەيتىن بارلىق ءىس-ارەكەتتەرىمىز ناقتى قاعيداتتارعا نەگىزدەلۋگە ءتيىس.
ن.ءا.نازارباەۆ.
_______________
پرەزيدەنتىمىز ن.ءا.نازارباەۆتىڭ جولداۋىن كۇندە وقيتىن باعىت-باعدارىمىزعا اينالدىردىق. جولداۋ ءاربىر جانعا مازمۇندىلىعىمەن, ناقتىلىعىمەن ايرىقشا اسەرى بولدى عوي دەپ ويلايمىن.
ءيا, كسرو-نىڭ كۇيرەۋىنەن كەيىن, 1997 جىلدان باستاپ, مەملەكەتىمىزدىڭ ەگەمەندىگى باقىتىن باياندى ەتۋ جولىندا پرەزيدەنتىمىز ن.ءا.نازارباەۆ جىلما-جىل حالىققا جولداۋىن ارناپ كەلەدى. ءاربىر جولداۋ جاس مەملەكەتىمىزدىڭ ۇدەمەلى دامۋىنا باستى دا ناقتى جوسپارلار مەن باعدارلامالاردىڭ ورىندالۋىنا سەرپىن تۋعىزار لەپ بەرۋدە.
باسىنا قونعان باقتى ونىڭ قادىرىنە جەتەتىن جاندار عانا باعالايتىندىعى ءسوزسىز. سول باقىتتىڭ قازاق حالقىنا قونعانىنا بۇگىندە 22 جىل بولدى. ونى ۇشىرىپ الماۋ ءبىزدىڭ ەنشىمىزدە.
مەملەكەت ىرگەتاسىنىڭ نىق تا بەرىك قالانۋى ءۇشىن ەلباسى حالقىمىزعا «قازاقستان-2030» جولداۋىن ۇسىنعانى بەلگىلى. سول «ستراتەگيالىق» كىتاپشاسىن مەزگىل-مەزگىل اشىپ قاراپ قويامىن دا قاتتى قۋانامىن. نەگە دەيسىز عوي. نەگەسى سول, حالقىمىز تاۋەلسىزدىكتىڭ العاشقى كۇندەرىندە-اق ەلباسىن دۇرىس تاڭداعان ەكەن. شىندىعى سول, ءبىزدىڭ اعا-ۇرپاق, اكە-شەشەلەرىمىز تاۋەلسىزدىكتى عاسىرلار بويى اڭساپ كەلگەن, تۇرمىستىڭ تاۋقىمەتىن تارتقان جاندار عوي. دۇرىس باسشىنى اداسپاي تاڭداي بىلگەن. ەش قاتەلەسپەپتى.
ال قازىرگى تاڭدا «قازاقستان-2030» ستراتەگياسىنىڭ ورنىن ادەمى الماستىرعان «قازاقستان-2050» ستراتەگياسى – بىرلىگى بەرەكەلى, تىرلىگى مەرەكەلى, ىنتىماعى جاراسقان مەملەكەت بولىپ قالىپتاسۋىمىزدىڭ بىردەن-ءبىر كىلتى ەكەنى بارىمىزگە ءمالىم.
ۇلى اباي: «ادام اتا-انادان تۋعاندا ەستى بولمايدى: ەستىپ, كورىپ, ۇستاپ, تاتىپ, ءدۇنيەدەگى جاقسى, جاماندى تانيدى, بىلگەنى, كورگەنى كوپ ادام ءبىلىمدى بولادى», دەگەن. مىنە, ۇلى اباي ايتقانداي, ءبىزدىڭ ەلباسىمىز 22 جىل ىشىندە ادامزات تامسانار قىرۋار جۇمىستار اتقارا وتىرىپ, قازاقستاندى دۇنيەجۇزىنە تانىتتى.
ءبىر عانا مىسال. ەلباسىنىڭ ەڭ كورەگەندىگى مىنادا, جاھاندانۋعا بەت بۇرعان تۇستا كەلگەن تاۋەلسىزدىگىمىزدىڭ بەرىكتىگىن جاسايتىن دا, ونى جالعاستىراتىن دا كەلەشەك جاستار ەكەندىگىن الىستان بولجاي ءبىلۋى. سونداي-اق, جەر-انانىڭ تىرشىلىگىندە تىنىس العان ادامزاتتىڭ جاڭا قۇرالدارمەن جۇمىس ىستەۋلەرى, عالامتورلار ارقىلى بايلانىسى, تابيعي اپاتتارمەن كۇرەس, ت.ت. ءۇشىن بۇگىنگى كۇنگە لايىقتى مامانداردى دايىنداۋ ءبىرىنشى كەزەكتە ەكەنىن ۇعىنۋى. ۇعىنا وتىرىپ, ونى ءىس جۇزىنە اسىرۋدى ماقساتتى ءارى ءبىرىنشى ورىندا تۇرعان باستى مىندەت ەتىپ قويۋى. ونى ورىندادى دا. قانداي قيىندىقتار بولسا دا العاشقى جىلداردىڭ ءوزىندە-اق جاستاردى «بولاشاق» باعدارلاماسىمەن وقىتتى. ەندى, مىنە, ولار لەك-لەگىمەن كەلىپ, جاۋاپتى قىزمەتتەردىڭ العاشقى تابالدىرىعىن اتتاۋدا.
بۇگىندە قىرىققا تاياعان ءبىزدەر كەڭەس وكىمەتى ىدىرار الدىندا مەكتەپتى اياقتاۋعا جاقىن قالعان, جوعارى وقۋ ورنىنىڭ تابالدىرىعىن ەندى عانا اتتاعان جاستار ەدىك. جاس مەملەكەتىمىزدىڭ كونستيتۋتسياسىن جازۋعا اتسالىسقان ع.ساپارعاليەۆ پەن م.بايماحانوۆتاردان ماشىقتانىپ, ولاردان قازاق حالقىنىڭ كەلەشەگىن بولجاۋعا, ول ءۇشىن جاستاردىڭ قوسار ۇلەسىنىڭ نە بولماق ەكەنىن وقىپ-ۇيرەندىك. توقتاماي جەتىلدىرىپ ءالى دە ۇيرەنۋ ءۇستىندەمىز. ويتكەنى, جاھاندانۋ اياسى وتە كۇردەلى ۇدەرىس ەكەنى تولىققاندى مويىنداۋدى تالاپ ەتەدى.
قاتارلاستارىمىز ءۇشىن تاۋەلسىزدىك ءدامىنىڭ ادام ايتقىسىز تۇششىلىعىن كورىپ-ءبىلىپ ءوسۋىمىز ءبىزدەرگە بىردەن-ءبىر باعىتتاۋشى كۇش بولدى. تاۋەلسىزدىك تۇعىرىن نىق ۇستاۋدا العاشقى كۇننەن-اق جان-جاقتى دامۋدىڭ باسپالداعىن دۇرىستاپ شەگەلەپ قاعىسۋدا, ونىڭ قيىندىقتارىنا ءتوزىپ, ءوز ۇلەستەرىمىزدى قوسۋدا ىزدەنىس ۇستىندەمىز.
ەلباسىنىڭ ءار جولداۋى جوعارىعا شىعاتىن باسپالداق ىسپەتتەس. ءار باسپالداعىمىز دۇرىس ءارى بەكەم ەكەنىن قاداعالاعان قۇرىلىس شەبەرلەرى سەكىلدى حالىقتىڭ دا نازارىندا.
پرەزيدەنت ن.ءا. نازارباەۆتىڭ بيىلعى 2014 جىلعا ارنالعان جولداۋى مۇلدەم ەرەكشە. بۇل جولداۋ مەملەكەتىمىزدىڭ العاشقى 22 جىلدىق تويىن جالعاستىرار, 2050-گە جول سىلتەر ايقىندىقتى كورسەتەدى. قانشاما ۇلكەندى-كىشىلى جوبالار جۇزەگە اسسا, ەندىگى 5 جىلدىققا قىرۋار شارالار قابىلدانۋدا. حالىق يگىلىگى ءۇشىن بارلىق باعىت دەرلىك قامتىلعان.
بۇگىندە تمد ەلدەرىنىڭ كوبىسىنەن ىلگەرى باسقانىمىز, ەندى بولاشاقتا 30 ەلدىڭ قاتارىنا دا قوسىلارىمىز قۋانىشقا اينالعانى بەلگىلى. سوندىقتان دا, ءبۇكىل حالقىمىز, ءتىپتى, دۇنيەجۇزى ساياساتكەرلەرى دە جولداۋ جاريالانعان ساعاتتان باستاپ وزدەرىنىڭ جوعارى باعالارىن بەرە باستادى.
مەن ءوز وتباسىممەن جولداۋدى باعدارشامىمىز, اداستىرماس كومپاس رەتىندە قابىلدايمىن. قىزمەتىمىزدەگى ءىس-شارالاردى ورىنداۋ ءبىر باسقا, ال, وتباسىمىزداعى باستى باعدارىمىز – ءوسىپ كەلە جاتقان قىزىمىز بەن ۇلىمىزدى نازارباەۆ زياتكەرلىك مەكتەبىنە دايارلاۋ. ويتكەنى, ءاربىر وتباسى ءوز بالالارىن بۇگىنگى ۇدەمەلى دامۋ ۇدەرىسىنە ىلەسە الاتىنداي ەتىپ, قامقورلىقپەن ءوسىرۋى, سوعان بار كۇش-جىگەرىن جۇمساۋى كەرەك ەكەندىگىن ايتار ەدىم. ءايتپەگەندە بالا-شاعامىزدىڭ كوشتەن قالىپ قوياتىنى ايتپاسا دا تۇسىنىكتى.
دارحان جاباەۆ,
قارجى پوليتسياسى اكادەمياسىنىڭ اعا وقىتۋشىسى,
قارجى پوليتسياسىنىڭ كاپيتانى.