ينتەگراتسيا يگىلىگى
جاقىندا عانا, 29 ناۋرىز كۇنى «ەگەمەن قازاقستان» «جاسامپاز جوباعا – جيىرما جىل» دەگەن ورتاق تاقىرىپپەن ارناۋلى ءنومىر دايىنداعان بولاتىن. ەلباسىمىز نۇرسۇلتان نازارباەۆتىڭ ماسكەۋ مەملەكەتتىك ۋنيۆەرسيتەتىندە ەۋرازيالىق وداق قۇرۋ جونىندەگى باستاماسىن جاريا ەتۋىنىڭ ءدال جيىرما جىلدىعىنا ورايلاستىرىلعان ماتەريالدار قازاقستان باسشىسىنىڭ ەۋرازيالىق ەكونوميكالىق قاۋىمداستىقتى, كەدەن وداعىن قۇرۋ, ءبىرتۇتاس ەكونوميكالىق كەڭىستىكتى قالىپتاستىرۋ يدەيالارىنىڭ ءبارى دە كەزەڭ-كەزەڭىمەن جۇزەگە اسىپ كەلگەنىن كورسەتكەن, الداعى كەزدە ەۋرازيالىق ەكونوميكالىق وداقتى قۇرۋعا دايىندىقتىڭ بارىسىن اشقان ەدى. گازەت بۇگىنگى نومىردە دە وسى اسا ماڭىزدى تاقىرىپتى جالعاستىرىپ, «ينتەگراتسيا يگىلىگى» ورتاق اتاۋىنا توپتاستىرىلعان جاريالانىمداردى 3-بەتتە وقىرماندار نازارىنا ۇسىنىپ وتىر.ينەۋ
پاۆلودارداعى بۇل ۋنيۆەرسيتەت رەسەيدىڭ ءسىبىر ولكەسى مەن قازاقستاننىڭ التاي ايماعىنداعى امبەباپ ماماندار دايىندايتىن بىرەگەي ساپالى وقۋ ورنى بولىپ وتىر
جۋىردا عانا ونەرتاپقىشتىق باستامالاردى دامىتۋعا قوسقان ۇلەسى ءۇشىن رەسەي جاراتىلىس تانۋ اكادەمياسى پرەزيديۋمىنىڭ شەشىمىمەن پاۆلودارلىق عالىم, ينەۋ-ءدىڭ حيميا جانە مەتاللۋرگيا كافەدراسىنىڭ پروفەسسورى, تەحنيكا عىلىمدارىنىڭ دوكتورى يرشەك يبراەۆ الفرەد نوبەل مەدالىمەن ماراپاتتالدى. بۇل وقۋ ورنى ءۇشىن ۇلكەن جەتىستىك. ستۋدەنتتەر ءۇشىن ماقتانىش. ۋنيۆەرسيتەتتە ەۋروپالىق وداقتىڭ قولداۋىمەن «جاڭعىرتىلمالى ەنەرگەتيكانىڭ» بىرەگەي زەرتحاناسى قۇرىلدى, ونىڭ ءبىزدىڭ ەلىمىزدە, تمد ەلدەرىندە بالاماسى جوق كورىنەدى. وقۋ ورنىنىڭ اۋا رايىن باقىلايتىن وزىندىك جەكە مەتەورولوگيالىق ستانساسى بار. ەكونوميكا عىلىمعا, يننوۆاتسياعا, جاڭاشىلدىققا سەنەدى, ءبىلىم عىلىم ارقىلى بەرىلەدى دەگەن وسى. وبلىس ورتالىعىنداعى ءبىز ينەۋ دەپ جازىپ وتىرعان وسى يننوۆاتسيالىق ەۋرازيا ۋنيۆەرسيتەتىنە جاقىندا رەسەيدىڭ بارناۋلداعى ي.پولزۋنوۆ اتىنداعى التاي مەملەكەتتىك تەحنيكالىق ۋنيۆەرسيتەتىنىڭ ستۋدەنتتەرى دە كەلىپ قايتتى. سونىمەن قاتار, وسى ارالىقتا التاي مەملەكەتتىك تەحنيكالىق ۋنيۆەرسيتەتىندە ينەۋ-ءدىڭ دە ستۋدەنتتەرى وقىپ-ءبىلىم الۋ ءۇشىن بارناۋلعا اتتانعان بولاتىن. شەكارالاس وڭىرلەر ءۇشىن جول اشىق. ماقسات – ەل ستۋدەنتتەرىنىڭ ەكى ەلدىڭ پروفەسسورلارى وتكىزەتىن يننوۆاتسيا, جاڭا تەحنولوگيالار تاقىرىبىنداعى لەكتسيالارىنا قاتىسىپ, ءوزارا وي-پىكىر ءبولىسىپ, ءبىلىم دەڭگەيلەرىنە باعا بەرۋ. ياعني ستۋدەنتتەر ەكى اپتا بويى بارناۋل مەن پاۆلوداردا لەكتسيالار تىڭداپ, ساباق وقيدى. بىزگە كەلگەن بارناۋلدىق ستۋدەنتتەر ينەۋ-ءدىڭ ستاندارتتاۋ جانە ماشينا جاساۋ كافەدراسىندا «ازىق-ت ۇلىك ونەركاسىبىندەگى تيەۋ-ءتۇسىرۋ جانە تاسىمالداۋ-قويمالىق جۇمىستاردىڭ مەحانيزمى» مەن «توڭازىتۋ تەحنيكاسىنىڭ نەگىزدەرى» پاندەرى بويىنشا لەكتسيا تىڭدادى. بۇل تاقىرىپتاعى ساباقتاردى تەحنيكا عىلىمدارىنىڭ كانديداتى, پروفەسسور پ.دۋبروۆين, اعا وقىتۋشىلار ناركەن العازينوۆ, ت.اكىمباەۆتار جۇرگىزدى. وقۋ ورنىنىڭ ستاندارتتاۋ جۇيەسى جانە ماشينا جاساۋ كافەدراسىنىڭ اعا وقىتۋشىسى ناركەن العازينوۆتىڭ ايتۋىنشا, ساباقتار بارىسىندا رەسەيلىك ستۋدەنتتەر وزدەرىنىڭ بىلىمدىلىكتەرىن كورسەتە ءبىلدى. ەكى اپتالىق وقۋ سوڭىندا الەكسەي انوحين, دەنيس بەحتەۆ, ۆيكتور دزيۋبين, الەكسەي ولحوۆسكيگە وقىعان پاندەرى جانە يگەرىلگەن كرەديتتەر سانى كورسەتىلگەن كوشىرمەلى ترانسكريپتتەر بەرىلدى. ءبىز, التاي مەملەكەتتىك تەحنيكالىق ۋنيۆەرسيتەتى ازىق-ت ۇلىك ءوندىرىسىنىڭ ماشينالارى مەن اپپاراتتارى فاكۋلتەتىنىڭ 4-كۋرس ستۋدەنتتەرى, ۋنيۆەرسيتەتىمىز بەن ينەۋ اراسىندا وتەتىن ستۋدەنتتەردىڭ ءبىلىم الماسۋ باعدارلاماسىنا قاتىسۋعا كەلدىك, دەيدى دەنيس بەحتەۆ. ياعني بۇل ءوز ماماندىعىڭ بويىنشا قوسىمشا ءبىلىم الۋ دەگەن ءسوز. ينەۋ-ءدىڭ وقىتۋشى-پروفەسسورلىق قۇرامىنا راحمەت. جانە دە ءبىز ەكى اپتا بويى دوستىق قارىم-قاتىناستا تۇرعان ستۋدەنتتىك جاتاقحانانىڭ قوناقجايلىعىنا ريزامىز. – ال, جالپى, ەكى ەلدىڭ ستۋدەنتتەرى ءوزارا ءبىلىم الماسۋ ارقىلى تىعىز بايلانىستا بولۋ ءۇشىن ءبىزدىڭ تاراپىمىزدان بارناۋلدىق ستۋدەنتتەرگە تاعىلىمدامالىق باعدارلامالار جاسالىندى. وعان وزدەرى تاڭداعان پاندەر بويىنشا دارىستىك, تاجىريبەلىك ساباقتار, سونىمەن قوسا بوس ۋاقىتتارىن قىزىقتى وتكىزۋ جوسپارى ەندى, – دەيدى ينەۋ-ءدىڭ ينجەنەرلىك اكادەميا فاكۋلتەتىنىڭ دەكانى ابىلاي ءجۇنىسوۆ. ۋنيۆەرسيتەت تەحنيكا عىلىمدارىنىڭ دوكتورى, پروفەسسور, رەكتور اسقار كامەرباەۆتىڭ باسقارۋىمەن جوعارى تەحنولوگيالار زامانىنىڭ تالاپتارىنا ساي ەكونوميكانىڭ ءارتۇرلى سالالارى ءۇشىن بىلىكتىلىگى جوعارى ماماندار دايارلايدى. ەلىمىزگە كاسىبي كادرلاردى دايارلاۋدا ءوندىرىس ورىندارىمەن بىرلەسە جۇمىس جاساۋدا. سونىمەن قاتار, كورشىلەس رەسەيدىڭ ىنتىماقتاستىق ۇسىنىستارىنا وراي يننوۆاتسيالىق ءبىلىم بەرۋ باعدارلامالارى بويىنشا مامانداردى بىرلەسىپ دايارلاۋعا قول جەتكىزدى. مىسالى, تۇمەن مەملەكەتتىك مۇناي-گاز ۋنيۆەرسيتەتىمەن قوس ديپلومدى ءبىلىم بەرۋ باعدارلامالارىن قولداۋ تۋرالى كەلىسىمگە دە قول جەتكىزىلدى. ينەۋ-ءدى «ەۋروپا جوو-لارىنىڭ ۇلى حارتياسىنا» قوسۋ تۋرالى بولون كەلىسىمىنە قول قويىلدى. ءوڭىردىڭ ايماقتىق يننوۆاتسيالىق جۇيەسىن قالىپتاستىرۋ باعدارلاماسىنىڭ قاتىسۋشىسى سانالادى. ەكونوميكالىق, عىلىمي-تەحنيكالىق ىلگەرىلەۋ جانە جوعارى ءبىلىمدى دامىتۋ, سونىمەن قاتار, كاسىپورىن بازاسىندا وقۋ-وندىرىستىك ورتالىقتار قۇرۋ ماقساتىندا قازاقستان جانە رەسەي ۋنيۆەرسيتەتتەرى مەن كاسىپورىندارىن بىرىكتىرەتىن «اشىق كورپوراتيۆتىك ۋنيۆەرسيتەت» كونسورتسيۋمىن ۇيىمداستىرۋشى اتالىپ وتىر. الداعى ۋاقىتتا ينەۋ-گە ستۋدەنتتەر ءۇشىن تانىمدىق, يننوۆاتسيالىق لەكتسيالار وقۋ ءۇشىن تۋۆا مەملەكەتتىك ۋنيۆەرسيتەتىنىڭ پروفەسسورى مانچىك-سات چودۋراا كەلمەكشى. جاھاندانۋ ۇدەرىسىندە ەۋرازيالىق تۇتاستىقتىڭ قاجەتتىگى, وسى كەڭىستىكتە ينتەگراتسيالىق ۇردىستەردىڭ ومىرلىك ماڭىزدىلىعى, ورتاق بىرلەستىكتىڭ قاعيداتتارى مەن باعدارلاماسى تۋرالى يدەيانى پرەزيدەنت نۇرسۇلتان نازارباەۆ تۇڭعىش رەت 1994 جىلى ماسكەۋ مەملەكەتتىك ۋنيۆەرسيتەتىندە مالىمدەگەن ەدى. سول ساتتەن بەرى ءوز دامۋىن العان بۇل ەۋرازياشىلدىق يدەيا قولداۋ تاۋىپ, قازىر ومىرگە بەلسەنە ەنىپ كەلەدى. ال, ەڭ باستىسى, ەكى ەل جوعارى وقۋ ورىندارىنىڭ وقىتۋشى قۇرامىن ەكونوميكانىڭ نەگىزگى سالالارى – وندىرىستەر, جابدىقتار مەن ماشينا جاساۋ وندىرىسىندەگى بىلىكتىلىگى جوعارى, باسەكەگە قابىلەتتى مامانداردى دايارلاۋ ماقساتى بىرىكتىرەدى. سوندىقتان دا, مۇنداي ەلارالىق ىنتىماقتاستىق بايلانىستار ەكى ەل ستۋدەنتتەرىنىڭ رەسەيدىڭ جانە ءبىزدىڭ ەلىمىزدىڭ وقۋ ورىندارىنان ءبىلىم الىپ, ىزدەنۋلەرىنە, بولاشاقتا بىلىكتى مامان بولۋلارىنا مۇمكىندىك بەرىپ وتىر.فاريدا بىقاي,
«ەگەمەن قازاقستان».
پاۆلودار.ينتەگراتسيا يگىلىگى