قارۋلى كۇشتەر ءوز مىندەتىن ورىنداۋعا ءاردايىم دايىن بولۋعا ءتيىس

مەملەكەت باسشىسى نۇرسۇلتان نازارباەۆ قورعانىس مينيسترلىگىنىڭ باسشىلىق قۇرامىمەن كەزدەستى, دەپ حابارلادى پرەزيدەنتتىڭ ءباسپاسوز قىزمەتى. مەملەكەت باسشىسى كەزدەسۋ بارىسىندا سەرىك احمەتوۆتىڭ قورعانىس ءمينيسترى لاۋازىمىنا تاعايىندالعانى تۋرالى حابارلاي كەلىپ, ونىڭ باسشىلىق جۇمىستا مول تاجىريبەسى بار ەكەنىن ايتتى. – بۇگىنگى كۇنى ول بۇل قىزمەتكە ەڭ لايىقتى ادام دەپ سانايمىن. ءبىز قورعانىس ءمينيسترى ەتىپ ازاماتتىق تۇلعانى تاعايىنداۋ باعىتىن ۇستانىپ كەلەمىز. بىزگە قورعانىس كەشەنى كاسىپورىندارىن دامىتۋدى, ارميامىزدى زاماناۋي تەحنيكامەن جابدىقتاۋدى جالعاستىرۋ, سونداي-اق, مەملەكەت قاراجاتىن ءتيىمدى پايدالانۋدى قامتاماسىز ەتۋ قاجەت, – دەدى نۇرسۇلتان نازارباەۆ. قازاقستان پرەزيدەنتى جاقىندا وتكەن جەدەل-ستراتەگيالىق كەڭەس كەزىندە العا قويىلعان مىندەتتەردى ىسكە اسىرۋدىڭ ماڭىزدىلىعىن اتاپ ءوتتى. سوڭىندا مەملەكەت باسشىسى ەلىمىزدىڭ قارۋلى كۇشتەرى اسكەري مىندەتتەرىن ورىنداۋعا ءاردايىم دايىن بولۋعا جانە ءوز كاسىبي شەبەرلىكتەرىن ۇدايى جەتىلدىرىپ وتىرۋعا ءتيىس ەكەنىنە توقتالدى. ----------------------------------------- سۋرەتتەردى تۇسىرگەندەر س.بوندارەنكو, ب.وتارباەۆ.