ۇلتتىق عارىش اگەنتتىگى 28 ءساۋىر كۇنى «بايقوڭىر» عارىش ايلاعىنان «رەسپۋبليكالىق عارىشتىق بايلانىس ورتالىعى» اق تاپسىرىسى بويىنشا جاسالعان «KazSat-3» ءۇشىنشى بايلانىس جانە حابار تاراتۋ ۇلتتىق گەوستاتسيونارلىق سپۋتنيگىن ۇشىرۋ جوسپارلانىپ وتىرعانىن حابارلادى.
قازعارىش وتاندىق ءۇشىنشى بايلانىس سپۋتنيگىن ۇشىرۋ بايلانىستىڭ قازاقستاندىق جۇيەسىن قۇرۋدىڭ كەلەسى كەزەڭى ەكەنىن مالىمدەدى. «KazSat-3» سپۋتنيگى تەلەۆيزيالىق حابار تاراتۋ, تياناقتالعان بايلانىس, ينتەرنەت جانە دەرەكتەردى بەرۋ قازاقستاندىق نارىعىنىڭ قاجەتتىلىكتەرىن قاناعاتتاندىرۋعا ارنالعان», دەپ حابارلادى قازعارىشتىڭ ءباسپاسوز قىزمەتى.
«KazSat-3» سپۋتنيگىن قۇرۋ جانە ۇشىرۋ جوباسى بويىنشا جۇمىستارعا كەلسەك, ول «اكادەميك م.ف.رەشەتنيوۆ اتىنداعى اقپاراتتىق سپۋتنيكتىك جۇيەلەر» جەتەكشى رەسەيلىك عارىش كومپانياسىمەن جاسالعان شارتى اياسىندا جۇرگىزىلۋدە. «KazSat-3» قازاقستاندىق سپۋتنيگى 24 ناۋرىزدا «بايقوڭىر» عارىش ايلاعىنا جەتكىزىلىپ, قازىر 92ا-50 مونتاجداۋ-سىناۋ كورپۋسىندا دايىندىقتان وتۋدە.
«ەگەمەن-اقپارات».