بۇگىن تاڭەرتەڭ پرەزيدەنت قاسىم-جومارت توقاەۆ سولتۇستىك قازاقستان وبلىسىنىڭ اكىمى قۇمار اقساقالوۆتىڭ پەتروپاۆل قالاسىنداعى جىلۋ ەلەكتر ورتالىعىندا بولعان اپات سالدارىن جويۋ جۇمىستارىنىڭ بارىسى تۋرالى ەسەبىن تىڭدادى, دەپ حابارلايدى Egemen.kz.
«اپات سالدارىنان تۇرعىن ۇيلەر مەن قىزمەتتىك مەكەمەلەر جىلۋسىز قالعان بولاتىن. اكىمنىڭ ايتۋىنشا, جۇمىس كوميسسياسى قۇرىلعان. ونىڭ قۇرامىنا اكىمدىكتىڭ, تجم-ءنىڭ جانە باسقا دا قۇزىرلى ۆەدومستۆولاردىڭ قىزمەتكەرلەرى, سونداي-اق اتالعان سالانىڭ جوبالاۋشىلارى مەن ماماندارى ەنگەن.كومپانيا باسشىسى – جىلۋ ەلەكتر ورتالىعىنىڭ مەنشىك يەسى كەلەدى دەپ كۇتىلۋدە. پرەزيدەنت وبلىس ورتالىعى مەن باسقا دا ەلدى مەكەندەردىڭ تۇرعىندارىن تەز ارادا جىلۋمەن قامتاماسىز ەتۋدى تاپسىردى», دەلىنگەن اقوردانىڭ ءباسپاسوز قىزمەتى تاراتقان مالىمەتتە.
ەسكە سالا كەتەيىك, پەتروپاۆلدا جىلۋ ەلەكتر ورتالىعىنىڭ ءبىر مۇرجاسى قۇلادى, زارداپ شەككەندەر تۋرالى اقپارات تۇسكەن جوق.
جىلۋ جۇيەسىندەگى اپاتقا بايلانىستى بىردەن بەس قازاندىق ءسوندىرىلدى. قازىرگى ۋاقىتتا قىلمىستىق ءىس قوزعالعان. جۇمىسشىلاردىڭ بىرەۋى تابىلماي جاتىر.
جەو-داعى ءتۇتىن مۇرجاسىنىڭ جارتىلاي قۇلاۋىنا بايلانىستى وبلىس اكىمى جەدەل شتاب قۇردى. ول جەردە پەتروپاۆل تۇرعىندارىن ءتيىستى جىلۋمەن قامتۋعا قاتىستى بارلىق ءىس-شارالار قولعا الىنىپ جاتىر.
وقيعا ورنىندا بۇكىل ارنايى قىزمەتتەر جۇمىس ىستەپ تۇر.