ماجىلىستە وتكەن دوڭگەلەك ۇستەلدە باسەكەلەستىكتى قورعاۋ جانە دامىتۋ اگەنتتىگىنىڭ توراعاسى سەرىك جۇمانعارين اۋەجايلارعا اۆياكەروسين ساتۋعا تىيىم سالۋدى ۇسىندى, دەپ حابارلايدى Egemen.kz.
بۇل تۋرالى قر باسەكەلەستىكتى قورعاۋ جانە دامىتۋ اگەنتتىگىنىڭ توراعاسى سەرىك جۇمانعارين «قر نەگىزگى تاۋار نارىقتارىن مونوپولياسىزداندىرۋ شارالارى» تاقىرىبىندا وتكەن دوڭگەلەك ۇستەلدە مالىمدەدى.
«اۆياكەروسيندى ساتۋ نارىعىندا اۋەجايلار وزدەرىنىڭ تاريفتىك ساياساتىنا تاۋەلدى. ويتكەنى نەگىزگى كىرىستى اۆياكەروسيندى قايتا ساتۋ ارقىلى تاۋىپ وتىر. اۆياتسيالىق وتىننىڭ 72%-ىن ەكى كومپانيا باقىلايدى. ولار: 54% ۇلەسى بار «PetroSun» جشس مەن 18% ۇلەسى بار «قازمۇنايگاز» اق. «PetroSun» جشس-نەن كوبىنەسە «AirAstana» اق (45%), «نۇرسۇلتان نازارباەۆ حالىقارالىق اۋەجايى» اق (17%), «Scat» جشس «13%), «ۆينەس ترەيدينگ» جشس (9%), «الماتى حالىقارالىق اۋەجايى» اق (8%), «Qazaqair» اق (3,3%) ساتىپ الادى. «قازمۇنايگاز» اق-نىڭ اۆياوتىنىن تۇگەلدەي «قازمۇنايگاز اەرو» اق ساتىپ الادى», دەپ ءتۇسىندىردى سەرىك جۇمانعارين.
اگەنتتىك توراعاسى بىلتىر ىشكى نارىققا ارنالعان اۆيوتىننىڭ 10% ساتۋ تاۋار بيرجالارى ارقىلى ساتىلعانىن اتاپ ءوتتى.