ماسكەۋدەگى قازاقستان ەلشىلىگىندە كوروناۆيرۋس ينفەكتسياسىمەن كۇرەسۋدە قازاقستاندىق ارىپتەستەرىنە كومەكتەسكەن رەسەيلىك دارىگەرلەرگە قازاقستان رەسپۋبليكاسىنىڭ مەملەكەتتىك ناگرادالارى تابىس ەتىلدى, دەپ حابارلايدى Egemen.kz.
قازاقستان رەسپۋبليكاسىنىڭ ەلشىلىگىنىڭ مالىمەتى بويىنشا 2-دارەجەلى «دوستىق» وردەنىمەن جانە «شاپاعات» مەدالىمەن ماسكەۋ جانە ماسكەۋ وبلىسى اۋرۋحانالارىنىڭ انەستەزيولوگ-رەانيماتولوگتارى, ينفەكتسيونيستتەرى, پۋلمونولوگتارى, ەپيدەميولوگتارى, بارلىعى 28 ادام ماراپاتتالدى. «2020 جىلدىڭ جازىندا قازاقستاندا ىندەتتىڭ شارىقتاۋ شەگىندە ولاردىڭ دەر كەزىندە كومەك كورسەتۋى ەپيدەميولوگيالىق جاعدايدى تۇراقتاندىرۋعا ۇلكەن ۇلەس قوستى», - دەلىنگەن ديپلوماتيالىق وكىلدىك سايتىندا. دارىگەرلەر الدىندا ءسوز سويلەگەن قازاقستان رەسپۋبليكاسىنىڭ رەسەي فەدەراتسياسىنداعى ەلشىسى ەرمەك كوشەرباەۆ ولاردىڭ ەڭ قاجەتتى ءارى ماڭىزدى ماماندىقتىڭ وكىلى ەكەنىن اتاپ ءوتتى.