«ءوڭىر» دەپۋتاتتىق توبى تۇيىتكىلدى ماسەلەلەردى تالقىلادى

وندا سەناتورلار اۋداندىق ماڭىزى بار قالالار, اۋىلدار, كەنتتەر, اۋىلدىق وكرۋگتەر اكىمدەرىنىڭ تىكەلەي سايلاۋىن وتكىزۋ بارىسىندا ايقىندالعان پروبلەمالاردى تالقىلادى. دەپۋتاتتار سونىمەن قاتار بيلىك دەڭگەيلەرى وكىلدەرىنىڭ دەربەستىگى مەن جاۋاپكەرشىلىگىن كەڭەيتۋگە قاتىستى ماسەلەلەردى دە كوتەردى.

ء«وڭىر» دەپۋتاتتىق توبىنىڭ توراعاسى ەرىك سۇلتانوۆ وتىرىستى اشا كەلىپ, اۋىل اكىمدەرىنىڭ تىكەلەي سايلاۋىن ەنگىزۋ جانە وڭىرلەردىڭ قارجىلىق دەربەستىگىن كەڭەيتۋ ازاماتتاردى جەرگىلىكتى ءوزىن-ءوزى باسقارۋ ماسەلەلەرىنە تارتۋداعى ماڭىزدى قادام ەكەنىن اتاپ ءوتتى.

«بۇل جۇمىس اۋىلدىق وكرۋگتەردىڭ قارجىلىق دەربەستىگىن ارتتىرۋعا ىقپال ەتەدى. اتاپ ايتقاندا, سالىقتار مەن الىمداردىڭ 4 ءتۇرىن وسى دەڭگەيگە اۋىستىرۋ ەسەبىنەن بجۇزەگە اسادى. ارينە, بۇل شارالاردىڭ بارلىعى وڭىرلەردى نىعايتۋدى كوزدەيدى. بۇل مەملەكەتتىك ساياساتتىڭ نەگىزگى باسىمدىقتارىنىڭ ءبىرى», دەدى سۇلتانوۆ.

سەناتور دۇيسەنعازى مۋسين اقمولا وبلىسىنا ساپارى بارىسىندا دەپۋتاتتار ءوڭىر تۇرعىندارى الدىندا 4 دەڭگەيدەگى بيۋدجەتكە قاتىستى پروبلەمالىق ماسەلەلەردى كوتەرگەنىن اتاپ ءوتتى. ەڭ ماڭىزدىسىنىڭ ءبىرى – سالىق بازاسى تومەن بولۋى جانە تيىسىنشە, قارجى تۇسىمدەرى دەڭگەيىنىڭ تومەندىگى بولىپ وتىر. سەناتوردىڭ ايتۋىنشا, بيۋدجەت كودەكسىنە سايكەس, 4 دەڭگەيدىڭ شىعىندارى 19 باعىت بويىنشا ىسكە اسۋى ءتيىس, الايدا بۇگىنگى كۇنى ولار تولىق كولەمدە قامتاماسىز ەتىلمەگەن.

«دەربەس بيۋدجەتكە تولەم كوزىنەن سالىق سالىناتىن تابىستاردان جەكە تابىس سالىعى مەن الەۋمەتتىك سالىقتى تولەۋ تۋرالى ماسەلەنى كەيىنگە قالدىرماي قاراي وتىرىپ تۇپكىلىكتى شەشۋ ماڭىزدى دەپ سانايمىن. وسىنداي اۋقىمدى شارالاردى قابىلداۋ ارقىلى عانا دەربەس بيۋدجەتتەگى ءوزىن-ءوزى قامتاماسىز ەتۋ ۇلەسىن 2025 جىلعا قاراي جوسپارلانعان 35%-عا دەيىن ارتتىرۋعا بولادى», دەدى ول.

وتىرىس بارىسىندا سالىق اۋدارىمدارىن اكىمشىلەندىرۋدى ودان ءارى جەتىلدىرۋدىڭ ماڭىزى اتاپ ءوتىلدى. قارجى ءمينيسترىنىڭ ورىنباسارى دانيار جانالينوۆتىڭ اقپاراتى بويىنشا اعىمداعى جىلى جەرگىلىكتى ءوزىن-ءوزى باسقارۋ بيۋدجەتىنە تولەمدەردىڭ 4 ءتۇرى بويىنشا تۇسىمدەر بەرىلەتىن بولادى. ولار بويىنشا تۇسىمدەردىڭ بولجانعان ءوسىمى شامامەن 13,5 ملرد تەڭگەنى قۇرايدى. سونىمەن قاتار, ۇلتتىق ەكونوميكا مينيسترلىگى زاڭناماعا ازىرلەنىپ جاتقان وزگەرىستەر تۋرالى حاباردار ەتتى, وعان سايكەس 2024 جىلعا قاراي اۋىل بيۋدجەتتەرىنە قوسىمشا 3 سالىق پەن تولەم ءتۇرىن بەرۋ جوسپارلانىپ وتىر.

ء«وڭىر» دەپۋتاتتىق توبى وتىرىستىڭ قورىتىندىسى بويىنشا ۇسىنىمدار ازىرلەدى, ول بارلىق مۇددەلى مەملەكەتتىك ورگاندارعا جىبەرىلەتىن بولادى.