پرەزيدەنتتىڭ قاتىسۋىمەن وتكەن ۇكىمەتتىڭ كەڭەيتىلگەن وتىرىسىندا الماتى وبلىسىنىڭ اكىمى قانات بوزىمباەۆ قاسىرەتتى قاڭتار وقيعاسىندا اجال قۇشقان اسكەريلەردىڭ وتباسىنا كومەك كورسەتىلگەندىگىن ءمالىم ەتتى, دەپ حابارلايدى Egemen.kz.
وبلىس اكىمىنىڭ ايتۋىنشا, قازا تاپقان 8 كۇشتىك قۇرىلىم قىزمەتكەرلەرىنىڭ ءار وتباسىنا 5 ملن تەڭگەدەن وتەماقى تولەنگەن.
سونداي-اق ەكىنشى دەڭگەيلى بانكتەرمەن قازا تاپقاندار مەن ولاردىڭ تۋىستارىنىڭ نەسيەلەرى كەشىرىلدى.
«زارداپ شەككەن 135 پوليتسيا قىزمەتكەرى مەن اسكەري قىزمەتشىلەرگە 2 ملن تەڭگەگە دەيىن تولەنۋدە. باسپاناعا مۇقتاج ءتورت وتباسىعا تۇرعىن ءۇي ساتىپ الىنۋدا», دەدى ءوڭىر باسشىسى.
ايتا كەتەيىك, پرەزيدەنتتىڭ تاپسىرماسىنا سايكەس وبلىس ورتالىعىندا قالپىنا كەلتىرۋ جۇمىستارى بەلسەندى جۇرگىزىلۋدە. وبلىس اكىمدىگى, پوليتسيا باسقارماسى جانە Nur Otan پارتياسى عيماراتتارىنا جوندەۋ جۇمىستارى جاسالىنىپ جاتىر. الدىن الا ەسەپتەۋلەر بويىنشا 5,9 ملرد تەڭگە قاجەت.