ۇكىمەتتىڭ كەڭەيتىلگەن وتىرىسىندا ماڭعىستاۋ وبلىسىنىڭ اكىمى نۇرلان نوعاەۆ وبلىستاعى كاسىپورىنداردىڭ جۇمىسشىلارىنىڭ نارازىلىعى تۋرالى ايتتى, دەپ حابارلايدى Egemen.kz.
مەملەكەت باسشىسى قاسىم-جومارت توقاەۆ ماڭعىستاۋ وبلىسىنداعى احۋال وڭاي ەمەسىن ايتتى.
– مەنىڭ تاپسىرماما سايكەس, ءوڭىردى كەشەندى دامىتۋعا قاتىستى جوسپار قابىلداندى. بۇل قۇجات بيىل تاعى دا پىسىقتالدى. وعان سايكەس قوماقتى قاراجات ءبولىندى. ول ءبىرىنشى كەزەكتەگى مىندەتتەردى شەشۋگە جۇمسالادى. سوندىقتان ءىستى سوزباي, دەرەۋ جۇمىسقا كىرىسۋ كەرەك, – دەدى قاسىم-جومارت توقاەۆ.
پرەزيدەنت قابىلدانعان شارالارعا قاراماستان ەڭبەك ۇجىمدارىنىڭ نارازىلىعى كۇشەيىپ كەلە جاتقانىن جەتكىزدى.
– جۇمىسشىلاردىڭ بارلىق تالابىن مۇقيات قاراۋ كەرەك. ولاردىڭ زاڭدى قۇقىقتارى مەن مۇددەلەرى ساقتالۋى كەرەك. كاسىپوداق جەتەكشىلەرى مەن جۇمىسشىلارى شەرۋگە شىعىپ جاتقان كومپانيا يەلەرىنە سىندارلى ديالوگ ورناتۋ قاجەت. قابىلدانعان شەشىمدەردىڭ بارلىعىن قاراپايىم جۇمىسشىدارعا دۇرىس ءتۇسىندىرۋ كەرەك. پروبلەمامەن اينالىسۋدى اكىمدىككە جۇكتەپ قويۋعا بولمايدى. ولاردى قولداپ, تۋىنداعان ماسەلەلەردى بىرلەسە قاراعان ءجون. پروبلەمالاردى شەشۋ ءۇشىن ۇكىمەت مەن «سامۇرىق-قازىنا» بىرلەسە جۇمىس ىستەۋى كەرەك. قاجەت بولسا, ۇكىمەتتىڭ ارنايى كوميسسياسىن ماڭعىستاۋ وبلىسىنا جىبەرۋ كەرەك, – دەدى مەملەكەت باسشىسى.