ۆاكتسيناتسيا پاسپورتىن ساتقان دارىگەرلەرگە راقىمشىلىق جاسالدى

پاۆلودار وبلىسى پوليتسيا دەپارتامەنتىنىڭ ءباسپاسوز قىزمەتى مالىمەتىنشە, پاۆلوداردا ەكى ەمحانا قىزمەتكەرلەرىنىڭ ۆاكتسيناتسيا پاسپورتىن قولدان جاساۋ دەرەگى بىلتىر شىلدەدە انىقتالعان. فاكت قر قك-نىڭ 385-بابى 2-بولىگى «كولىك قۇرالىنىڭ سايكەستەندىرۋ ءنومىرىن قولدان جاساۋ, جويۋ, الدىن الا ءسوز بايلاسۋ ارقىلى ادامدار توبى جاساعان كورىنەۋ جالعان سايكەستەندىرۋ ءنومىرى بار كولىك قۇرالىن وتكىزۋ» بويىنشا تىركەلگەن. بۇل باپ بويىنشا دارىگەرلەرگە 5000 ايلىق ەسەپتىك كورسەتكىشكە دەيىن ايىپپۇل سالۋ, نە 1200 ساعاتقا دەيىن قوعامدىق جۇمىستارعا تارتۋ, نە شەكتەۋ نەمەسە بەس جىلعا دەيىن باس بوستاندىعىنان ايىرۋ جازاسى كوزدەلگەن.

تەرگەۋشىلەردىڭ ايتۋىنشا, دارىگەرلەر اقىلى تۇردە جۇزدەگەن جالعان قۇجات جاساعان. پوليتسيا كۇدىكتىلەردىڭ اراسىندا مەنەدجەر, دارىگەر جانە ەكى مەدبيكە بار ەكەنىن ايتتى. بىلتىر قاراشادا جەرگىلىكتى ەمحانانىڭ مەدبيكەلەرىنىڭ ءبىرى جالعان ەكپە تولقۇجاتتارىن ساتقانى ءۇشىن 160 000 تەڭگە العانى بەلگىلى بولدى. الايدا پاۆلودارلىق دارىگەرلەردىڭ ءىسى سوتقا دەيىن جەتپەگەن. سوتالدى تەرگەپ-تەكسەرۋ بارىسىندا مەديتسينا قىزمەتكەرلەرى راقىمشىلىق جاساۋ تۋرالى ءوتىنىش بەرگەن.

«قر قك-ءنىڭ 11-بابى 2-بولىگىنە سايكەس, قر قك-ءنىڭ 385-بابى 2-بولىگىندە كوزدەلگەن قىلمىستىق قۇقىق بۇزۋ دەرەگى اۋىرلىعى ورتاشا قىلمىستارعا جاتادى جانە وسى زاڭنىڭ قولدانىلۋ اياسىنا جاتادى. «قازاقستان رەسپۋبليكاسى تاۋەلسىزدىگىنىڭ وتىز جىلدىعىنا بايلانىستى راقىمشىلىق جاساۋ تۋرالى» قر زاڭىنىڭ زاڭدى كۇشىنە ەنۋىنە بايلانىستى قىلمىستىق ىستەر قر قىجك 35-بابى 1-بولىگى 3-تارماعى نەگىزىندە توقتاتىلدى», دەدى ۆەدومستۆونىڭ ءباسپاسوز قىزمەتى.