قر ۇلتتىق ەكونوميكا مينيسترلىگىندە ماڭعىستاۋ وبلىسىن دامىتۋدىڭ وزەكتى كەشەندى جوسپارى تانىستىرىلدى, دەپ حابارلايدى Egemen.kz.
«ونەركاسىپ سالاسىندا «دۋنگا» كەن ورنىن يگەرۋدىڭ ءۇش كەزەڭىن ىسكە اسىرۋ, اقتاۋ قالاسىندا مۇناي-حيميا كەشەنىن سالۋ جانە باسقالارى جوسپارلانعان. اگروونەركاسىپتىك كەشەن سالالارىندا 25 ينۆەستيتسيالىق جوبانى ىسكە اسىرۋ جانە بالىق شارۋاشىلىعى ءونىمىنىڭ ونىمدىلىگى مەن ساپاسىن ارتتىرۋدى سۋبسيديالاۋ, سونداي-اق اسىل تۇقىمدى بالىق شارۋاشىلىعىن دامىتۋ جوسپارلانۋدا. تۋريزم سالاسىندا 14 نىساننىڭ قۇرىلىسى كۇتىلۋدە», دەدى قر ۇلتتىق ەكونوميكا ءمينيسترى الىبەك قۋانتىروۆ ۇكىمەت وتىرىسىندا.
سونداي-اق وڭىردە 1059 كم جەرگىلىكتى ماڭىزى بار اۆتوجولداردى, 87,9 كم ەلەكتر جەلىلەرىن, 116 كم جىلۋ جەلىلەرىن سالۋ جانە جوندەۋ, سونداي-اق تۇششىلاندىرۋ زاۋىتتارى مەن قوندىرعىلارىنىڭ توعىز جوباسىن سالۋ كوزدەلگەن.
«الەۋمەتتىك سالانى دامىتۋ اياسىندا اۋداندىق ورتالىق اۋرۋحانا, 24 مەكتەپ جانە 11 قوسىمشا قۇرىلىس سالۋ, بەس كوللەدجدى جابدىقتارمەن جابدىقتاۋ قاراستىرىلعان. جۇرگىزىلگەن جۇمىستاردىڭ ناتيجەسىندە ماڭعىستاۋ وبلىسىندا ونەركاسىپ كولەمى 28%-عا, تۋريستەر اعىنى 4,6 ەسەگە ارتادى, جاقسى جانە قاناعاتتانارلىق جاعدايداعى جولداردىڭ ۇلەسى 100%-عا جەتەدى جانە 4 ملن شارشى مەتر تۇرعىن ءۇي پايدالانۋعا بەرىلەدى», دەپ قوستى مينيستر.