جاڭگىر حان اتىنداعى باتىس قازاقستان اگرارلىق-تەحنيكالىق ۋنيۆەرسيتەتىنىڭ قوس عالىمى «بولاشاق» حالىقارالىق ستيپەندياسىنىڭ «تاعىلىمداما» باعدارلاماسى گرانتىن ۇتىپ الدى, دەپ جازادى Egemen.kz.
ەندى ولار ءوز ماماندىعى بويىنشا رەسەي مەن بەلارۋس ەلدەرىندەگى ىرگەلى جوعارى وقۋ ورىندارىندا تاعىلىمدامادان وتەتىن بولادى.
ۋنيۆەرسيتەتتەگى سىناۋ ورتالىعىنىڭ عىلىمي قىزمەتكەرى, اۋىل شارۋاشىلىعى عىلىمدارىنىڭ ماگيسترى اينۇر حارجاۋ «بولاشاق» حالىقارالىق ستيپەندياسىنىڭ گرانتىن يەلەندى. جاس عالىم ەندى وسى گرانتتىق قولداۋدىڭ كومەگىمەن ك.ا.تيميريازەۆ اتىنداعى ماسكەۋ اۋىلشارۋاشىلىق اكادەمياسىندا «مال شارۋاشىلىعى ونىمدەرىن ءوندىرۋ تەحنولوگياسى» ماماندىعى بويىنشا 6 اي كولەمىندە عىلىمي تاعىلىمدامادان وتەدى.
حالىقارالىق ستيپەنديانىڭ گرانتىنا يە بولعان تاعى ءبىر عالىم – يندۋستريالدى-تەحنولوگيالىق ينستيتۋتى دوتسەنتىنىڭ مىندەتىن اتقارۋشى, PhD دوكتورى ەربول ەرباەۆ. ەربول تولەگەن ۇلى بەلورۋسسيا مەملەكەتتىك اگرارلىق-تەحنيكالىق ۋنيۆەرسيتەتىندە «اۋىل شارۋاشىلىعىن ەنەرگيامەن قامتاماسىز ەتۋ» ماماندىعى بويىنشا 6 اي تاعىلىمدامادان ءوتىپ, تاجىريبەسىن تولىقتىرماق.
باتىس قازاقستان وبلىسى.