قر يندۋستريا جانە ينفراقۇرىلىمدىق دامۋ ءمينيسترى قايىربەك وسكەنباەۆ توتەنشە جاعداي كەزىندەگى ەلدىڭ كولىك ينفراقۇرىلىمى قالاي جۇمىس ىستەپ تۇرعانىن باياندادى, دەپ حابارلادى Egemen.kz.
«بارلىق ايماقتاردا قالالىق اۆتوبۋس قىزمەتى, بارلىق تەمىرجول ۆوكزالدارى جانە بارلىق جولاۋشىلار مەن جۇك پويىزدارىنىڭ قوزعالىسى تولىعىمەن قالپىنا كەلتىرىلدى. رەسپۋبليكالىق ماڭىزى بار اۆتوجولدار بويىنشا اۆتوكولىك قۇرالدارى ءۇشىن قوزعالىسقا شەكتەۋ جوق», دەدى ۆەدومستۆو باسشىسى ۇكىمەت وتىرىسىندا.
قايىربەك وسكەنباەۆتىڭ ايتۋىنا قاراعاندا, الماتى قالاسىنىڭ اۋەجايى قىزمەتىن قايتا باستاۋعا تەحنيكالىق دايىن.
«ەلىمىزدىڭ 20 اۋەجايىنىڭ 18-ءى شتاتتىق رەجيمدە جۇمىس ىستەيدى. الماتى جانە تالدىقورعان اۋەجايلارىنىڭ قىزمەتى توقتاتىلدى. بۇل رەتتە, الماتى قالاسىنىڭ اۋەجايى قىزمەتىن قايتا باستاۋعا تەحنيكالىق دايىن, قۇزىرەتتى ارنايى ورگانداردىڭ ءتيىستى شەشىمى قاجەت», دەدى مينيستر.