ەكونوميكالىق ءوسىم پاندەمياعا دەيىنگى كورسەتكىشتەردەن اسىپ ءتۇستى - اسقار مامين

شيك-ءتىڭ ينۆەستيتسيالىق ساياساتتى ىسكە اسىرۋ, ەنەرگەتيكا, ەكولوگيا جانە مۇناي-گاز سالاسى, ەڭبەك زاڭناماسى, ادامي كاپيتالدى دامىتۋ جانە شەتەلدىك جۇمىس كۇشىن تارتۋ, تسيفرلاندىرۋ جونىندەگى بىرلەسكەن جۇمىس توپتارىنىڭ قىزمەتى تۋرالى «شەتەلدىك ينۆەستورلاردىڭ قازاقستاندىق كەڭەسى» قاۋىمداستىعىنىڭ باسقارما توراعاسى, «EY» كومپانياسىنىڭ قازاقستان جانە ورتالىق ازيا بويىنشا باسقارۋشى سەرىكتەسى ەرلان دوسىمبەكوۆ, «Total Energies Kazakhstan» باسشىسى الەم فريگا-نوي, «كناۋف» كومپانياسىنىڭ قر-داعى وكىلى ديميتري پروپپ, قازاقستان جانە ورتالىق ازياداعى «KPMG» باسقارۋشى سەرىكتەسى ساكەن جۇماشەۆ باياندادى.

پرەمەر-ءمينيستردىڭ ورىنباسارى – سىرتقى ىستەر ءمينيسترى مۇحتار تىلەۋبەردى, ۇلتتىق ەكونوميكا ءمينيسترى اسەت ەرعاليەۆ, قارجى ءمينيسترى ەرۇلان جاماۋباەۆ, ەڭبەك جانە حالىقتى الەۋمەتتىك قورعاۋ ءمينيسترى سەرىك شاپكەنوۆ, تسيفرلىق دامۋ, يننوۆاتسيالار جانە اەروعارىش ونەركاسىبى ءمينيسترى باعدات مۋسين, ەنەرگەتيكا ءمينيسترى ماعزۇم مىرزاعاليەۆ, ەكولوگيا, گەولوگيا جانە تابيعي رەسۋرستار ۆيتسە-ءمينيسترى احمەتجان پىرىمقۇلوۆ, دەنساۋلىق ساقتاۋ ۆيتسە-ءمينيسترى جاندوس بۇركىتباەۆ تۇسىنىكتەمە بەردى.

وتىرىسقا قاتىسۋشىلار جاھاندىق ەكونوميكالىق كۇن ءتارتىبىن ترانسفورماتسيالاۋ جانە ونىڭ باعىتىن پاندەميادان كەيىنگى قالپىنا كەلتىرۋگە قايتا باعدارلاۋ تۇرعىسىنان قر ينۆەستيتسيالىق ساياساتىنىڭ وزەكتى ماسەلەلەرىن تالقىلادى.

اسقار مامين قازاقستان COVID-19-دىڭ ەكونوميكالىق سالدارىن ءساتتى ەڭسەرە العانىن اتاپ ءوتتى. بيىلعى 11 ايدىڭ قورىتىندىسى بويىنشا ەكونوميكا ءوسىم كورسەتىپ قانا قويماي, سونداي-اق ءوندىرىستىڭ پاندەمياعا دەيىنگى كورسەتكىشتەرىنەن دە اسىپ ءتۇستى. بيىلعى قاڭتار-قاراشا ايلارىندا ءجىو ءوسىمى 3,8% قۇرادى.

ەكونوميكانىڭ بەلسەندى قالپىنا كەلۋى اياسىندا تىكەلەي شەتەلدىك ينۆەستيتسيالار اعىنىنىڭ ارتقانى بايقالادى. 2021 جىلدىڭ ءبىرىنشى جارتىسىندا قر ەكونوميكاسىنا سالىنعان تشي كولەمى 30%-دان استامعا ۇلعايدى.

شەتەلدىك ينۆەستيتسيالاردىڭ ەڭ كوپ ءوسىمى اقپارات جانە بايلانىس (9,4 ەسە), تۇرۋ جانە تاماقتانۋ سالاسىنداعى قىزمەتتەر (66,1%-عا), وڭدەۋ ونەركاسىبى (57,2%-عا) سياقتى سالالاردا بايقالادى.

ءوندىرۋشى ەمەس سەكتورلاردا نەگىزگى كاپيتالعا سالىنعان ينۆەستيتسيالار 11%-دان استامعا ءوستى. قۇرىلىس (2,1 ەسە), وڭدەۋ ونەركاسىبى (+50,5%), اۋىل شارۋاشىلىعى (+40,5%) جانە ساۋدا (+34,2%) سالالارىندا ينۆەستيتسيانىڭ قارقىندى وسكەنى بايقالادى.

كوپتەگەن حالىقارالىق قارجى ۇيىمدارى قر ەكونوميكاسىنىڭ 2021 جىلى 4%-عا دەيىن جانە 2022 جىلى 4,5%-عا دەيىن ءوسۋىن بولجايدى.

داعدارىستان كەيىنگى قالپىنا كەلتىرۋدىڭ باسىم ستراتەگيالىق باعىتتارى رەتىندە ۇكىمەت باسشىسى ەكونوميكانىڭ ونەركاسىپتىك الەۋەتىن ارتتىرۋدى, جاھاندىق نارىقتارعا كەشەندى ينتەگراتسيالانۋعا جاردەمدەسۋدى, اۋىل شارۋاشىلىعى الەۋەتىن دامىتۋدى, تسيفرلاندىرۋدى, ينفراقۇرىلىمنىڭ ساپاسى مەن قولجەتىمدىلىگىن ارتتىرۋدى اتادى.

پرەمەر-مينيستر وتكەن جىلى قر پرەزيدەنتى جانىنداعى شەتەلدىك ينۆەستورلار كەڭەسىنىڭ گاز جاعۋدان بولىنەتىن شىعارىندىلار ءۇشىن ايىپپۇل ەسەپتەۋ كەزىندەگى ديسكريميناتسيالىق ءتاسىلدى جويۋ, سونداي-اق بيزنەستى سالىقتىق قۇقىق بۇزۋشىلىقتار ءۇشىن قىلمىستىق جاۋاپكەرشىلىككە تارتۋ شەگىن وڭتايلاندىرۋ تۋرالى ۇسىنىستارى قولداۋ تاپقانىن اتاپ ءوتتى.

شيك-پەن بىرلەسىپ جاڭا ينۆەستيتسيالىق قۇرال – جەر قويناۋىن پايدالانۋ سالاسىنداعى جاقسارتىلعان مودەلدىك كەلىسىمشارت ازىرلەندى, مۇناي-گاز سالاسىندا شەتەلدىك ينۆەستورلارمەن جەدەل ءوزارا ءىس-قيمىل جاساۋ ءۇشىن ء«بىر تەرەزە» قاعيداتى بويىنشا ۆەدومستۆوارالىق فرونت-وفيس قۇرىلدى, تسيفرلاندىرۋ ماسەلەلەرى بويىنشا تۇراقتى جۇمىس توبى قۇرىلدى.