قر ىشكى ىستەر ءمينيسترى ەرلان تۇرعىمباەۆ ىشكى ىستەر ورگاندارى قىزمەتكەرلەرىن ماراپاتتادى. بۇل تۋرالى قر ءىىم رەسمي وكىلى ءنۇردىلدا وراز ايتتى, دەپ حابارلايدى Egemen.kz.
«تاۋەلسىزدىك كۇنى قارساڭىندا ىشكى ىستەر ءمينيسترى ارداگەرلەردى, الماتى گارنيزونىنىڭ قىزمەتكەرلەرىن – پوليتسيا جانە قىلمىستىق-اتقارۋ جۇيەسى دەپارتامەنتتەرىنىڭ, قالا كۇزەت قىزمەتىنىڭ, الماتى اكادەمياسى مەن ءىىم كينولوگيالىق ورتالىعىنىڭ وكىلدەرىن جانە ۇلتتىق ۇلاننىڭ اسكەري قىزمەتشىلەرىن ماراپاتتادى.
قر پرەزيدەنتىنىڭ جارلىعىمەن «قازاقستان رەسپۋبليكاسىنىڭ تاۋەلسىزدىگىنە 30 جىل« مەدالىمەن الماتى گارنيزونىنىڭ 70-تەن استام قىزمەتكەرى, سونداي-اق ىشكى ىستەر ورگاندارى مەن ۇلتتىق ۇلاننىڭ ارداگەرلەرى ماراپاتقا يە بولدى. بىرقاتار قىزمەتكەرگە ۇلگىلى قىزمەت اتقارعانى جانە قىزمەتتىك بورىشىن ءمىنسىز ورىنداعانى ءۇشىن ۆەدومستۆولىق ناگرادالار, سونداي-اق مەرزىمىنەن بۇرىن اتاقتار بەرىلدى», دەدى ءنۇردىلدا وراز ىشكى ىستەر مينيسترلىگىنىڭ ءباسپاسوز قىزمەتى الاڭىندا وتكەن بريفينگ بارىسىندا.
ونىڭ ايتۋىنشا, ەرلان تۇرعىمباەۆ مەملەكەتتىڭ تۇراقتىلىعىن, ازاماتتاردىڭ قاۋىپسىزدىگى مەن زاڭدى مۇددەلەرىن قامتاماسىز ەتۋدە مينيسترلىك ارداگەرلەرىنىڭ اتقاراتىن ءرولى ەرەكشە ەكەنىن اتاپ ءوتتى.
سونداي-اق ول ارداگەرلەرگە ىشكى ىستەر ورگاندارى جۇيەسىنىڭ قالىپتاسۋى مەن دامۋىنا, جاس مامانداردى تاربيەلەۋگە قوسقان ۇلەستەرى ءۇشىن العىس ايتتى.
«ەلدىڭ دامۋ كەزەڭدەرىندە ىشكى ىستەر ورگاندارىنا ماڭىزدى ءرول بەرىلدى. ءبىزدىڭ ارقايسىمىز ازاماتتاردىڭ تىنىشتىعىن قورعاۋ, ولاردىڭ قاۋىپسىزدىگىن قامتاماسىز ەتۋ – ءبىزدىڭ كاسىبي پارىزىمىز ەكەنىن تۇسىنۋگە مىندەتتىمىز. ەلىمىزدىڭ ىشكى قاۋىپسىزدىگى ءبىزدىڭ جۇيەمىزدىڭ جانە ونىڭ ءاربىر قىزمەتكەرىنىڭ قىزمەت ناتيجەلەرىنە بايلانىستى», دەپ اتاپ وتكەن ەرلان تۇرعىمباەۆ.