بۇل تۋرالى بەلگىلى جۋرناليست قانات اۋەسباي الەۋمەتتىك جەلىدەگى پاراقشاسىندا جازدى, دەپ حابارلايدى Egemen.kz.
«قادىرمەندىلەرىم, اتىراۋداعى ميسسيامىزدى ازىرگە وسى جەردەن قايىرۋدىڭ رەتى كەپ تۇر. «قازاقستان» تەلەراديوكورپوراتسياسى» اق اتىراۋ وبلىستىق فيليالىنىڭ باسشىسى قىزمەتىمىزدى ەڭبەك دەمالىسىمەن دوعاردىق. قىزمەتتەن بوساتۋ تۋرالى ءوز ەركىمىزبەن جازعان وتىنىشىمىزگە تۇسىنىستىك تانىتىپ, شەشىمىمىزدى قولداعان جانە وسى قىزمەتكە لايىق كورگەن كورپوراتسيا باسشىسى, مىقتى مەديا مەنەدجەر, تەلەۇستاحاناداعى ۇستازىمىز ءلاززات مۇراتقىزىنا زور العىسىمدى بىلدىرەمىن. وتباسى جاعدايىمەن ەلوردامىزعا قىزمەت اۋىستىرعان جايىمىز بار.اتىراۋدا ازدى-كوپتى 2 جىل 7 ايعا جۋىق قىزمەت قىلىپ, مول كاسىبي تاجىريبە جينادىق. تاپسىرىلعان قىزمەتتى ەڭ الدىمەن ۇلى امانات دەپ بىلدىك. اماناتقا قيانات جاساماۋ - باستى ۇستانىم بولدى. تەلەراديومىزدا اتقارىلعان ءىستىڭ ءبارىن الەۋمەتتىك جەلىدەگى جۇرتشىلىقپەن ۇدايى ءبولىسىپ وتىردىق. ونى قايتالاپ جاتۋدى ءجون كورمەدىم. تەلەراديو ءىسىنىڭ كوماندالىق جۇمىس ەكەنىن اركىم بىلەدى. بارشا جەتىستىككە اۋىزبىرلىگى جاراسقان ۇجىمىمىزبەن بىرگە قول جەتكىزدىك. ءبىز دەيتىنىم دە سوندىقتان.ءوز باسىم ءۇشىن عۇمىر-پاراعىمنىڭ اتىراۋ ۇزىگى بەتبۇرىستى كەزەڭ بولدى. اتىراۋ - باعىمدى ەسەلەي تۇسكەن قۇتتى ءوڭىر. تامىرىمدى تەرەڭ جايىپ, اتىراۋدا قىزىم-قىزعالداعىم دۇنيە ديدارىن اشتى. ۇلىم ەلىمىزدەگى ەڭ دەگدار وقۋ ورنى - اتىراۋداعى نازارباەۆ زياتكەرلىك مەكتەبىنە وقۋعا ءتۇستى. جايىقتاعى جۇرتپەن ەتەنە ارالاسىپ, ەل اعالارىنىڭ باتاسىنا كەنەلدىك. ەل كورىپ, جەر تانىدىق.اتىراۋدا «مادەنيەت سالاسىنىڭ ۇزدىگى», وبلىستىق ءماسليحاتتىڭ «اتىراۋ وبلىسىنىڭ الەۋمەتتىك-ەكونوميكالىق دامۋىنا قوسقان ۇلەسى ءۇشىن» توسبەلگىلەرىمەن, ءوڭىر باسشىسى ماحامبەت جولداسقالي ۇلىنىڭ العىس حاتىمەن ماراپاتتالدىق. قىزمەت ەتكەن ۋاقىتىمىزدا اتىراۋ وبلىسىن باسقارعان نۇرلان اسقار ۇلى مەن قازىرگى اكىم ماحامبەت جولداسقالي ۇلىنىڭ زور قولداۋىنا يە بولدىق. نار تۇلعالى ەل ازاماتىنىڭ ەكەۋىنە دە ىنىلىك شەكسىز العىسىمدى بىلدىرگىم كەلەدى.اتىراۋدا ء«وڭىردى كورگەنىڭ - ءومىردى كورگەنىڭ» دەگەننىڭ اقيقاتىنا قانىقتىق. مەرەيىمىزدى تاسىتىپ, مارتەبەمىزدى وسىرگەن, ابىرويىمىزدى اسىرىپ, كوككە كوتەرگەن اتىراۋ حالقىنا باسىمىزدى ءيىپ, العىس ايتامىن. مۇلدە تانىمايتىن جەرگە بارىپ سونشا ۋاقىت قىزمەت قىلۋ حالىق قولداماسا مۇمكىن ەمەس-اۋ بىلەم. سول قۇرمەت-قولپاشىڭىزعا لايىم لايىق بولساق دەيمىز. سيماي ەمەس, قيماي كەتىپ بارامىز», دەپ جازبا قالدىردى ول.