الەمدى دۇرلىكتىرگەن كوروناۆيرۋستىڭ جاڭا «وميكرون» نۇسقاسىن جۇقتىرۋ دەرەگى 57 ەلدە تىركەلدى, بۇل تۋرالى دۇنيەجۇزىلىك دەنساۋلىق ساقتاۋ ۇيىمى مالىمدەدى, دەپ حابارلايدى Egemen.kz Reuters-كە سىلتەمە جاساپ.
ددسۇ ءوزىنىڭ اپتا سايىنعى ەپيدەميولوگيالىق ەسەبىندە كوروناۆيرۋستىڭ «وميكرون» شتاممىنان تۋىنداعان اۋرۋدىڭ اۋىرلىعىن جانە ونىڭ مۋتاتسياسى ۆاكتسينالارمەن الىنعان يممۋنيتەتتى قورعاي الاتىنىن باعالاۋ ءۇشىن قوسىمشا مالىمەتتەر قاجەت دەپ مالىمدەدى.
«دەرتتىڭ اۋىرلىق دارەجەسىن ەسكەرەتىن بولساق, «دەلتاعا» قاراعاندا, «وميكروننىڭ» تارالۋىنا بايلانىستى اۋرۋحاناعا جاتقىزۋ سانى ارتادى دەپ كۇتىلۋدە», دەلىنگەن ددسۇ ەسەبىندە.
ەسكە سالساق, 26 قاراشادا ددسۇ وڭتۇستىك افريكادا العاش رەت تابىلعان SARS-CoV-2 بەسىنشى شتاممى - وميكرون شتاممىنىڭ پايدا بولعانى تۋرالى جاريالادى. وڭتۇستىك افريكادا تىركەلگەن جاعدايلاردىڭ سانى ءبىر اپتا ىشىندە ەكى ەسە ارتىپ, 62000-نان استى. ۇيىمنىڭ ەسەبىندە اۋرۋدىڭ كۇرت ءوسۋى ەسۆاتيني, زيمبابۆە, موزامبيك, ناميبيا جانە لەسوتودا بايقالدى.
«وميكرون» شتاممىنداعى مۋتاتسيالار ۆاكتسينادان الىنعان يممۋنيتەتتەن قورعانۋدىڭ تومەندەۋىنە جانە ۆاكتسينانىڭ قوسىمشا دوزالارىن قولدانۋدى قوسا العاندا, ۆاكتسينانىڭ تيىمدىلىگى تۋرالى مالىمەتتەردى باعالاۋ ءۇشىن قوسىمشا مالىمەتتەر قاجەت», دەلىنگەن حابارلامادا.