رەسەيدىڭ سانكت-پەتەربۋرگ قالاسىندا قازاقستان ازاماتتارىن 263 ملن تەڭگەگە الداپ كەتكەن جالعان بانك باسشىسى ۇستالدى, دەپ حابارلايدى Egemen.kz.
2019 جىلى قاراعاندى قالاسىنىڭ ۋپ-نە بەلگىلى ءبىر ازاماتتىڭ الاياقتىق ارەكەتتەرىنىڭ قۇربانى بولعان ازاماتتاردان وتىنىشتەر كەلە باستاعان.
انىقتالعانداي, الاياق ءوزىن بانكتەردىڭ ءبىرىنىڭ باسشىسى رەتىندە تانىستىرىپ, ينۆەستيتسيالىق باعدارلاماعا سالىم سالۋ ءۇشىن حالىقتان اقشا تارتا باستاعان. بۇل رەتتە ول سالىنعان سومانىڭ 1% تۇرىندە ديۆيدەندتەردى كۇندەلىكتى تولەۋگە ۋادە بەرگەن. قاراعاندى قالاسىنىڭ تۇرعىندارى بۇل ۇسىنىستى تارتىمدى ساناپ, ءوز جيناقتارىن الاياققا بەرىپ, ورنىنا قارجى مەكەمەسى ديرەكتورىنىڭ اتىنان قول قويىلعان كەپىلدىك حاتتاردى العان.
باستاپقىدا الاياق «ينۆەستورلارعا» كەيبىر اقشا قاراجاتىن بەرىپ تۇرعان, بىراق ۋاقىت وتە كەلە بايلانىستى مۇلدە ۇزگەن. ناتيجەسىندە, جابىرلەنۋشىلەرگە كەلتىرىلگەن زالالدىڭ جالپى سوماسى 263 ملن تەڭگەنى قۇرادى.
Polisia.kz سايتىنىڭ مالىمەتىنشە, اتالعان دەرەكتى قر قك 190-بابى «الاياقتىق» بويىنشا قىلمىستىق ءىس قوزعادى.
پوليتسيا بانكتەردىڭ ءبىرىنىڭ قىزمەتكەرى بولىپ تابىلاتىن 31 جاستاعى ەر ادامدى انىقتادى, ول سوتقا دەيىنگى تەرگەۋ بارىسىندا قىلمىستىق قۋدالاۋ ورگاندارىنان جاسىرىنىپ جۇرگەن. كۇدىكتىگە قاتىستى قاراعاندى قالاسىنىڭ مامانداندىرىلعان تەرگەۋ سوتى سىرتتاي كۇزەتپەن ۇستاۋ تۇرىندەگى بۇلتارتپاۋ شاراسىن تاڭداپ, حالىقارالىق ىزدەستىرۋدى جاريالادى.
«جەدەل-ىزدەستىرۋ شارالارى بارىسىندا رەسەي فەدەراتسياسىنىڭ سانكت-پەتەربۋرگ قالاسىنداعى كريمينالدىق پوليتسيا قىزمەتكەرلەرى كۇدىكتىنى انىقتاپ, ۇستادى. ول لەنينگراد وبلىسىنىڭ يزولياتورلارىنىڭ بىرىنە قامالدى. قازىرگى ۋاقىتتا ۇستالعان ادامدى قازاقستانعا ەكستراديتسيالاۋ ماسەلەسى شەشىلۋدە», دەدى قاراعاندى وبلىسى پوليتسيا دەپارتامەنتى باستىعىنىڭ ورىنباسارى ابيل ابيلدين.