ەۋروپا كەڭەسى پارلامەنتتىك اسسامبلەياسىنىڭ توراعاسى ريك دەمستىڭ قازاقستانعا ساپارىنىڭ قورىتىندىسى بويىنشا بىرلەسكەن مالىمدەمە قابىلداندى, دەپ حابارلايدى Egemen.kz.
15-19 قاراشا ارالىعىندا ەۋروپا كەڭەسى پارلامەنتتىك اسسامبلەياسىنىڭ توراعاسى ريك دەمستىڭ قازاقستانعا رەسمي ساپارى بولدى. ول ساپار اياسىندا پرەزيدەنت قاسىم-جومارت توقاەۆپەن, پارلامەنتتىڭ ەكى پالاتاسىنىڭ توراعالارىمەن, ورتالىق مەملەكەتتىك ورگانداردىڭ باسشىلارىمەن, سونداي-اق ادام قۇقىقتارىن قورعاۋ جانە زاڭ ۇستەمدىگى سالاسىندا جۇمىس ىستەيتىن ازاماتتىق قوعامنىڭ اۋقىمدى وكىلدەرىمەن كەزدەسۋلەر وتكىزدى.
ەۋروپالىق پارلامەنتشى قازاقستاندا بولعاندا ەلدە جۇرگىزىلىپ جاتقان قايتا قۇرۋلارمەن جان-جاقتى تانىسىپ, ولارعا جوعارى باعا بەردى. ساپار قورىتىندىسى بويىنشا بىرلەسكەن مالىمدەمە قابىلداندى, ونىڭ ءماتىنى تومەندە بەرىلىپ وتىر:
ەۋروپا كەڭەسى پارلامەنتتىك اسسامبلەياسىنىڭ توراعاسى ريك دەمستىڭ جانە ەكپا-داعى قازاقستان پارلامەنتى دەلەگاتسياسىنىڭ باسشىسى اسقار شاكىروۆتىڭ بىرلەسكەن مالىمدەمەسى
قازاقستان رەسپۋبليكاسى تاۋەلسىزدىگىنىڭ 30 جىلدىعىنا وراي ەل حالقىنا قۇتتىقتاۋىمىزدى بىلدىرەمىز جانە ونىڭ دامىعان دەموكراتيالىق مەملەكەت بولىپ قالىپتاسۋ نيەتىن قولدايمىز. پرەزيدەنت قاسىم-جومارت توقاەۆتىڭ ەلدىڭ تۇراقتى جانە ورنىقتى دامۋىن ودان ءارى نىعايتۋ ماقساتىندا جۇرگىزىپ وتىرعان دەموكراتيالىق رەفورمالارىن قۇپتايمىز. قازاقستاننىڭ ءولىم جازاسىن الىپ تاستاعانىن, ازاماتتىق جانە ساياسي قۇقىقتار تۋرالى حالىقارالىق كونۆەنتسياعا فاكۋلتاتيۆتىك ەكىنشى حاتتاماعا جانە باسقا دا ماڭىزدى حالىقارالىق-قۇقىقتىق قۇرالدارعا قوسىلعانىن اتاپ وتەمىز.
قۇقىق ۇستەمدىگىن ىلگەرىلەتۋدىڭ ماڭىزىن ۇعىنا وتىرىپ, قازاقستاننىڭ ەۋروپا كەڭەسىنىڭ بىرقاتار كونۆەنتسيالارىنا, ونىڭ ىشىندە قىلمىستىق سالاعا قوسىلۋىنا ارنالعان كۇش-جىگەرىن قولدايمىز.
پارلامەنتارالىق ديپلوماتيانىڭ جوعارى تيىمدىلىگىن اتاپ وتە وتىرىپ, قر پارلامەنتى مەن ەكپا دەپۋتاتتارى اراسىندا ءوزارا ءتيىمدى ىنتىماقتاستىقتى ارتتىرۋعا, بايلانىستاردى كەڭەيتۋگە جانە سەنىمدى ديالوگتى تەرەڭدەتۋگە مۇددەلى ەكەنىمىزدى بىلدىرەمىز.
وسى تۇرعىدا قازاقستاندىق تاراپتىڭ ايەلدەرگە قاتىستى زورلىق-زومبىلىقتىڭ جانە ۇيدەگى زابىرلەۋدىڭ الدىن الۋ جانە وعان قارسى كۇرەس تۋرالى كونۆەنتسياعا قوسىلۋ, سونداي-اق ەكپا-عا قولايلى سيپاتتا قاتىسۋ مۇمكىندىگىن قاراۋعا ازىرلىگىن قۇپتايمىز.