قازاقستان پرەزيدەنتى مەملەكەتتىك ورگاندارعا قازا تاپقانداردىڭ وتباسىلارىنا كومەك كورسەتۋ بويىنشا بارلىق شارالاردى قابىلداۋدى جانە جامبىل وبلىسىنداعى جارىلىس بولعان جەردە قالپىنا كەلتىرۋ جۇمىستارىن جۇرگىزۋدى تاپسىردى. قازىرگى ۋاقىتتا جۇمىستار ءالى دە جالعاسۋدا, دەپ حابارلايدى Egemen.kz.
«2021 جىلعى 27 تامىزدا مەملەكەت باسشىسى قاسىم-جومارت توقاەۆ جامبىل وبلىسىنداعى جارىلىستارعا بايلانىستى شۇعىل كەڭەستە ۋاكىلەتتى مەملەكەتتىك ورگاندارعا قازا تاپقانداردىڭ وتباسىلارىنا كومەك كورسەتۋ بويىنشا بارلىق شارالاردى قابىلداۋدى جانە قالپىنا كەلتىرۋ جۇمىستارىن جۇرگىزۋدى تاپسىردى», دەپ جازدى قر پرەزيدەنتىنىڭ ءباسپاسوز حاتشىسى بەرىك ءۋالي Facebook-تە.
ورىندالدى:
بۇگىنگى كۇنى ب ۇلىنگەن 176 نىساننىڭ 173-ءى قالپىنا كەلتىرىلدى. 35 تۇرعىن ءۇي, 10 كوممەرتسيالىق نىسان, ەكى مەكتەپ جانە ءبىر مەديتسينالىق پۋنكت پايدالانۋعا بەرىلدى. جىبەك جولى اۋىلىندا ەكى كوممەرتسيالىق نىساننىڭ جانە 150 ورىندىق جاڭا مەكتەپتىڭ قۇرىلىسى جالعاسۋدا. قاينار اۋىلىندا جولدار جوندەلدى, كوشەنى جارىقتاندىرۋ جۇرگىزىلدى, ۇيلەردى گازداندىرۋ جانە سۋمەن جابدىقتاۋ قامتاماسىز ەتىلدى. قالپىنا كەلتىرۋ جۇمىستارىن جۇرگىزۋگە ۇكىمەت رەزەرۆىنەن 1,2 ملرد تەڭگە, دەمەۋشىلىك قاراجات ەسەبىنەن 102,3 ملن تەڭگە تارتىلدى. زارداپ شەككەندەردىڭ وتباسىلارىنا ماتەريالدىق كومەك رەتىندە 15 ملن تەڭگەدەن تولەندى; زارداپ شەككەندەردىڭ وتباسى مۇشەلەرىنىڭ بانكتەر مەن ميكروقارجى ۇيىمدارى الدىنداعى قارىزدارى تولىق وتەلدى.