قازاقستاندا COVID-19-عا قارسى رەۆاكتسيناتسيا قاراشانىڭ ەكىنشى جارتىسىندا باستالادى. ەلورداداعى №15 قالالىق ەمحانانىڭ جتد ءبولىمىنىڭ مەڭگەرۋشىسى گۇلنار سىزدىقوۆا بۋستەرلىك ۆاكتسينانى ءبىرىنشى بولىپ ازاماتتاردىڭ قانداي ساناتتارى الاتىنىن ايتتى, دەپ حابارلايدى Egemen.kz.
كوروناۆيرۋستىق ينفەكتسياعا قارسى رەۆاكتسيناتسيا كۆي-مەن كۇرەستە يممۋنيتەتتى نىعايتۋ ءۇشىن جۇرگىزىلەدى. ونى ءبىرىنشى كەزەكتە اۋرۋعا بەيىم ازاماتتار ساناتى الاتىن بولادى.
ء«بىرىنشى كەزەكتە كۆي-دەن العاشقى بولىپ ەكپە العاندار – مەديتسينا قىزمەتكەرلەرى, پەداگوگتەر, قۇقىق قورعاۋ ورگاندارىنىڭ قىزمەتكەرلەرى ۆاكتسينامەن قايتا ەگىلەدى. ارينە, ءبارى ەرىكتى نەگىزدە. سونداي-اق, ءبىرىنشى كەزەكتەگى رەۆاكتسيناتسيادان سوزىلمالى اۋرۋلارى بار ادامدار, قارت ادامدار وتكەنى ابزال, ويتكەنى ولار تاۋەكەل توبىنا كىرەدى», دەپ ءتۇسىندىردى گۇلنار سىزدىقوۆا.
ايتا كەتۋ كەرەك, رەۆاكتسيناتسيا مەرزىمى كۆي ۆاكتسيناسىنىڭ ەكى دوزاسىن العان ساتتەن باستاپ 6 ايدان 9 ايعا دەيىن وزگەرەدى. دارىگەرلەر سونىمەن قاتار كروسس-ۆاكتسيناتسيانى, باسقاشا ايتقاندا, ۆاكتسينانىڭ باسقا ءتۇرىن ەگۋدى ۇسىنادى.
«سپۋتنيك V» العاننان كەيىن رەۆاكتسيناتسيانى 9 ايدان كەيىن جۇرگىزۋ كەرەك, ويتكەنى بۇل – ۆەكتورلىق, كۇشەيتىلگەن ۆاكتسينا. وتاندىق «QazVac» پەن قىتايلىق «Vero Cell» – 6 ايدان سوڭ», دەپ ناقتىلادى دارىگەر.