اسقار مامين «اۋىل – ەل بەسىگى» جوباسىنىڭ ىسكە اسىرىلۋىن تەكسەرۋدى تاپسىردى

بيىل 27 قازانىنان باستاپ قر پرەمەر-ءمينيسترى اسقار ءماميننىڭ تاپسىرماسى بويىنشا ورتالىق مەملەكەتتىك ورگانداردىڭ باسشىلارى اۋىلدىق ەلدى مەكەندەردەگى ينفراقۇرىلىمدى جاڭعىرتۋ بارىسىن باقىلاۋ ماقساتىندا وڭىرلەرگە ينسپەكتسيالىق ساپارلاردى باستادى. 

قازاقستاندا اۋىل حالقىنىڭ 89%-ى تۇراتىن 3561 پەرسپەكتيۆالى اۋىل (1173 تىرەك جانە 2388 سەرىكتەس) ايقىندالدى. 2019-2021 جىلدارى «اۋىل – ەل بەسىگى» جوباسى, سونداي-اق جۇمىسپەن قامتۋ جول كارتاسى, «نۇرلى جول» جانە «نۇرلى جەر» باعدارلامالارى بويىنشا جانە جەكە ينۆەستيتسيالار ەسەبىنەن اۋىلدىق اۋماقتاردى دامىتۋعا 1,2 ترلن تەڭگە باعىتتالدى. تكش, كولىك, ءبىلىم بەرۋ, دەنساۋلىق ساقتاۋ, مادەنيەت جانە سپورت سالالارىندا 12 مىڭنان استام جوبا ىسكە اسىرىلدى, 6,5 مىڭ جوبا ىسكە اسىرىلۋ ساتىسىندا. 

الداعى ءتورت جىلدا «اۋىل – ەل بەسىگى» جوباسىن قارجىلاندىرۋ كولەمى 800 ملرد تەڭگەگە دەيىن ۇلعايدى, ال بارلىق قارجى كوزدەرىن ەسكەرە وتىرىپ, اۋىلداردى جاڭعىرتۋعا 1,3 ترلن تەڭگە جوسپارلانعان. 

2025 جىلعا قاراي اۋىلدىق جەرلەر 100% سۋمەن جابدىقتاۋ قىزمەتتەرىمەن قامتاماسىز ەتىلەدى, 10 مىڭ شاقىرىم كەنتىشىلىك جولداردىڭ جاي-كۇيى جاقسارتىلدى, 12 مىڭ شاقىرىم ينجەنەرلىك جەلى, بىرنەشە مىڭ الەۋمەتتىك ينفراقۇرىلىم وبەكتىسى سالىندى جانە جوندەلدى, 5 مىڭ اۋىل مەكتەبى جاڭعىرتىلدى. 

اوك سالاسىندا 4,5 ترلن تەڭگە سوماسىنا 1 مىڭعا جۋىق جوبا ىسكە اسىرىلادى. اۋىل شارۋاشىلىعىنداعى ەڭبەك ونىمدىلىگى 2,5 ەسە ارتادى, قايتا وڭدەلگەن ءونىم ۇلەسىن 70%-عا دەيىن جەتكىزە وتىرىپ, اوك ونىمدەرىنىڭ ەكسپورتى 2 ەسە ارتادى. 1 ملن اۋىل تۇرعىنىنىڭ تابىسى ارتادى, اۋىل شارۋاشىلىعىندا 500 مىڭ جۇمىس ورنى قۇرىلادى. 

بيىل 29 قازاندا قر پرەمەر-ءمينيسترى اسقار مامين اقمولا وبلىسىنا جۇمىس ساپارى بارىسىندا «اۋىل – ەل بەسىگى» جوباسىنىڭ ىسكە اسىرىلۋىن تەكسەردى. 

ۇكىمەت باسشىسى استراحان اۋدانىنىڭ استراحانكا اۋىلىنداعى جانە اتباسار اۋدانىنىڭ باستاۋ اۋىلىنداعى دەنساۋلىق ساقتاۋ, ءبىلىم بەرۋ, مادەنيەت جانە سپورت, تىرشىلىكتى قامتاماسىز ەتۋ جانە اوك نىساندارىن ارالادى. 

اقمولا وبلىسىندا 298 پەرسپەكتيۆالى اۋىلدىق ەلدى مەكەن انىقتالدى. 2019-2021 جىلدارى ءوڭىردىڭ اۋىلدىق اۋماقتارىنىڭ ينفراقۇرىلىمىن جاڭعىرتۋعا 70 ملرد تەڭگە ءبولىندى. «اۋىل – ەل بەسىگى» جوباسى اياسىندا الەۋمەتتىك ينفراقۇرىلىم نىساندارىن, تكش, كەنتىشىلىك جولداردى, سۋ قۇبىرى جەلىلەرىن جوندەۋ جانە سالۋ بويىنشا 88 جوبا ىسكە اسىرىلدى. 1140 جۇمىس ورنى قۇرىلدى, ونىڭ ىشىندە 200-ءى تۇراقتى جۇمىس ورنى. 

بيىل بارلىق مەملەكەتتىك باعدارلاما بويىنشا اقمولا وبلىسىنىڭ اۋىلدىق ەلدى مەكەندەرىن دامىتۋ بويىنشا جالپى سوماسى 22,3 ملرد تەڭگەگە 203 جوبا ىسكە اسىرىلىپ جاتىر. 2022-2025 جىلدارعا ءوڭىردىڭ اۋىلدىق ايماقتارىن دامىتۋعا شامامەن 120 ملرد تەڭگە ءبولۋ جوسپارلانعان. 

ا. مامين ەڭبەك ارداگەرلەرىمەن جانە ءوڭىردىڭ قۇرمەتتى تۇرعىندارىمەن كەزدەستى. ۇكىمەت باسشىسى اۋىلدىق ەلدى مەكەندەردىڭ دامۋىنا جاڭا سەرپىن بەرەتىن «اۋىل – ەل بەسىگى» جوباسىن ۋاقتىلى جانە ساپالى ىسكە اسىرۋدىڭ ماڭىزدىلىعىن اتاپ ءوتتى. 

«مەملەكەت باسشىسى قاسىم-جومارت توقاەۆ «اۋىل – ەل بەسىگى» جوباسىن ىسكە اسىرۋعا جانە اۋىلدىق ەلدى مەكەندەردەگى تۇرمىس ساپاسىن ارتتىرۋعا كوپ كوڭىل بولەدى. ۇكىمەت مۇشەلەرى «اۋىل – ەل بەسىگى» جوباسىنىڭ جانە اۋىل ايماقتارىن دامىتۋدىڭ باسقا دا باعدارلامالارىنىڭ ورىندالۋىن باقىلاۋ بويىنشا ەلىمىزدىڭ بارلىق وڭىرىنە ينسپەكتسيالىق ساپارلاردى باستادى. اۋىلدىق جەرلەردە ينفراقۇرىلىمدى جاڭعىرتۋ بويىنشا جوبالاردى ىسكە اسىرۋ قارقىنى ەرەكشە باقىلاۋدا», دەدى ا. مامين.