جاڭاوزەندەگى جاقسى ىستەر

جەرگىلىكتى اكىمدىكتىڭ مەرەيلى مەرەكە قارساڭىندا قۋانا كورسەتەر جاڭا­لىق­تارىنىڭ ءبىرى – جاڭاوزەن قالاسىنان مەم­لەكەت­تىك باعدارلاما بويىنشا سالىنىپ جاتقان تۇرعىن ءۇي قۇرىلىسى. جالپى, مۇنايلى قالادا مەملەكەتتىك باعدارلاما بويىنشا سالىنىپ جاتقان ۇيلەر بار, سونىڭ ءبىرى – «نۇرلى جەر» باعدارلاماسى اياسىندا بوي كوتەرگەن 160 پاتەرلى تۇرعىن ءۇي. «راۋان» شاعىن اۋدانىندا سالىنىپ جات­قان ءۇي قۇرىلىسى ءۇشىن جاڭاوزەن قالا­سىندا العاش رەت ۇلتتىق قوردان قار­جى بولىنگەن. بيىل بولىنگەن 1 ملرد تەڭگە­نىڭ جۇمىستارىن 75 ادام جۇرگىزۋدە.

– 160 پاتەرلى تۇرعىن ءۇي قۇرىلىسى بيىل قىركۇيەك ايىندا, ياعني كەشە عانا باستالدى. ەكى بلوكتان تۇراتىن ۇيدە ءبىر پاتەرلى 40, ەكى پاتەرلى 80, ءۇش پاتەرلى 80 ءۇي بار. ءبىر بولمەلى پاتەرلەر كولەمى – 54 شارشى مەتر, ەكى بولمەلى ۇيلەر 67 شارشى مەتر بولسا, ءۇش بولمەلى ۇيلەردىڭ كولەمى – 80 شارشى مەتر. «اس-قۇرىلىس» كومپانياسىنىڭ باس مەردىگەرلىگىمەن قۇرىلىسى باستالعان ءۇيدى تولىق اياقتاپ, ءوز يەلەرىنە 2022 جىلى تامىز ايىندا پايدالانۋعا بەرۋدى مەجەلەپ وتىرمىز, – دەيدى جاڭاوزەن قالالىق قۇرىلىس ءبولىمىنىڭ سەكتور مەڭگەرۋشىسى م.ءابدىروۆ.

ۇيلەردىڭ قوناعى دا, بالا-شاعاسى دا كوپ بولاتىن قازاقى تۇرمىسىمىزعا لايىقتى ەتىپ كەڭ سالىنۋدى جوسپارلاعانى قۋانتتى. جيناق بانكىنىڭ سالىمشىلارىنا بەرىلەتىن ءۇي مۇنايلى قالادا باسپانا ماسەلەسىن شەشە الماي جۇرگەن كوپ قانداستىڭ قۋانىشىنا سەپ بولارىن ويلاپ قۋاندىق.

ءباسپاسوز-تۋرىن ۇيىمداستىرۋشىلار­دىڭ ەكىنشى تاڭداپ كورسەتكەن نىسانى قالادان ون شاقتى شاقىرىم قاشىق­تىقتاعى 7 مىڭنان اسا تۇرعىنى بار قىزىل­ساي اۋىلىنداعى جاڭا دارىگەرلىك امبۋلا­­توريا بولدى. بۇعان دەيىن ەسكى جانە شاعىن اپاتتى جاعدايداعى امبۋلاتوريادا باسى اۋىرىپ, بالتىرى سىزداعان اۋىل تۇرعىندارىنا دارىگەرلىك قىزمەت كورسەتىپ كەلگەن دارىگەرلەر جاڭا ورىندى كۇتىپ, اۋىلداعى مادەنيەت ءۇيىنىڭ بولمەلەرىن ساعالاعان بولاتىن. بۇل مادەنيەت قىزمەت­كەرلەرىنە دە, دارىگەرلەرگە دە, اسىرەسە اۋىل تۇرعىندارىنا قولايسىزدىق تۋىنداتىپ, ءبارى دە جاڭا امبۋلاتوريا قۇرىلىسىنىڭ تەزىرەك اياقتالۋىن اسىعا كۇتكەن بولاتىن. كوپشىلىك كۇتكەن جاڭالىق حالىققا كەڭ, زاماناۋي دارىگەرلىك قۇرال-جابدىقتارمەن جانە جاڭا جيھازدارمەن جابدىقتالعان, ەڭ باستىسى دارىگەر ماماندارى جەتكىلىكتى امبۋلاتوريا بولىپ ەسىك اشتى.

– بۇگىنگى كۇن جاڭاوزەن قالاسى تاريحىندا, قىزىلساي اۋىلى تاريحىندا ەستە قالارلىق كۇن بولدى دەسەم, ار­تىق ايتقاندىق بولماس. ەلىمىزدە كوپ­تەگەن اۋرۋحانالار, امبۋلاتوريالار اشى­لىپ جاتىر. بۇرىن جۇرەككە وتانى بۇكىل الەم بويىنشا مەديتسيناسى وزىق دامىعان ەلدەردە عانا جاسايتىن بولسا, قازىر ءبىزدىڭ ەلىمىزدە ءساتتى جۇزەگە اسىرىلىپ كەلەدى. تامىر ارقىلى وتا جاساۋ ءتىپتى ورتالىقتان الىس ورنالاسقان وبلىس ورتالىقتارىندا دا قولجەتىمدى بولعاندىعى ءۇشىن قۋانامىز. مۇنىڭ ءبارى ءبىزدىڭ ەلىمىزدىڭ 30 جىل ىشىندە جەتكەن جەتىستىگى جانە بۇل جەتىستىكتەر وسىمەن توقتاپ قالمايدى. قازاقستان قاي سالادا دا جاڭارعان, جاڭعىرعان زامان تالابىنا ساي جەتىستىكتەرمەن بىرگە دامي بەرەدى, – دەدى جاڭاوزەن قالاسىنىڭ اكىمى م.يباعاروۆ.

ونىڭ ايتۋىنشا, «جۇمىسپەن قامتۋ­دىڭ جول كارتاسى – 2020» مەملەكەت­تىك باع­دار­لاماسى اياسىندا قۇرىلىس ءبىر جىل­دا سا­لىنعان, 5 مىڭنان اسا ادام تىر­كەل­گەن قىزىل­ساي امبۋلاتورياسى ءۇشىن 400 ملن-نان استام تەڭگە قاراجات ءبولىن­دى, قازىر جاڭا دارىگەرلىك عيماراتتا 40-تان اسا كا­بي­­نەت بار, ماماندارمەن تولىق قام­تىل­­عان, مۇندا ەمدەلۋشىلەر ۋلترادى­بىس­­تىق, رەنت­گەن زەرتتەۋلەرى مەن ءتىس ەمدەۋ جانە زەرت­حانا قىزمەتتەرىن پايدالانا الادى.

– دارىگەرلىك امبۋلاتوريا جاڭاوزەن قالاسىن الەۋمەتتىك-ەكونوميكالىق دامى­تۋدىڭ 2019-2025 جىلدارعا ارنال­عان كەشەندى جوسپارى جانە Nur Otan پارتيا­سىنىڭ 2025 جىلعا دەيىنگى «وزگەرىستەر جولى: ءار ازاماتقا لايىقتى ءومىر!» سايلاۋالدى باعدارلاماسى اياسىندا اۋىل تۇرعىندارىنىڭ ءومىر ءسۇرۋ ساپاسىن ارتتىرۋ ماقساتىندا ىسكە قوسىلدى. ەندى قىزىلساي اۋىلىنىڭ تۇرعىندارى قالاعا بارماي-اق, قاجەتتى مەديتسينالىق كومەكتى اۋىلدان الا الادى. دارىگەرلىك نىسان حالىققا ساپالى, شۇعىل قىزمەت كورسە­تەدى دەپ سەنەمىن, دارىگەرلىك امبۋلاتوريا قۇتتى بولسىن! – دەدى م.يباعاروۆ عيما­راتتىڭ اشىلۋ سالتاناتىندا.

كۇنىنە 50 ادامدى قابىلداۋعا ارنالعان امبۋلاتورياعا ەندى قىزىلسايلىق 5 مىڭ­نان اسا تۇرعىن قاجەتتى كەزدە ءوز دەنساۋ­لىعى ءۇشىن باس سۇقپاق. مىڭعا تارتا بالا تۋ جاسىنداعى ايەلدەر مەن 2 مىڭنان اسا بالا تىركەلگەن اۋىلدا جاڭا عيماراتتا كورسەتىلەتىن دارىگەرلىك قىزمەتتىڭ ساپاسى قانداي بولماق؟

– ءبىر جىلعا جەتپەي قۇرىلىس جۇمىس­تارى اياقتالىپ, قولدانىسقا بەرىلگەن امبۋ­لاتوريادا تاجىريبەلى, ءوز ءىسىنىڭ شە­بەر دارىگەرلەرى قىزمەت ەتەدى. مۇندا  پەدياتر, ۋزي دارىگەرى, ءتىس دارى­گەرى بار, سونداي-اق 26 مەدبيكە, 3 كىشى قىز­مەتكەر جۇمىستا. جۋىردا 2 جاس ماماندى قىزمەتكە قابىلدادىق. امبۋلا­توريادا قوسىمشا ەكپە, فتيزياتر كا­بينەتتەرى جاساقتالدى جانە ستوماتو­لوگياعا سوڭعى ۇلگىدەگى اپپارات الىپ قون­د­ىرىلدى, جۇكتى ايەلدەرگە ارنال­عان كابينەت, كۇندىزگى ەمدەۋ, ەم-شارا كابينەتى مەن سكرينينگ بولمەسى, پسيحولوگ بولمەسى, وقشاۋلاۋ بولمەسى مەن زەرتحانا بار. جاس ماماندارعا الەۋمەتتىك قولداۋ كورسەتىلەدى, – دەيدى №1 جاڭاوزەن قالالىق ەمحاناسى ديرەكتورىنىڭ ەمدىك-پروفيلاكتيكالىق ءىسى جونىندەگى ورىنباسارى ق.بالجانوۆا.

قىزىلساي اۋىلىندا ءتورتىنشى دارە­جەلى جەدەل جاردەم قىزمەتى دە بار, ياعني اۋىل تۇرعىندارىنىڭ سۇرانىسى بويىنشا جاڭاوزەن قالالىق «جەدەل جاردەم» قىزمەتىنىڭ وكىلدەرى تاۋلىك بويى اتالعان اۋىلدا بولىپ, ءوز كابينەتتەرىندە شاقىرتۋ قابىلدايدى ەكەن.

اۋىل تۇرعىندارى اتىنان ءسوز العان ارداگەرلەر كەڭەسىنىڭ توراعاسى ا.قامەنوۆ پەن ارداگەر ۇستاز ب.وسكىنباەۆ قۋانىشتارىن جەتكىزىپ, اۋىلداستارى اتىنان العىس ايتتى.

قالادا جاڭادان كاسىپ باستاۋشىلار سانى ارتىپ كەلەدى دەيدى اكىمدىك قىزمەتكەرلەرى. سولاردىڭ ءبىرى گۇل ساۋ­داسىمەن اينالىساتىن باقتىقوجا ورىسباەۆ ەكەن. 1994 جىلى تۋعان جاس جىگىت مۇمكىندىگى شەكتەۋلى جاندار ساناتىنا جاتقانمەن, ءوز كاسىبىن وزگەلەردەن كەم جۇرگىزبەۋدە.

– 2015 جىلدان باستاپ گۇل ساۋداسىمەن اينالىسا باستادىم. وعان 2014 جىلى مۇگەدەكتەرگە بەرىلەتىن جاردەماقى سەبەپشى بولدى. 28 مىڭ تەڭگە اقشانى الىپ, الدىمەن كىشىگىرىم جۇمىستاردان باستادىق. گۇلدەرگە وراما جاساپ, گۇل شوعىرىن دايىنداپ قالاداعى ءتۇرلى مەرەكەلەردە, سالتاناتتى شارالاردا, جەكەلەگەن تۋعان كۇندەردە, توي-تومالاق­تاردا سىيعا بەرىلەتىن گۇلدەردى ساتتىق. كەيىن گۇل دۇكەنىن اشىپ, الماتىدا ارنايى دايىندىقتان ءوتىپ كەلدىك. جۇمىسى­مىزدىڭ كوكجيەگىن كەڭەيتىپ, كاسىبىمىزدى ۇلعايتتىق. 2019 جىلى ەۋروپادا تاجىري­بەدەن ءوتۋ, بۋكەتتى زاماناۋي دايىنداۋ, ياعني وراپ, بەزەندىرۋ بويىنشا تاجىريبە جيناۋ مۇمكىندىگى تۋىندادى, – دەيدى جاس كاسىپكەر باقتىقوجا.

اقتاۋ, جاڭاوزەن قالالارىنان ساۋ­دا ورىندارىن اشقان باقتىقوجانىڭ ماڭعىستاۋدا 3, قۇلسارىدا 1 ساۋدا ور­نى بار, ەندى اتىراۋ قالاسىنان اشۋدى جوسپارلاپ وتىر. 20 شاقتى ادامدى جۇمىسپەن قامتىپ, ولارعا جالاقى تولەپ كەلگەن كاسىپكەر جۇمىسپەن قامتۋ ورتا­لىعىمەن اراداعى قۋانىشتى جاڭا­لىقتى دا جەتكىزدى.

– جۇمىسپەن قامتۋ ورتالىعى بىزگە كومەكتەسپەك, بۇل – ۇلكەن قۋانىش, ۇلكەن قولداۋ. ولار الدىمەن ءبىر جىل بويى قىزمەتكەرلەرگە 100%, كەلەر جىلى 70%, ءۇشىنشى جىلى 30% جالاقى تولەپ بەرەمىز, ودان ءارى جۇمىستارىڭىزدى وزدەرىڭىز جۇرگىزەسىزدەر دەدى. بۇل بىزگە مەملەكەت تاراپىنان زور كومەك, سوندىقتان راحمەت ايتامىز. مۇنداي جاعدايدا ءبىز ءالى دە جۇمىسقا ادام قابىلدايمىز, – دەدى ول.

جاڭاوزەنگە گۇلدەر امستەردامنان, كەنيادان, ەكۆادوردان ۇشاقپەن, جۇك كولىكتەرىمەن تاسىمالدانادى ەكەن. ۇلكەن كومپانيالارمەن سەرىكتەس, ەكۆادوردا بروكەرلەرى بار جاڭاوزەندىك جاس كاسىپكەر گۇل ساۋداسىنىڭ تولاستامايتىنىن, اسىرە­سە گوللانديالىق راۋشان مەن ەكزوتيكالىق گۇلدەرگە سۇرانىس كوپ ەكەنىن ايتادى.

وتباسىندا ءبىر قىز بالانى تاربيەلەپ وتىرعان, قيىندىقتا ساعى سىنباعان قايسار جىگىتتىڭ كاسىبى كوپكە ۇلگى.

جاڭاوزەن قالاسىنداعى پسيحولوگ, دەفەكتولوگ ايگەرىم نۇرادينوۆانىڭ قىزمەتى دە تۇرعىنداردىڭ سۇرانىسىنا يە. بالالار اراسىندا ءجيى كەزدەسەتىن تىلدىك تەجەلۋلەرىنىڭ الدىن الۋ ماقساتىندا اشقان لوگوپەديالىق ورتالىعىنا قازىر 12 بالا كەلەدى. اپتاسىنا ءۇش رەت ءبىر ساعاتتان قاتىنايتىن ولار سويلەپ ۇيرەنۋ, ءتىلىن جاتتىقتىرۋ باعىتىندا پسيحولوگيالىق كومەك الادى. بۇعان دەيىن بالالاردى كابينەتتە قابىلداعان ايگەرىم ءوز قىزمەتىنە جۇگىنۋشىلەردىڭ سانىنىڭ ارتۋىنا وراي ارنايى ورتالىق اشۋدى ءجون دەپ تاپقان. «الداعى ۋاقىتتا قاسىما ماماندار الىپ, بۇگىنگىدەن دە جاقسى ناتيجەلەرگە قول جەت­كىزگىم كەلەدى. مىسالى, جەكەلەگەن جۇمىس­تارمەن بىرگە توپتىق جۇمىستىڭ بەرەرى كوپ, سوندىقتان توپتىق جۇمىستار جۇرگىزۋدى ماقسات ەتىپ وتىرمىن. سونداي-اق لوگوپەد-دەفەكتولوگ مامانداردى جۇمىسقا الىپ, ەسەپتە تۇرعان, مۇمكىندىگى شەكتەۋلى بالالار ءۇشىن تەگىن ءارى جەكە جۇمىس ىستەگىم كەلەدى, – دەيدى پسيحولوگ-دەفەكتولوگ ا.نۇرادينوۆا.

جاڭاوزەندە تاۋەلسىزدىكتىڭ 30 جىل­دىعى اياسىندا اتقارىلار جۇمىستار جال­عاسىن تاۋىپ, حالىق تۇرمىسىنىڭ كور­كەيۋىنە, ەل دامۋىنا ۇلەسىن قوسا بەرسىن, ويتكەنى ءاربىر اۋىلدىڭ, قالانىڭ دامۋى – ەل دامۋىنا قوسىلار زور ۇلەس.