بۇگىن – مۇعالىمدەر كۇنى. مەرەكەگە وراي, ءبىلىم جانە عىلىم ءمينيسترى ارىپتەستەرىنە قۇتتىقتاۋ جولدادى, دەپ جازادى Egemen.kz.
«قىمباتتى ارىپتەستەر, سىزدەردى كاسىبي مەرەكەڭىز – مۇعالىمدەر كۇنىمەن شىن جۇرەكتەن قۇتتىقتايمىن. مۇعالىم مامانداعى الەمدەگى ەڭ قۇرمەتتى, ەڭ اسىل ماماندىقتىڭ ءبىرى. سىزدەر بالالاردى ءبىلىم نارىمەن سۋسىنداتىپ, ولارعا ءتالىم-تاربيە بەرۋ ارقىلى ەلىمىزدىڭ دامۋىنا باعا جەتپەس ۇلەس قوسىپ كەلە جاتىرسىزدار. ويتكەنى مۇعالىم بالالاردى ءبىلىم الەمىنە جەتەلەپ, كەيىنگى بۋىن وكىلدەرىن تاربيەلەيدى», دەدى بعم باسشىسى.
مينيستر اتاپ وتكەندەي, پاندەميا مۇعالىم جۇمىسىنىڭ ماڭىزدىلىعىن ايقىنداپ بەردى.
«اتا-انالار بالالاردى وقىتۋ قانشالىقتى قيىن ەكەنىن ءتۇسىنىپ, مۇعالىمنىڭ وقۋشى ومىرىندە ماڭىزدى ورىن الاتىنىنا تاعى ءبىر مارتە كوز جەتكىزدى. ەل پرەزيدەنتىنىڭ قولداۋىمەن مۇعالىمدەردىڭ جالاقىسى ارتىپ, جاڭا قوسىمشا اقىلار مەن ساناتتار پايدا بولدى. مۇعالىمدەردى وزىنە ءتان ەمەس فۋنكتسيالاردان جانە قاعازباستىلىقتان ارىلتۋ ءۇشىن جۇيەلى ءارى ناقتى شارالار قابىلدادىق. پەداگوگ مارتەبەسىن كوتەرۋ بويىنشا جۇمىس جالعاسىن تابادى», دەپ اتاپ ءوتتى ول قۇتتىقتاۋىندا.
ايماعامبەتوۆ بيىل ەل تاۋەلسىزدىگىنە 30 جىل ەكەنىن دە توقتالدى.
«وسى ۋاقىت ارالىعىندا ەلىمىزدە ايتارلىقتاي وزگەرىستەر بولدى. ءبىلىم بەرۋ جۇيەسى دە وزگەردى. ءبىلىمىمىزدى شىڭداپ, جاڭا داعدىلاردى يگەردىك. بۇل جەتىستىكتەرگە قول جەتكىزۋدە ارىپتەستەرىمىزدىڭ, مۇعالىمدەردىڭ ەڭبەگى مەن كاسىبيلىگىنىڭ ۇلەسى وراسان», دەپ ايتتى ول.
وسى ورايدا باس ۇستاز ارىپتەستەرىنە مىقتى دەنساۋلىق, سارقىلماس كۇش-قۋات, تابىس تىلەدى.
«قاجىرلى ەڭبەكتەرىڭىز, شىدامدىلىقتارىڭىز جانە بالالارعا دەگەن سۇيىسپەنشىلىكتەرىڭىز ءۇشىن العىس ايتامىن. مەرەكە قۇتتى بولسىن!» دەپ اسحات ايماعامبەتوۆ مۇعالىمدەردى اتاۋلى كۇنمەن قۇتتىقتادى.